EL APOCALIPSIS
Juan khãitarr
Juanau mʉg ich khãitarr õrag jawaag phãawai ya jöoiraa khitajim aajem. Ich mag jaar ĩchab Jesús igar ʉ̈kha durrum khʉʉn oomaaugau õrau am ẽudeejã ẽkhanaa, cárcel deg pʉ̈inaa wajappha dau aug waupiejeejim aajem. Ẽwandamau oowai mag ich chaain wajap dau aug wau durrum oobaawaita jöoi Juan khãaipi aujim anaabá, mag khãaipi athamua nem thum thʉnʉmʉn ichdëuta khap aajeewai mag ich chaain dau aphʉʉ api nʉm khʉʉn dʉ̈ijã ichdëu khap aju jawaag.
Magta chadcha Juanau Ẽwandamau ich khãaipinaa ichig oopitarr thumaa phãjim aajem, chi ʉ̈kha durrum khʉʉndam warag khĩir onee amkhĩir; mag nʉm dʉ̈i ĩchab ich Cristojã ũwaai deeu bëewi õor ich dau na khaigba aajerr khʉʉn thum theernaa isegju khap amkhĩir. Juanaun ich paarmua ya chi ʉ̈kha durrum khʉʉnag Cristoou magju khap apinaa, mʉg jẽb gaai phithurg au wënʉrrawiajã, warag magʉmjã igba Cristo dʉ̈ita ogdʉba ubʉ wënʉrrapim khõchgauta mʉg ẽsap phãjim aajem.
Juanau ichdëu nem oomatarr ĩgkhamam ũurwai, chadcha maach dauderraa aju aai sim, dichdëuta ootarr akhiin. Pari maagwai chi ʉ̈kha narr khʉʉnau khaphʉ naajim anaabá, Ẽwandamau mʉg durr khaigba aju jaau sim. Juanau ich daúachata oojim aajem, Ẽwandamau mʉg durr i agkhabarm ed jãga irua õor gaai jua khʉaba deeju. Ẽwandamau magta irig nem khĩir pogkhe oopimajim anaabá, thum ichdëu ootarrjöo jaaumamkhĩir. Pari chi Ẽwandam iek ʉ̈khaba nʉm khʉʉnau chan par Juanau mag ichdëu ootarrjö wajapha ẽsap gaai phãtarr thʉ̈ʉrjerrjã khaugba aajeejim anaabá.
Ya ĩs ewag paawai Juan khãitarr igwia õrau amach khĩirjugpierr jaaujem. Pari Ẽwandamau thumaam khʉʉnag ʉ̈rcha khaphʉ apim khõsi simʉn mʉgau: Mʉg nʉʉ awia dëgölp Ẽwandamau Jesucristo dʉ̈imua amach kha ukhur arr khʉʉn thum warre sĩi ichdëuta pödpʉ̈iwia ichta ʉ̈rpai sĩsiju. Mag edan chi mepeerpata Ẽwandamau sĩi eeg bʉ̈ʉu bichthʉgbaadëmjöta aju anaabá. Pari magtarr khur ar i iek ʉ̈khawia ogdʉba ich mag durrarr khʉʉnan ich dʉ̈i ich mag wënʉrramkhĩir, ʉ̈gthar phë arrwia ich mag ich dʉ̈i phë wai sĩsiju aajem.
1
1 Mʉʉn Juanau, Jesucristo chog. Muata pãrag mʉchdëu ootarr jaaum ig chirʉm. Mʉg mua jawaagpam iekhan ich Ẽwandamaucha Jesucristoog jaautarrau. Mag ichig jaaubaawaita mʉ khãaipi auwi mʉrʉg jaaujim, jũrr mua ich iek ʉ̈kha durrum khʉʉnag jaaumkhĩir. Mʉg iek thum ich jaaubarmjö chadcha jöpcha aju khap amkhĩir, Jesucristoou ich chog ãb ʉ̈gthar ich dʉ̈i sĩejemʉgta jaaujim, mag mʉ khãaipi atham ee jũrr magua mʉrʉg jaaumkhĩir. 2 Magbaawaita Ẽwandamau Jesucristo dʉ̈imua mʉchig oopinaa mʉchig ũrpitarrpa thumaa phã chirʉm. 3 Chi mʉg mua phãbarm ẽsap thʉ̈r sim woun onee aju; maimua onee ajurau ĩchab mʉg ich iek phã sim gaai Ẽwandamau nem thum ichdëu jaau sim iek ãbmua thʉ̈rmam ũrwia ag gaai jaau simjö i ipierraa wënʉrrʉm khʉʉn. Ya chadcha thum mʉg ẽsap gaai ichdëu jaau simjö öbëbërg maju dakkha pamam.
