Nzryr-krbz Pol Kx Ayrnrngr Mz Lr Korint
Natq Ngr Nzaplxtqngr Mz Nzryr-krbz Pol Kx Ayrnrngr Mz Lr Korint
Aposol Pol nide ncblo kx ryapwxtipx-kai Nrpakxmrlz Korint, mz nzvzpx-krde krali, x dzbe lrmakxtr lc vzpxm mz nzwz-krde. ✡ Aposol 18:1-8 Mz taon lc, tu elr madrka' nzkqlung. Lr Korint nzrmnq-zlwzng x nzrmwimi-abeaneng leplz kx trngiu krnalzdrng. Mzli kc tzrlxngiti-ate-ngrdr, nqmq nr drtwrdr apubele kxnzmnc-mrbrng. Lr Korint kxnzrlxngiting nzkqlung kxtrngiulrJiu, kx trpnzngr scdr da, x kxnzawz-nrbalqng. A' kx nznginidr bcnyr nzpipzng. Nzaki-lzbqng murde kxnznginidr bcnyrng nzobqszolr kztedrng kx trpnzngr scdr da. Kzdung kxnzrlxngiting lcng nzrmwiming kxtrngiu krnalzdr. X nzglqpx-lzbqng mz zmatq ngr nzwzngr kc tqkabz Mqngrkxtr badr, myapxbz zmatq ngr nzycmne-ngrbz mz Gct mz natq lr mrkzbleng. Mz drtwrdr nidr leplz kxnzyrplapxng x kxnzbrpeng mz nzvz-nqblq-krdr Jiszs. A' trtingr.
Pol yr-kaipzle kc letz mz lrmakxtr mrkc Korint mzli kc, x letz lc kc ate. Mz letz kc kai, pnanatile nidr mz nqmq krdr kxtrka. Zbz mzli kc tqmnc-ngrde mz taon Efiszs, ncblo nztqng nztwzbzlr bade kc letz kx nzatwzlr-ngrbz lr Korint. X mz letz lc nzayzlu-ngrbzlr natqdeng. Trkrlzkuu nike tqyrle mz letz kc kai. A' opx angidr kx lr Korint nzpxtxpx-ngrdr natq Pol x nzbatrpzlr mz leplz nzyrlqpx-lzbq-krdr mz zmatq ngr nzngini-krde aposol. Zbz Pol sc tqayzlu-mopwzle natqdr mz letz lc, tqyrle mz mzlir yiz 54—55 AD mz nibr nzrmcngr mz Jiszs, mz nzvzpx-krde kratq.
Kxmule-esz' yrbzle letz kc kai, a' lr Korint kxnzrlxngiting kxnzkqlung nzvz-nqblqbelr nqmq nr drtwr lr Grik kxnzmnc-mrbrng. Mz drtwrdr, dalr nrlc trmyapxpwzu, a' dalr nqmq kxtr kx myapx-zlwzbz. Mz nzmu-krde lcde, mrlzbz badr nzrmwimi-krdr kx trngiu krnalzdrng, murde nrkrdrtq ncblo ngi dalr nrlc ka. X drtwr lc batrpzle badr nzvz-rbr-krdr mz nzyrlzngr x mz nztulzkr nrkrdrtq mz nzbzngr. X mou, mz drtwrdr Pol trnginideu aposol, murde trycmne-aboipwzu badr mz natq kx rblx, a' natqdeng opx angidr. X Pol wz mz nzrtwz-krde trau, x takitrde kxetu nzbatr-krbzle mz leplz nzrka-krbzlr da bade. Mz drtwrdr nzryapwx-krbz Pol badr takitrde kxnzrlxngiti-ateng, x trtakitrpedeu nidr murde nzrlxngiti-krdr brpe. A' Apolos, kc tqalvztrle nidr mz nibr Pol, mz drtwrdr vz-nqblqle nqmq kr kxetu mz da lcdeng, x nzvecpx-lzbqmqng mz Pol, mz nzvz-nqblq-krdr Apolos. Mz letz lc, Pol atubqtibzle drtwrdr lcng tqvz-rbr, mz natqdeng kxpq zlwz.
