Carta kuaꞌan nuu yɨvɨ
Hebreo
1
Ndaku niꞌin Yandios sɨkɨ jniñu ñaꞌnu ni jaꞌa ya jiin Seꞌe ya
Undi na janaꞌan xaan, tɨjnɨ jinu ni kaꞌan Yandios, ko ndɨ sɨɨn ndɨ sɨɨn jnuꞌun ja ni xnaꞌan ya jnuꞌun ya nuu chaa ni ka kuu profeta ya. Ti maa da ni ka nakachi da jnuꞌun un nuu chaa ni ka kuu tata yo janaꞌan ja kuu nación Israel vijna. Siaꞌan ni saꞌa ya undi na janaꞌan. Ko kɨvɨ ja kuan yaꞌa vijna, chi sa suꞌva viꞌi ga ni chindee Yandios yoꞌo, chi ni taji ya Seꞌe ya ni kii xndaku ya jnuꞌun ya nuu yo. Undi saa ni jaꞌa ya jniñu nuu Seꞌe ya nava maa Seꞌe ya un na xnukoo ñuyɨvɨ jiin taka ja iyo. Ti ndɨꞌɨ vii ja iyo ni xndoo ya nuu ndaꞌa Seꞌe ya. Ti ɨɨn ni kuu Seꞌe ya jiin maa ya chi ni ndaku ya nanu kaa maa Yandios. Ti kandichi ya jiin maa Yandios, chi ɨɨn ni ka kuñaꞌnu ya. Ti jiin maa jniñu ñaꞌnu xaan ja ndiso Seꞌe ya, so nɨnɨ kaꞌan ni ya, ti taka ja iyo jiin taka yɨvɨ ka siuku i taka ja kuni maa Yandios. Ti ɨɨn jniñu ñaꞌnu ga kuu ja ni sandoo ya yoꞌo nuu kuachi yo. Ti nu ni ndɨꞌɨ ni saꞌa ya jniñu ñaꞌnu un, ni ndaa ya kuanoꞌon ya andɨvɨ nuu ni niꞌin ya jniñu ñaꞌnu xaan ga ja nchaa ya nuu Yandios.
Kuñaꞌnu xaan ga Seꞌe Yandios ja kuu taka ángel
Ti jiin taka jniñu un ni jini yo ja ni nduñaꞌnu ga Seꞌe Yandios ja kuu taka ga ángel ja ka junukuachi nuu Yandios. Siaꞌan kuu chi ni niꞌin ya taꞌu ja ni niꞌin ya ɨɨn jniñu ñaꞌnu xaan ga ja kuu taka ga ángel ka junukuachi nuu Yandios.
Jandaa ndixia kuu yukan chi tu ni kaꞌan Yandios jiin ɨɨn ánge siaꞌan nanu yoso nuu tutu ii:
Maa ra kuu Seꞌe ri, ti vijna ni saꞌa ri ja na nduñaꞌnu ra,
chi maa ri kuu Tata ra.
Ni tu ni kachi ya jiin ɨɨn ángel:
Maa ri kuu Tata nuu ra, ti maa ra konani ra Seꞌe ri.
Ko nu ni taji Yandios maa Seꞌe ya ni kiji ya ini ñuyɨvɨ jaꞌa, ti ni kachi ya:
Ndɨꞌɨ ángel ka junukuachi nuu ri, na nachiñuꞌun i Seꞌe ri.
Ti sɨkɨ ángel ka junukuachi nuu ya un ni kachi ya:
Nanu kee niꞌin tachi, suni siaꞌan ka saꞌa ángel taka jniñu taꞌu Yandios.
Ti nanu kundee yañuꞌun un jaꞌma taka ja kayu nuu, suni siaꞌan ka kundee taka ángel un jiin taka jniñu taꞌu Yandios.
Ko sɨkɨ Seꞌe ya ni kaꞌan ya:
Maa ra kuu Yandios, ti taꞌu ra jniñu ja kuu saa ni.
Ti taka jniñu taꞌu ra, kuu mani jniñu ndaa.
Nɨnɨ ñukuu ini ra ja saꞌa ra niña jniñu vaꞌa ja kuni maa Yandios.
Ti jito uꞌu ra taka jniñu kueꞌe.
Ti ruꞌu, ja kuu ri Yandios ra, ni tatu ri roꞌo ɨɨn jniñu ñaꞌnu ga ja kuu taka ga ja ka junukuachi nuu ri.
Ti jiin jniñu ñaꞌnu ga un ni saꞌa ri ja viꞌi ga na kusɨɨ xaan ini ra ja kuu taka ga ja ka junukuachi nuu ri.
10 Ti suni kachi Yandios jiin Seꞌe ya:
Maa ra kuu ja ndisojniñu ñaꞌnu, ti undi nuu kuɨtɨ ni xnukoo ra ñuyɨvɨ jaꞌa.
Ti suni maa ra ni saꞌa andɨvɨ.
11 Ti taka yukan chi ndɨꞌɨ naa.
Ko maa ra chi kuchaku ra ja kuu saa ni.
Ti taka ja iyo un chi ndɨꞌɨ kuu ava, ti kutuꞌu nanu ɨɨn saꞌma.
12 Ti maa ra nachijnaꞌnu ra yukan nanu ɨɨn saꞌma, ti ndɨꞌɨ nasama ra.
Ko maa ra chi jankɨvɨ nasama ra. Ti tu ndɨꞌɨ kuɨtɨ kɨvɨ kuchaku ra.
13 Ni tu ni kachi ya jiin ɨɨn ángel:
Kuncha ra ndaꞌa kuaꞌa ri ti kuñaꞌnu ra. Ti na chindee ri roꞌo ja na kundee ndɨꞌɨ kuɨtɨ ra jiin taka ja ka jito uꞌu roꞌo.
Ni kachi ya.
14 Ti taka ángel un vasu tu ka iyo yɨkɨ kuñu, ko jini vaꞌa nava taꞌu Yandios jniñu, ti yachi ka jandatu nuu ya. Ti taji ya kuankoyo ja na chindee taka yɨvɨ ka yɨꞌɨ jiin maa Yandios, ja na niꞌin i taꞌu i nuu ya.
Koto ma xnaa yo taꞌu yo nuu Yandios