Sam Kratrtqki-esz'-nzpnu-pwx-nrade-rtqmz (148)
Nzrglqlz-zvzngr Yawe
1-2  Glqlz-zvzamu Yawe, nimu lr Heven amrlx.
Nimu enjrl nedeng, glqlz-zvzamu Yawe.
Glqlz-zvzamu Yawe, nepi ncdr temz.
X nimu vri amrlx, glqlz-zvzamu Yawe.
Glqlz-zvzamu nide, dalr bongavz amrlx.
X nimu lue kcng wq, glqlz-zvzamu nide.
Glqlz-zvzamu drtqde. Kxrpalz wz-ngrde nimu,
Mz natq kx kapxle. Glqlz-zvzamu drtqde.
Natqde tqyc tqyc. Yrlqti-lxblrbzle
Me namnc-alo-ngrnamu. Natqde tqyc tqyc.
Glqlz-zvzamu Yawe, nimu nc x mepwz amrlx
Ngr prla x me boongr. Glqlz-zvzamu Yawe.
Vz-nqblqamu natqde, bzlrpc x muli aes.
Dcbz, nenq x tewa, vz-nqblqamu natqde.
Glqlz-zvzamu Yawe, newz x nra amrlx.
Nimu nounc ngr peto, glqlz-zvzamu Yawe.
10 Glqlz-zvzamu nide, animol x utc amrlx.
X da kx nzngrlaneng, glqlz-zvzamu nide.
11 Naglqlz-kzku Yawe, nigu lr nrlc amrlx.
Kxnzetung x kxnzrmailzng, naglqlz-kzku Yawe.
12 Naglqlz-kzku nide, nigu obla x olvi.
Itoto x lrtzlvzng, naglqlz-kzku nide.
13 Naglqlzku drtqde, nigu amrlx ngrgu.
Drtqde myatxlz-esz'ngr. Naglqlzku drtqde.
Nzmyalz-esz'ngr-krde myaszlzle drtc',
X bongavz kz. Nzmyalz-esz'ngr-krde!
14 Naglqlz-zvzku Yawe, nigu lr Israel nedeng.
Axplrle x aodule nigu, naglqlz-zvzku Yawe.