Mrkcng Mz Letz Lc
Lr Makxtr nzaki-lzbqng. [1:10-17; dckrlzde 3]
Mz drtwr kzdung leplz nzyrplapxkr Gct ngi dalr nzngqngungr. [1:18—2:16]
Kxnamu nzmnckr Aposol badr lrmakxtr. [dckrlzde 4]
Lr Korint na-ayrplapxlr kxnzrlxngiting kcng tzapulr kxtrnzrlxngitiung. [dckrlzde 5]
Bzkq kxrlxngiti twzle kztede kxrlxngiti mz kot. [6:1-11]
Nrkrdrtq kxnzrlxngiting sc Gct. [6:12-20]
Kxnamu nzyrlzngr kxtubq. [dckrlzde 7]
Kxnzrlxngiting bzkq nzmung dakxnzng kx nzkabz mz drka'. [dckrlzde 8]
Aposol Pol nzaotikr drtwrde le kztedeng nzmyaszpxlr nide. [dckrlzde 9]
Kxnzmung mz madrka' nzangiolr kxtrngiu Gct angidr. [10:1—11:1]
Nqmq kx takitrde olvz ngr lrmakxtr. [11:2-16]
Kzdung da nzakipxlr kxnzrlxngiting mz Nzmungrkxtr. [11:17-34]
Mqngrkxtr kabzle zmatq kxmyapxbzng mz kxnzrlxngiting. [12—14]
Jiszs tulz-mop mz nzbzngr mz nrkrdrtqde angidr. [dckrlzde 15]
Nzatakqtilr trau mz nzwzkr lrmakxtr x kzdung kz natq mou. [dckrlzde 16]
1
1-2 Ninge Pol kc tqkqle Jiszs Kxnzmcpx mz nzngini-krnge aposol nede, mz nzvz-nqblq-krde me pnz drtwr Gct. Nigr ncdr mzlegu Sostenes rpibzkr bamu kx, “Nimu la!” Ryrbo bamu, nimu dzbe lr makxtr ne Gct mrkc mz taon kxetu Korint. Gct kqlele nimu amrlx mz nzngini-krmu leplz kxtr nedeng kx nawztrpzng bade mz nzaxvctr-krbzmu mz Mevalu Jiszs, da kc tqwai-kzle mz kxnzrlxngiting amrlx mrkcng kqlu tzangiolr Kxetu rgu Jiszs. 3 Krka'-ngrne kx Trtegu Gct x Kxetu rgu Jiszs nakabzlr bamu zmrlz ngrdr kxmyalz x nzmnc-zpwxngr.
4 Awi-zvzbo mz Gct, murde kabzle bamu zmrlz ngrde kxmyalz mz nzaxvctr-krbzmu mz Mevalu Jiszs. 5 X mz nzaxvctr-krbzmu lc mz Kraes, dekc tqrngisc-ngrnamu zmatq kxmyapxbzng mz nzwztr-krbzmu mz Gct mz nzrkrlz-krmu nzalvztrngr angidr, x mz nzpipx-krmu natq Gct. 6 X nzrngisc-krmu zmatq lcng atutrle natqnge mz nzpipx-krbo bamu da kx na-alebz Kraes bamu. 7 Dekc mz nzodutr-lxblr-krmu, tqkao-ngrbz Gct zmatq amrlx kcng tqtakitrde nzale-krmu nzwz-krde, mzli ka tqobqtipx-ngrnamu nzyzlu-krm Kxetu rgu Jiszs Kxnzmcpx. 8 X Kraes sa naokatrle nimu mz nztu-amqngi-krmu mz nzrlxngiti-krmu nakrlzbzle nzbz-krmu o nzyzlu-krmle, murde natubqamu mz nzobq-krde mz Mzli kx tqmatq na-ayzlu-ngrbz Gct da mz leplz. 9 Gct sa na-angidatibzle da lcng bamu, murde yrlq-zvzle natq ngr nzesalz-krdeng. X sc tqkqlele nimu mz nzprtr-krmu mz nzodutr-krbzmu mz Mrlxde, Kxetu rgu, Jiszs Kxnzmcpx.
