Pɔli la bataki lawa Kalatikailu ma
Kalatikailu
Kumakan mɛn ye Kitabu sɛniman ɲin kɔndɔ
Kitabu sɛniman ye sɛbɛni Pɔli le bolo ka a lawa lemɛninya mɔɔilu ma mɛn ye Kalati. Wɔ bɛɛ sɛbɛni kitabu Keladenilu la Kewali kɔndɔ suran 13 a ni suran 14.
Nba, Isa la baara damira waati, lemɛninya mɔɔ siyaman tɛrɛ ye Yahudiyailu le ri. ("Yahudiyailu" ni "Isirayɛli" wo bɛɛ ye tɔɔ kelen de ri). Yahudiyailu mɛn lemɛninyara Isa ma ie ka lɔn kɔ Mɔɔ Suwandini le, nabilu kumara a la kɔrɔ. Alu ma Isa la karan lɔn ikɔmi dina kura le. Alu la miriya ye, Isa la karanya ma, a ye ie la dina le dafa la, ikɔmi Alla ka fɔ ɲa mɛn ma. Ka a ma sɔrɔn, alu lemɛninyara, kɔni alu ma ie la dina sariya sila si bila, Nabi Musa la Tawurɛta a ni Nabi Dawuda la Yabuur. Ie ma si bila. Alu ka lɔnni mi sɔrɔn Isa fɛ, ie ka fanan la wo kan.
Kɔnɔrɔfili si tɛ wo rɔ ka a masɔrɔn Alla la kumakan tɛrɛ ye wala Yahidiyailu le ma. Kɔni Isa la karandenilu ka a la kumakan nase siya gbɛrɛ mɔɔilu ma waati mɛn na, kɔnɔrɔfili ka siya gbɛrɛ mɔɔilu mira. Siya gbɛrɛ mɔɔ mɛn lemɛninyara Isa ma, alu ma sɔn Yahudiyailu la namun tala ka a la ie ka lɔnin kan, ie ka mɛn sɔrɔn Isa la, ka a masɔrɔn Isa la karan ka woilu wasa.
Ka a masɔrɔn wo fɛ, Yahudiya lemɛninyamɔɔilu ma kuma kuɲɛ siya gbɛrɛ mɔɔilu fɛ, ka a masɔrɔn ɲinilu ma kɔjii kɛ. Yahudiya lemɛninyamɔɔilu ka a fɔ ko lemɛninyamɔɔ mɛn ma kɔjii kɛ ma kisiba bɛrɛ sɔrɔn. Pɔli ka a mɛn tuma mɛn ai le ye kuma wo fɔla, a ka ie sɔsɔ ka a fɔ ko ni an di kisi sɔrɔn Isa la saraka sababu la, an makɔ sa kɔjii la kɔsa an di kisi sɔrɔn. A ma a fɔ ko kɔjii kɛ a ma ɲi. A ka fɔ kɔ kɔjii kɛ ti an kisila; an ti se kisila sila si fɛ. Isa kelen pe la saraka le ri se wo kɛla.
Sɔsɔli la mɛn ye Yahudiya lemɛninyamɔɔilu ni siya gbɛrɛ lemɛninyamɔɔilu tɛma wo ri se hankili dila an ma. Sariya doilu ye dina rɔ an di se woilu bonyala, kɔni a ti se an kisila. Namun doilu ye ye an di se bilala namun sila woilu kan. An ti se jatela ikɔmi a diya bɔyani kɔ an di kisi sɔrɔn. A ka gbelen dooni ka bɛɛ ɲafɔ, kɔni Alla la kitabu sɛniman wo di se hankili dila an ma ka a ɲayen.
Kebi Pɔli ka bataki lawa Kalati lemɛninyamɔɔilu ma, a ri se an karanna ka bila lemɛninya a rɔ. Lemɛninyamɔɔilu la sariya fɔlɔ le kaninteya ri. Nin Sɛniman ye lemɛninya mɔɔilujusu rɔ, wo fanan ye sila yirakala ie la ka lɔ Alla ma. Wɔ le tɔnɔ ye a la, ni wo tɛ Setana ri bɔ fɛrɛ su bɛɛ la ka ai la lemɛninya tiɲan, ka ai lɔ sila gbɛrɛ ma mɛn ye kojuu sila ri. Alla ye an tanka wo ma. Amina!
1
Sɛbɛ ɲin farani nde Pɔli le la, nde mɛn ye keladen di. Mɔɔilu ma n suwandi baara wo kanma. Mɔɔ si ma n kelaya. Ɛɛn, n kɛra keladen de ri ka fara Isa Ɲenematɔmɔnin de la, a ni an Fa Alla mɛn ka a lawuli ka a bɔ saya rɔ. Nde ni an badenma mɛnilu bɛɛ ye n tɔrɔfɛ yan, an ye sɛbɛ ɲin nawala lemɛniyamɔɔilu la dɛkuruilu le ma, mɛnilu ye Kalati jamana rɔ. An Fa Alla a ni Maari Isa Ɲenematɔmɔnin ye ɲumaya kɛ ai yɛ, ka jususuma di ai ma. Isa Ɲenematɔmɔnin de ka a jɛrɛ kɛ saraka ri an na kojuuilu kosɔn, sa a ri an bɔ dunuɲa juu ɲin fanka kɔrɔ, baa an Fa Alla sawo tɛrɛ ye wo rɔ. A tɔɔ ye gbiliya kadawu. Amina!
