Sam Kranzpnu-rtqmz-nrade-nzlvqn (85)
Nzamrlzkr Yawe Mzli Kc Pnz, Mzli Ka, X Mzli Kc Navzm
Nabz ne nqvi lr Kora kx nzyrbzlr mz kxrmailz ngr dzbe kxnzngrng.
Mzli Kc Pnz
1 Yawe, yc ngr drtwrm lr Israel mzli kc pnz,
Mz nzamnc-zpwx-mou-krm nidr mz drtc' nyzm.
2 Sc tqipqpeq nidr, leplz nemqng, mz nzvz-rbr-krdr,
X katxpxbzme alwx ngrdrng.
3 Mzli lcde, lolvzo-mowq zngya ngr drtwrm,
X nrwx kc tqprlxpebzme badr.
Mzli Ka
4 Mevalu rgr, mzli ka, amnc zpwx mou kz nigr,
X nikitx nzngyatikr drtwrm nigr.
5 ?Myx kxmule, nangyati-alope drtwrm nigr,
X trpengr nzyzlukr drtwrm?
6 Trtingr! Axplr-mop nzlu-krgr,
Murde na-abrtz-ngrgr nim.
7 Yawe, aelwa-ngrm bagr nzaodu-krm kc tqyc tqyc,
Mz nzarlapx-krm nigr.
Mzli Kc Navzm
8 Nabrti drtwrgu natq Yawe,
Murde esalz-ngrmle nrwx bagu mz nzyrlqpx-lzbq-krgu mz dalr nzngqngungr.
9 X oliq zvz nzarlapx-krde kxnzamrluelr nide,
Murde nzulrde naxngi-alope mz drtc' nyzgu.
10 Yawe aodu-zvzle nigu, murde nangida-zpwxbzku bade.
X nzaclve-krde tubq, murde namnc-zpwxku.
11 Mz nzavzo-krmle nztubqngr lc bagu,
Ayzlubzku mz nzngida-zpwx-krbzku bade.
12-13 Apule kx nztubqngr lc rtwayzbz bade mz nzatubqti-krde nabz leplz,
Murde naoliqti-ngrdr nzvz-krmle.
Mz nzoliqngr lc, Yawe sa narkatim bagu da kxmrlzting,
X drtc' nyzgu sa nalvcngr dakxnzng kxkqlu.