Lr Makxtr Nzaki-lzbqng
10 Mzlengeng x inwengeng, mz zmatq ngr Kxetu rgu Jiszs Kxnzmcpx, rngidrlvz-ngrbo bamu mz natqnge kx xplr kx naesakitxpe nzotablr-krmu. A' drtwrmu naesz'ti murde ma tqakipx-lzbqamu. 11 Mzlengeng x inwengeng, xlrx kx otablramu, murde kzdung leplz ngr ma nyz Klowi nzvzmqng x nzpimlr bange nrpa lc. 12 Xlrx kx kzdung nimu nzrpilr kx, “Ninge vz-nqblqx Pol.” X kzdung nzrpilr kx, “Vz-nqblqx Apolos,” x kzdu-kzng “Vz-nqblqx Pita.” X kzdu-moung nzrpilr kx, “Vz-nqblqx Kraes.” 13 A' vz-rbramu. Murde nigu amrlx nzaxvctrpzku mz Jiszs, x trpnzngr kx na-akipxle Kraes mz dzbede kxkqlu. Kzdung nimu nzrpilr kx nzvz-nqblqlr ninge. ?A' myx kxmule, ninge kc tqbzom mz kros mz nzarlapx-krnge nimu? ?X nzawrkxtrmu mz drtqnge? 14 Trtingr! A' awitx-zlwzbo mz Gct kx trawrkxtrwxu nimu. A' awrkxtrtxpo Krispzs x Gaizs. 15 Dekc, trpnzngr kx narpile kx wrkxtr mz drtqnge mz nzngini-krde oblamznge. 16 (Eu, a' sc tqdcpxpe mz drtwrnge kx awrkxtr-kzx Stifanas badr lr ma nyzde. A' trpnzngr kx dcpx kz mz drtwrnge kx awrkxtrx.) 17 Trawrkxtrwxu leplz kxkqlu murde Kraes atwzlr-ngrmle ninge mz nzpipx-krnge Nrpakxmrlz. X mz nzpipx-krngele, trapuwxu ncblo kx rkrlz-angidr x aetu-lzbq mz nzycmne-krde. A' yrlqkixle me mrlzkibzle nzxlrkr leplz le, murde nayrplatitr angidr nardr. Murde ma tqrpwa'-ngrne zmatq ngr Nrpa ngr Kraes nzbzo-krmle mz kros mz nzarlapx-krde leplz.
Mz Drtwr Kzdung Leplz Nzyrplapxkr Gct Ngi Dalr Nzngqngungr
18 Mz drtwr leplz kcng tzo-zlilr lrpzki r Hxl, nrpa ngr nzbzo-krm Jiszs nidr mz kros ngi dalr nzngqngungr. A' mz drtwrgu, nigu kcng tzo-zlilr lrpzki r Heven, nrpa lc aelwapx-ngrmle bagu kxnamu nzarlapxngr nigu mz zmatq ngr Gct. 19 Murde natq Gct rpile kx, “Sa naodatix nzyrplapxkr kxnzyrplapxng, x sa nakatxpxbo nzrkrlzkr kxnzalvztrng.” ✡ Asaea 29:14 20 Gct aovxiole nzrkrlzkr lr nrlc. Murde trpnzngr kxrlapx mz nzrkrlz-krde, o mz nzalvztr-krde mz Lou sc Mosis, o mz nzycmne-angidr-krde. A' leplz amrlx nzrlapxng mz nzbzo-krm Jiszs mz kros.