Kibaro ɲuma kelen pe le ye ye
N da kabannakoya kojuuya ka a masɔrɔn Alla mɛn ka ai kili ka fara Ɲenematɔmɔnin na ɲumaya la, ai ra ai kɔdon wo la jona jona, ka wa kela gbɛrɛ kɔ. Kɔni kela gbɛrɛ tɛ wo ri de! Mɔɔ doilu le ye ai kɔndafilila ten. Alu ye a fɛ ka Ɲenematɔmɔnin na kibaro ɲuma yɛlɛman. Kɔni an ka kibaro ɲuma mɛn nase ai ma, ni fen fen ka kɛla gbɛrɛ lase ai ma, mɛn ni fɔlɔman wo tɛ kelen di, danka ye wo tii kan, hali ni a kɛra andeilu ri, wala sankolorɔ mɛlɛka do ri. An ka mɛn fɔ ai yɛ kɔrɔman, n di wo fɔ ikɔ ko ai sɔnda kibaro ɲuma mɛn ma, ni mɔɔ mɔɔ ka kela gbɛrɛ lase ai ma, mɛn ni fɔlɔman wo tɛ kelen di, danka ye wo tii kan kadawu!
10 A ye di? N ye a ɲininna ka n jɛrɛ diya mɔɔilu yɛ wa, wala Alla yɛ wa? N ye a ɲininna ka mɔɔilu hɛnɛ wa? Wo kuma tɛ! Ni n tɛrɛ ye a fɛ ka mɔɔilu hɛnɛ fɔlɔ, n tun tɛna kɛla Ɲenematɔmɔnin na baaraden di.
Alla ka Pɔli bila a la baara la ɲa mɛn ma
11 N badenmailu, n ye a fɛ ai ye a lɔn ko n ka kibaro ɲuma mɛn nase ai ma, wo ma fara mɔɔ la. 12 N ma a sɔrɔn mɔɔ si la. Mɔɔ ma n karan a la fanan. Kɔni Isa Ɲenematɔmɔnin jɛrɛ le ka a yiraka n na.
13 N tɛrɛ ye taamala Yahudiyailu la dina sila kan ɲa mɛn ma fɔlɔfɔlɔ, ai ra wo mɛn. N tɛrɛ ye Alla la jama tɔrɔla foo ka a dan natamin kojuuya. N tɛrɛ ye a ɲininna ka a ratiɲan fewu. 14 N jɛrɛ siya mɔɔilu tɛma, n tɛrɛ ye wala ɲɛfɛ Yahudiyailu la dina sila kan ka tamin n kanyaɲɔɔn ma fan ba kan, baa n benbailu la landailu tun ka gbɛlɛn n ma kosɛbɛ.
15 Kɔni ka a tɛrɛn n ma sɔrɔn fɔlɔ, Alla ka n suwandi ka n bila a dan na. A ka n kili ka fara a la ɲumaya la. A diyara a yɛ tuma mɛn na 16 ka a Dencɛ yiraka n na sa n di a la ko fɔ siya gbɛrɛ mɔɔilu yɛ, n ma hankili ɲinin mɔɔ si la. 17 N ma wa Jerusalɛmu ka hankili ɲinin keladen fɔlɔilu la. N wara Arabu jamana rɔ i kɔrɔ. Wo kɔ rɔ, n ka n kɔseyi ka wa Damasi so kɔndɔ.
18 San sawa taminni kɔ, n wara Jerusalɛmu, sa n ni Kefasi* Kefasi Simɔn Piyɛri, kɔnin. ri kuma an ɲɔɔn fɛ. N ka tele tan ni loolu kɛ a tɔrɔfɛ. 19 Kɔni n ɲa ma la keladen tɔilu si kan, fo Maari Isa doocɛ Yakuba.
20 Nde ye mɛn sɛbɛla ka a di ai ma, wuya tɛ wo ri. N ye wo lasereyala Alla ɲana. 21 Wo kɔ rɔ, n wara Siri ni Silisi jamanailu rɔ.
22 Kɔni lemɛniyamɔɔilu la dɛkuru mɛnilu sidini Ɲenematɔmɔnin ma Jude mara rɔ, woilu tun ma nde yen, alu tun ma n lɔn. 23 Alu ka a mɛn ten de dɔrɔn ko: «Mɛn tɛrɛ ye an tɔrɔla fɔlɔfɔlɔ, wo ye lemɛniya ko lasela mɔɔilu ma sisen, a tɛrɛ ye a ɲininna ka lemɛniya ko mɛn tiɲan fɔlɔfɔlɔ.» 24 Wo kɛra sababu ri alu ka Alla tando nde la ko kosɔn.

*1:18 Kefasi Simɔn Piyɛri, kɔnin.