Sam Kratrtqki-esz'-nzpnu-esz'-nrade-esz' (111)
Nqmq Kr Gct
Kzdq Nabz Ngr A, B, C
Awi Yawe! Glqpxku Yawe!
Bilvzx nide mz nabznge atwrnrngr, mz nzyrlwr-lxblr-krgr badr leplz nedeng.
Clvele nrlc x da kcng tqwz-ngrde, tqaletileng nzmyalzng.
Delc, leplz amrlx na-aotingr drtwrdr da lcng mz nzabrtzlvz-krdrleng.
Eu, da lcng amrlx nzaelwapx-ngrdr zmrlue x zmatq rde.
Glqpxku nztubq-krde kc tqvzpe tqvzpe.
Ipqle nigu mz zmrlz ngrde kxmyalz x ycngr drtwrde nigu.
Jzsle nigu x nayc zvz mz drtwrgu rkx ngrdeng.
Kabzle dakxnzng mz leplz kcng tzamrluelr nide.
Lolvz-amqngile mz drtwrde da kx esalz-ngrbzle badr.
Mz nzaprc-krbzle drtc' ngr lr mrkzbleng mz doa nedeng,
Nide kc tqaelwapx-ngrbzle zmatq rde badr.
Okatrle nidr mz nzaclve-krdeng kxtubq.
Prlxpx-zvzle da angidr x nzrsakrlrngr.
Rkapx zvz natq kx rsakrlrngr.
Sa na-atutrleng murde nqmq krde mrlz x tubq.
9-10  Takitrde nzangio-krgu drtqde kxtr mz nzamrluengr murde
Vz-nqblq-zvzle nzesalz-krde x
Witi nelzde nzarlapx-krde leplz nedeng.
X aelwapx-ngrgu nzyrplapx-krgu mz nzamrlue-krgu nide.
Yawe kabzle nzrkrlz-angidrngr mz krkcng tzyrlq-angidrlr natqde.
Zbq kalvz nzrglqpxngr nide navz zvz x tqvzpe, tqvzpe.