21 Murde Gct yrplapx-esz'ngr x yrlqle drtwr kx trpnzngr kx nakrlzle nide mz nzyrplapx-krde esz'-krde. A' abrtzlvzle nzarlapx-krde leplz kcng tzlxngitilr nrpa kc tqyapwxtipxkr nigr aposol, kxmule-esz' mz nzobqkr leplz kxkqlu nrpa lc ngi dalr nzngqngungr. 22 Murde lr Jiu nzrlxngiting mz nzrmc-krdr rkx kxmatq. X kxtrngiulrJiu nzrlxngiting mz nzxlr-krdr da kx vz-nqblqle nzyrplapx-krdr. 23 A' trvz-nqblqkru drtwr lr Jiu o kxtrngiulrJiu lcng. Murde yapwxtipxkr nzbzo-krm Kraes mz kros mz nzarlapx-krde leplz. A' mz drtwr lr Jiu nrpa lc trngiu da kxmatq-esz'ngr x mz drtwr kxtrngiulrJiu ngi dalr nzngqngungr, x nzpxtxpx-ngrdr rlilrdr. 24 A' nigu kcng tqkqleng Gct, kxmule-esz' lr Jiu o kxtrngiulrJiu, glxku kx Kraes nide zmatq ngr Gct mz nzarlapx-krde nigu x ni-kzde nou drtwr kxyrplapx kx yrlq Gct mz nzarlapx-krde leplz. 25 Kxmule-esz' nrpa ngr nzatwzlro-krm Gct Mrlxde mz nzbzo-krmle mz kros ngi dalr nzngqngungr mz nzobqkr kzdung leplz, a' nzyrplapxkr drtwr lc tqyrlq Gct myaszpx-zlwzle nzyrplapxngr amrlx sc leplz. X kxmule-esz' mz drtwr kzdung leplz Gct trpnzngr scde zmatq murde tr-rpwa'-ngrpwzleu nzrnibqngr Mrlxde, a' zmatq ngr Kraes mz nzbzo-krmle mz kros myaszpx-zlwzle zmatq amrlx sc leplz.
26 Mzlengeng x inwengeng, na-aoti ena drtwrmu nimu esz'-krmu. Murde mzli kc tqkqle-ngrbz Gct nimu, trkqluwamuu kxyrplapx mz nzobqkr leplz x trkqlu-kzwamuu kxnzetung o kxnzvzpxmqng mz nqvi lr ncblo kxnzmyapxbzng. 27 A' Gct mcpxle leplz kxnzkqlung kcng trnzsikluung, kxnzngqngung mz nzobqkr leplz, murde na-aelwapx-ngrbzle mz krkcng tzyrplapxng kx nzrkrlz-krdr trokatrleu nidr mz nzmnc-zpwx-krdr badr Gct. X mcpxle leplz txneng kxnzkqlung kcng trpnzngr scdr zmatq, murde na-aelwapx-ngrbzle mz leplz kxnzmatqng kx nzngini-krdr kxnzetung x nzrngisc-krdr zmatq trokatrleu nidr mz nzmnc-zpwx-krdr badr Gct. 28 X mcpx-kzle leplz kx nzmaneng x kxnzobqszong mz nzobqkr leplz mz nrlc ka, murde na-aelwapx-ngrbzle mz lr nrlc kx da kcng tqmyapxbz mz drtwrdr ngi brmrda mz nzobqkr Gct. 29 Mz nzmu-krde lcde, trpnzngr kx naglqpx-lzbqbz mz nzobqkr Gct, mz nzrpi-krbzle bade kx myaszpxle kztedeng. 30 Murde nzaxvctr-krbzku mz Mevalu Jiszs trvzpxpuu mz da kcng tqaleku x mz nqmq krgu, a' vzpxm mz nzwzkr Gct. Murde Gct yrlqle drtwr kxyrplapx, kx nangi Jiszs kx na-atubqtile nigu mz nzobq-krde. X Jiszs kc naokatrle nigu, murde nanginigu leplz kxtr neng Gct. X ni-kzde kc naxpepxle nigu mz zmatq ngr alwx, murde namncku badr Heven. 31 Dekc tqrpingr Nzryrngrkxtr kx, “Doa kx rpile naglqpx-lzbq, naglqpx-lzbq-ngrde nike alebz Kxetu rde bade.” ✡ Jeremaea 9:24