2 Samuel
1
David quicajqui para mijqui Saúl
1 Quema ya mictoya Saúl, David mocuetqui ipan ialtepe Siclag pampa ya tantoya quintzontamiltía nopa amalecitame huan nopona mocajqui ome tonati. 2 Huan ipan ne seyoc tonali, ajsico se tacat cati quisqui ten campa isoldados Saúl. Yaya quihualicayaya iyoyo tzayantoc huan motalilijtoya taltepocti ipan itzonteco pampa quipiyayaya hueyi tequipacholi. Huan quema ajsico campa David mohuijtzonqui ica miyac tatepanitacayot. 3 Huajca David quitatzintoquili nopa tacat:
―¿Canque tihuala?
―Na nicholojtejqui campa toisraelita masehualhua tatehuíaj ―tananquili nopa tacat.
4 Huan David quiilhui:
―Techilhui taya panotoc ipan nopa tatehuilisti.
Huan nopa tacat quinanquili:
―Miyac toisraelita soldados mictoque huan miyac cholojtejtoque. Huan nojquiya mijqui Saúl huan icone, Jonatán.
5 Huan David quitatzintoquili:
―Huan ¿quenicatza tijmatqui para mijqui Saúl huan icone?
6 Huajca quinanquili:
―Na niitztoya ipan tepet Gilboa huan nopona niquitac para Saúl motatzquilijtoya ipan icuachoso. Huan monechcahuiyayaj icualancaitacahua ipan tatehuijca carros. Nojquiya hualayayaj miyaqui tacame ipan cahuayojme. 7 Huan ipan nopa talojtzi Saúl techitac huan technotzqui. Huajca nimonechcahui campa itztoya. 8 Huan yaya techtatzintoquili ajquiya na huan niquilhui para nieliyaya se niamalecita tacat. 9 Huajca techilhui: ‘Xihuala huan techmicti pampa tahuel nitaijyohuía, huan noja niyoltoc.’ 10 Huajca nimonechcahui huan nijmicti pampa niquitac para ayecmo huelis itztos pampa tahuel cocojtoya. Huan nijcuili icorona cati quipixtoya ipan itzonteco huan nopa costi cati quipixtoya ipan imax huan nimitzhualiquilía ta.
11 Huan quema quicajqui nochi cati quiijto, David huan nopa tacame cati itztoyaj ihuaya quitzayanque iniyoyo pampa tahuel mocuesojque. 12 Huan pejque quichoquilíaj Saúl huan itelpoca Jonatán, huan nopa isoldados TOTECO huan nochi sequinoc israelitame, pampa tahuel miyac tacame mictoyaj ipan tatehuilisti ipan nopa tonali. Huan mosajqui David huan itequipanojcahua, huan amo teno quicuajque hasta tayohua. 13 Huan David quiilhui nopa tacat:
―¿Canque tiehua?
Huan quinanquili:
―Na niseyoc tali ejquet, niamalecita.
14 Huan David quiilhui:
―Huajca ¿para ten amo timajmajqui timomatananqui huan tijmicti Saúl cati TOTECO quitapejpenijtoya huan quitequitalijtoya?
15-16 Huajca David nimantzi quinotzqui se soldado huan quiilhui:
―Xijmicti ni tacat.
Huan David quiilhui nopa tacat:
―Timiquis pampa ta ica moseli tiquijto para tijmicti Saúl, nopa tacat cati TOTECO quitapejpenijtoya para elis tanahuatijquet.
Huan isoldado hualajqui huan quimicti ica icuachoso.
David quinchoquili Saúl huan Jonatán
17 Huan David quisencajqui se huicat huan huicac ten Saúl huan icone, Jonatán, cati mictoyaj. 18 Huan tanahuati ma quinmachtica nopa soldados cati ehuani ipan tali Judá. Huan ni huicat nojquiya mopantía ijcuilijtoc ipan nopa ama tajcuiloli cati itoca Jaser. Huan quej ni quiijtohua:
19 “Noisraelita icnihua, nopa tacat cati más yejyectzi tijpixque, mictoc.
Yaya cati achi más techmacayaya paquilisti quimictijtoque nepa huejcapa campa tepeme.
Quena, yaya cati más tetic huetztoc.
20 Amo xiquinilhuica tocualancaitacahua cati itztoque ipan altepet Gat.
Yon amo xiquinpohuilica cati itztoque ipan tianquis ipan altepet Ascalón,
para amo techhuetzquilise nopa filisteo sihuame.
Amo tijnequij ma techpinajtica nopa sihuame cati amo quineltocaj TOTECO.
21 Saúl mijqui ipan tepet Gilboa.
Huajca amo quema ma taquiyahui nopona.
Yon amo quema ma onca ajhuechti.
Ma ayecmo taelilti pampa nopona mijqui cati motemacac.
Nopona mijqui Saúl quej se ten hueli tacat,
quej elisquía amo ya cati quitapejpeni Toteco.
22 Saúl huan Jonatán nochipa tataniyayaj ipan tatehuilisti.
Inijuanti quinmictiyayaj inincualancaitacahua,
masque tahuel motemacayayaj.
Amo quema mocuetque ipan se tatehuilisti san ica inimax,
pampa nochipa tataniyayaj.
23 Nochi tojuanti tiquinicneliyayaj huan tahuel tiquinnequiyayaj.
Nelía se paquilisti para tiquinixmatque.
San sejco nemiyayaj quema itztoyaj huan nojquiya san sejco mocajque ipan miquilisti.
Achi más chicahuac huelque motalojque que ne hueyi cuatojti cati hueli patani.
Elque más tetique inijuanti que se león.
24 Anisraelita sihuame, xijchoquilica Saúl cati yejyectzi amechyoyontiyaya ica yoyomit cati morado quej motalilíaj sihua tanahuatiani.
Quena, Saúl quiyejyecchijqui amoyoyo ica oro,
huajca xijchoquilica.
25 Yaya cati motemacac ya mictoc ipan tatehuilisti.
Mijqui Jonatán ipan ne tepet Gilboa.
26 Nimitzchoquilía noicni, Jonatán,
pampa tahuel nimitzicneli.
Huan techicneli miyac nojquiya hasta motaicnelil quitani inintaicnelil sihuame.
27 Mictoque cati más motemacayayaj.
Ayecmo quinemiltíaj inintepos pampa ya mictoque.”
Quej nopa elqui nopa huicat cati David quisencajqui para quichoquilis Saúl huan Jonatán.