Balua ja Paulo kwa
Filemoni
Kitabu chenje kichoko cha Filemoni kiandikigwa na ndundame Paulo (Lipungu lya 1:1). Iwechakine Paulo pakiba mukipungo ku Loma, yene anda akiba ku Loma penia mmanya balua jenje jiandikigwa chaka cha 61 kuboka pukubelekwa Kilisto, nga chaka ucho pikiandikigwa kitabu cha Kolosai.
Paulo anhwandakila balua jenje mundu jumwe jwakemigwa Filemoni. Ojwakiba jumwe kati ja bandu abunhwamini Kilisto na akiba na akabanda bakwe. Paulo anhwandakila kupala kunnyopa akunhwukumuje mmanda jwakwe jwakemigwa Onesimo jwakatila kuboka ku Filemoni. Kengama malagilo ga Loma Filemoni akiba nuwecho gu kunhukumu Onesimo akomigwe. Paulo ngampembela Filemoni kupala annyeketele Onesimo ammone andi nnongo mukulondana na Kilisto kabe annyopa Filemoni annekekeye Onesimo kupala abegelele pamwe na Paulo (Lipungu lya 1:13-14).
Agabi mukitabu
Paulo ampata abali Filemoni, lipungu lya 1:1-3.
Kabe Paulo annyopa Filemoni ampokele Onesimo andi nnongo mu Kilisto (Lipungu lya 1:4-21).
Paulo ajomole kukutangacha mawacho gakwe ga katyangila na kapata abali (Lipungu lya 1:22-25).
1
Ne Napaulo, ndabigwe magambu ga kummegele Kilisto Yesu. Nenga pamwe na nnongo gwito Timoteo.
Tunhwandaki mwe maganja bito mana Filemoni, makamwa maengo majito, na bandu abunhwamini Kilisto abakongana kachinu na ku nnombo gwito Afia nu ku lityala nnyito Alikipo.
Nnoongo Awabito mampegange tengela nu upeele na Angwana bito ana Yesu Kilisto.
Lipalano na imani ja Filemoni
Kila kingobu pang'ongalela, nankombake mwe ma Filemoni nu kunnumba Nnoongo, gambu nyoine pamaamini Angwana bito ana Yesu na pamapala bandu ba Nnoongo boa. Nannyope ku Nnoongo mme na makakala gakalenge bandu bange imani inu kupala bamanye kipola gwambone gutubi nago twenga tatulondine na Kilisto. Malongo bango, lipalano linu linhalali muno na limbi mwojo! Mwenga mijikalamwie myojo ja bandu ba Nnoongo.
Paulo annyopa Filimoni ampokele Onesimo
Kwa magambu genia, ne nalongo binu kukulondana na Kilisto, kabi nhotwi kunhwamulu panga jogopa nkamule champaligwa kamula, nambu magambu nde mpala, mbaya nannyope. Ndenda yene iganukube ne Paulo ng'oime na ngoe ne mbi napungwa kwa magambu ga kummegele Yesu Kilisto. 10 Nannyopa mannyangate Onesimo jwenio ngoe manango kukunhwamini kwakwe Kilisto ne mbi na awamundu panakiba mikipungo. 11 Pukutumbula akiba kile chamboneje kwinu nambu ngoe kile chambone kwango uyo na kwinu.
12 Ngoe nammuya kabele kwinu, jwombe mbi kumpala muno. 13 Kabimbai atame nanenga anyangate pampala kunyangata mwe kiti mbi pamba mukipungo magambu gu kutangacha Nhwalo Gwambone. 14 Nambu mbaije kunnachimicha unyangate, nambu mbala ntendi pampala mmene yene ngamuje chachoa mpaka nnyeketele.
15 Pangaje Onesimo ngaboka kwinu kukingobu kichoko tu, kupala abuje kabena ntame nakwe machoba goa pangapela. 16 Jwenio mmanda kabeje, nambu kupeta mmanda, jwenio ngoe nga nnongo gwito mukulondana na Kilisto. Ambala nenga na ampala mwenga chenge muno, gambu jwenio andi mmanda na andi nnongo mukulondana na Angwana.
17 Bai, anda umona ne kube nalongo binu, kwa Angwana, mampoke Onesimo andi umboke nenga. 18 Anda akiba annemwite kilebe, andaje akiba na ligambo kwinu, nannepa nenga. 19 Ne Paulo andika namwene ku lukobo lwango, manannepage! Mbaije kunkombake kutenda nkweti ligambo lya bwomi kwango. 20 Elo, malongo bango, undende yene kukunyangata nenga ka magambu ga Angwana, ngoe mwe malongo bango mukulondana na Kilisto muwalali mwojo gwango.
21 Nunhwamine magambu nunhwandaki ganga, manyi mankamula kupeta genia ganannengile. 22 Pamwe na genia, umbangi chumbi chukutama gambu nhyobale Nnoongo majanga kujopa kwinu nu kumbanga kwinu.
Kupata abali kukujomolela
23 Epafulo, mpungwa nnyango kwa magambu gukummegele Kilisto Yesu, ampata abali. 24 Maluko na Alistako na Dema na Luka, akakamwa maengo ajango, uyo bampatanga abali.
25 Nnoongo ampegange upeele kuboka ka Angwana bito ana Yesu Kilisto ube pamwe na mangweto mumyojo jinu.