Sam Kranzpnu-rlimz-nrade-tq (73)
Nzmnc-zpwx-krnge Yc-zvzbz Bam
Nabz ne Asaf.
Nzxplrkr Kxdrka'-ngrng
Kxmule-esz' rpiku kx, “Gct mrlzti nivz lrde nigu lr Israel,
X amrlzle kx nabzdr lq,”
A' nabznge ngrgo.
X nzrlxngiti-krnge ycpwz pipz nzaxtx-krbole.
Murde mcx nzrngisc-zlwzkr kxdrka'-ngrng,
X kcmnztx-ngrne dztu kxnzglqpx-lzbq lcng.
Mz nzaotikr drtwrnge, trpnzngr nzetqkr drtq kx nzxngitrlr,
A' nzyrlvz-angidrng x nzxplrng.
Leplz lcng trpnzngr zyagox kx prtzbz badr,
X trnzrmctilru nzkxpungr.
Delc tzbi-zlwz-ngrdr mz nzglqpx-lzbq-krdr,
X drtqdr trmyau nzrtulrtr-krbzlr me pnz drtwrdr.
Da kxtrka nzvzpxmqng mz nabzdr x drtwrdr,
Apule lue kc tqyrlepxm mz nzwxplikr kxpqbu.
Nzryrpalelvzng leplz kxnztubqng x nzycmnetxtrpwzng mz da kxtrka.
X nabzdr nzbilvzlr zmatq ngrdr mz natq ngr nzamwxlr-krdr leplz.
Nzycmne-atrkatilr Gct kc Heven,
X nzrpilr kx nidr kxnzetu r leplz mz nrlc mz nzrka-krbzlr natq badr.
Nzvz-rbrkr Leplz Neng Gct
10 Mzli ka kzdung leplz neng Gct nzlalztqpe-kzpzng badr,
Mz nzlxngiti-krbzlr natqdr.
11 Nzrpibzlr badr kx, “Vz-nqblqmamu nigr,
Murde Gct kc Heven trtxpnzngr nzmc-krde nimu.”
12 Krlc nqmq kr leplz kxdrka'-ngrng.
X kxmule-esz' nzrngiscpeng da kxkqlu, a' drtwrdr trpnzngr nzesapx-krdr.
13 Gct, mz nzmc-krnge nidr, rpix esz'-krnge kx, “Mane nzalqti-lzbq-krnge.
X mane nzyrlqpx-lzbq-krnge mz alwx.
14-15 Murde drtqnge etq zvz mz zbq kalvz, mz nzkxpu-zlwz-krnge.”
A' trvz-nqblqwxu natq kxdrka'-ngrng,
Mz nzrpi-krdr kx trmcwq alwx ngrgrng,
Murde ma tqmailzx leplz nemqng mz nzvz-rbr-krdr.
Kxdrka'ngrng Sa Naodating
16 Rblxm bange nzkrlz-krnge drtwr ngr nzrlr-krbzme mz kxnztubqng nzkxpu-krdr,
A' trayrplapxwq kxdrka'-ngrng.
17 Zbz kx vztrx Mangr-nzangiongr nim mz nzmnc-lrpi-krnge,
Sc tqkrlz-atex kx kxdrka'-ngrng lcng trpnzngr nzmnctr-krbzlr bam Heven.
18 Murde rlr-ngrbzme badr nzvz-nqblq-krdr me pnz drtwrdr, kc tqbatrpzle nzodatingr nidr.
Nzapulr kx nzvzneng mz drtc' kxmiglq kc tqrbatrpz nztao-krdr.
19 X nzodatingr lc nidr na-ani txpwz,
X nzvzdz-krm nelzdr mz zmwxlr sa naprtrpz badr mzli kc nabz-ngrdr.
20 Mz nzbz-ani-krdr lc, nzapulr nzrmwiblengr
Kc tqmrbrtr mou mz nzdwalz-ngrm.
Nabznge Ngrgo
21 Mzli kc tqxngitr-ngrne mz nabznge nzaetq-krme drtqnge,
X zngya ngr drtwrnge lolvztxne,
22 Apux poi kzpeto
Mz nzpqbrtxnekr narnge x nzngqngu-krnge.
23 Kxmule-esz', a' mnc-zvzme bange,
Mz nzlolvz-amqngi-krm mqnge.
24 X vz zvz nzmailz-krm ninge mz nzalvztr-krm ninge.
Murde naprtrx mz nzarmyalz-krm ninge kalr.
Brti Drtwrnge Gct
25 Trpnzngr da kx wz-ngrn Heven x nrlc
Kx suti drtwrnge, a' nim txpwz, Trte.
26 Kxmule-esz' nabznge ngrgo, a' nim nzxplr-krnge,
X namncme bange, tqvzpe tqvzpe.
27 Gct, krkcng tzpx-ngrdr nim, trnamnctrpzu bam mz nibr nzbz-krdr,
Murde sa naodatiq kxtrnzabrtrpzlru drtwrdr bam.
28 Kxetu Yawe, mrlzvxitxm bange nzmnc-aepztr-krbo bam
Mz nzrlatr-krbo bam, murde napipx-zvzbo nqmq krm mz leplz.