Phöbör siete narr ee iglesiapierr Juanau ẽsap phãnaa aaidʉtarr
4-5 Mʉʉn Juanau. Muata mʉg ẽsap phã deepʉ̈i chirʉm Asia durr phöbör siete nʉm ee Ẽwandam iek ʉ̈kha nʉm khʉʉnag. Mua pãar kõit jëeu chirʉm, ichta warrgarwe ich mag sĩerranaa mʉg atagjã ich mag sĩerraju igwia, ich khu juupjem khĩirphee ich Ẽwandam Akhaar sĩerrʉm igwia, maimua Jesucristo chadam iek chaarcha jaauchëtarr igwiajã jëeu chirʉm, pãar dau ee aug khaug paraanaa pãar ʉ̈u wai nʉm dʉ̈i ĩchab pãar khõinaa wai wënʉrramkhĩir. Mag Cristota meeba arrjö nacha iiu phiidʉwia mʉg reinaan thʉnʉm khãaijã iek theeg ʉ̈rcha sĩerrʉm. Ich ag Cristota maach daupigau ʉdʉraa ich thõopijim. Magbarmua maach khaibag chugpaapʉ̈iwia 6 ich Aai anaa ich Ẽwandam athee maachta phadnaankha aujim, ich dʉ̈i agdaujö iek thethe wënʉrramkhĩir. Irigta ãba thumaam khʉʉnau, “Ich appaita ãba Ẽwandam chaarkha sĩerrʉm” a iekhanaa, “Ichdëupaita warrgarwejã nem thum khaphʉnaa mʉg atagjã khaphʉ sĩerraju; maata maach Ẽwandamau” a thö iekhaju aai nʉm.
7 Cristo, Ẽwandam Iewaa, edjã baug ee urum thumaam khʉʉnau amach daúa ooju, i thõotarr khʉʉnaupa.
Magbaawai durrpierram khʉʉnau amach daujã merag phëwi, jũrr amach gaai mas aju khap, i ökgau icharaucha bĩejurau.
Magju anʉm chan sëukhaawai khabam.
8 Ich Ẽwandamauta ich igwia, “Mʉchpaita nacharam ẽsapdau Ajönaa chi ãbmiecharam Zetajö chitʉm” a iekhaajem, ich warrgarwejã ich mag sĩerrawi mʉg atagjã ich mag sĩerraju Jöoirau. Ichdëu mag sim aawai oob khĩirjumiet. Ichta Ẽwandamau, thumaam khʉʉn Pör; i athee chan phithurm nem chukhum.
Khãaipi athamua maach Pör Jesucristo ootarr
9 Mʉʉn pãach khod ar Jesús iek gaaimua pãachjö phithurg au pʉʉrba khitaajemuata pãrag mʉg ẽsap phã deepʉ̈i chirʉm. Mag phithurg aaujeeb mamʉ, ich Jesucristoouta magʉm ãwataagjã juapá deejeewai, magʉmjã igba, phithurg jẽedʉ khitʉmua i aar barwi i khĩir wajaug oo wai chitaju. Ẽwandam iek jaau chitʉm dʉ̈i Jesuu nem wau nʉrrarr mʉch daúacha oojerrta jaau chitʉm gaaimua, mau döjãrr phʉram Patmos anʉm gaai preso chirʉm. 10 Mag mʉ preso chirʉmta biek ãb domighed ich Ẽwandam Akhaarta mʉ gaai phẽs aicheewai, mʉ dau eerthʉg athamjö abarm ee, trompeta iekjöta nem jẽbag mʉ ëugarmua mʉrʉg iekhachëwia, 11 “Nau mua pʉchig nem oopibarm thumaa ẽsap gaai phãnaa Asia durr phöbör siete nʉm ee mʉ iek ʉ̈kha nʉm khʉʉn aar deebapʉ̈i” ajim: “Efesopienag, Esmirnapienag, Pérgamopienag, Tiatirapienag, Sardipienag, Filadelfiapienag maimua Laodiceapienagjã agjö.”
12 Mʉchig mag iekhabaichëm khap aag awi mua ewag phʉʉrbanaa oowai, lámpara bʉ̈ ausĩiujemta phĩr dën phurii khithëem ãbam aig siete nʉm oojim. 13 Maimua mag lámpara siete nʉm jãrr mua oowai, woun ãb ich Jöoi Iewaa Jesujöö simta ichkhaarjã araa correerjö phĩr dën phuu khitʉmua ãi jʉ̈naa khajũa bʉ̈ duurga khĩeb bʉ̈ khãdau aar jũa dʉnʉm oojim. 14 Mag simʉn khĩirjug khaauga sĩerraawai sĩi lanjöta pördam bäpphä khitajim, ich khĩirjug khaugau. Maagwai ich daúapai nem thum khaphʉ aajeewai, i dau oowain sĩi õtdaujöta uujẽer uujẽer uujẽer sĩsid ajim. 15 I bʉ̈, sĩi nem inag õtdau ee bʉ̈ʉupinaa wau simjö nem theega sĩejim, broncejö. Mag nem theeg sĩewai sĩi uhbʉ oodʉnaajim, bʉ̈ʉrjã burrju khaba. Mag i bʉ̈ broncejö sĩewai sĩi phuu khitajim. Mag sim iekha sim ũurwai, ichta thumaam khʉʉn khãai iek theeg sĩerraawai, sĩi phũasdau dapagta dö igaau jurrdʉbaichëm iekjö sĩejim, i iek. 16 Mag simua ich juachaar gar phĩdag siete wai dʉnaajim; ich i ee espaar khẽu mii khitʉm phõpá garm magwe dëe khitʉmjã wai sĩejim, agua ich oomapham khʉʉnag bʉ̈ʉrjã ich jua jʉmpiba aag. Maimua i khĩir oowain sĩi edau pechagkham ee nem phuum oo nʉmjöta maach dau përpërmjö sĩejim, pöd i dʉ̈i khĩircha eerpaju khaba.
Magta mʉrʉg mʉch daúacha maach Pör Jesucristoou ich oopijim.
17 Mag oobarmʉn mʉʉn sĩi chi meemjöta thʉbëpjã chukhu i bʉ̈khʉrr buju aimajim. Mamʉ magbaawai ichdëu mʉ gaai pʉrnaa, “Oob jãphierram” ajim. “Mʉchta nem thum ompaaju nawe chirajim; mʉg durr thum öwiajã mʉchta ich mag chirsiju khabahab” ajim mʉrʉg. 18 “Mʉchpai khabahab” ajim, “ar meewi deeu iiu phiidʉtarr; magtarr cha agtha iiu chirʉm, mʉg atagjã ich mag iiu chitʉm iekhau. Mʉchdëuta khap chirʉmgui” ajim, “jãagwaichata õor meepiju, maimua mag meewaijã chijã khʉʉnta khĩmie durr wëtju” a iekhamajim mʉrʉg. 19 Maimua mʉrʉg, “Cha pʉchdëu nem oobarm dʉ̈i nau pʉchig oopibarmpa ẽsap gaai thumaa phã sĩubá” ajim, “mʉʉgwai nem in thʉnʉm, maimua mʉgtarr khurjã nem öbëbërg maju thum phã sĩubá” ajim. 20 Maimua mʉrʉg, “¿Pua khaphʉ chirʉ́” ajim “khani jaau sĩ ar mua mʉch juachaar gar phĩdag siete wai chirarr, maimua lámpara ausĩiujemjã phĩr dën siete wai chirarr?” Magnaa ichdëupai, “Ar phĩdag siete narr, jã mag siete iglesia nʉm ee agjö pastornaan siete nʉm khʉʉnta jaau simgui” ajim. “Maagwai mag chi lámpara ausĩiujem agjö siete narr, jãkhʉʉn Asia durr mag iglesia siete nʉmta jaau simgui” a jaaujim mʉrʉg ich Cristooucha.