Nzaelwapx-krbz Jiszs Mz Jon Da Kcng Tqyc-kapq-pnzng
Natq Ngr Nzaplxtqngr Mz Nzaelwapx-krbz Jiszs Mz Jon Da Kcng Tqyc-kapq-pnzng
Mc ‘Natq Ngr Nzaplxtqngr Mz Nrpakxmrlz Kx Yr Jon.’ Yrle buk lc mz mzlir yiz 90—97 AD mz nibr Nrpakxmrlz. Aposol Jon yrbzle letz lc mz dzbe lrmakxtr kcng rlimz mz provins kc Esia, tzmnclzbzng mz nzaclve-krde, murde pibz Jiszs bade mz nzobq-rmwiblengr. Suti drtwrde nzapqtr-krbzle nabz leplz mz nztu-amqngi-krdr mz mzli r nzakxpungr. Murde nzxplrkr Gct myaszpxle nzxplrkr Setzn, x sa na-aovxio-atwrnr-ngrde Setzn badr enqmi r Gct amrlx, mzli kc nakrlz-zpwx-ngrbzle mzli kc tqyrlq Gct.
Mz nzobq-rmwible-krde lcng, Jiszs aelwapx-ngrbzle mz Jon kzdung da kx naprtzng, mz nzycmne-ebzpxngr kxkqlu. Kxnzrlxngiting drtwrdr tresz'tiu mz drtwr ngr kzdung da mz buk lc, murde rblx nzrkrlzngr. A' kzdung da nzopx-angidrng. Mz nzmu-krde lcde, kzdung mzli yokaetipxkr drtwr ngrdr, x kzdung mzli trtingr. Dckrlzdeng 17-18, nzycmnetr-ngrdr gzpman kxdrka'ngr kc navzm na-aclvele nrlc atwrnrngr. Gzpman lc apule srlx, murde batrpzle mz leplz nzrlasz-krdr Gct x nzvz-nqblq-krdr nqmq krde kxtrka. X nzyrlq drtqde “Bxbilon” nqmq krde lc tqtrka. Murde mzli kc bqnc, lr Bxbilon nzaovxiolr lr Jiu x nzbatrpzlr badr nzngini-krdr kxnzawz-nrbalqng. X nzbatr-kzpzlr nzangio-krdr gct ngrdrng, da kc tqwai nzmc-krgule mz Buk sc Daniel. A' mz buk lc, Bxbilon drtwr ngrde gzpman ngr Rom mz mzli nyz Jon. X drtwr ngrde kz kx gzpman kx na-apule Rom sa navzm. X mz gzpman lc, Enqmi Kxetu ngr Kraes sa na-aclve-atwrnr-ngrde nrlc. Nzrpi-ngrbz “Mrlx Kc Tqdrka'ngr Kc Kai.”
Jon yr-kzle kzdung nabz kx nzngr-ngrdr Heven. Nabz lcng amrlx nangr-ngrgu mz #123 mz Buk Ngr Nzangiongr.
Jiszs Kxnzmcpx Myapxbz Mz Buk Lc
Aelwapx-ngrde zluli rde. [dckrlzde 1]
Aclvele dzbe lrmakxtr nedeng mz nrlc. [2—3]
Nide Nei Sip kc tznibq x lu-mop, x nzangio kxnzrlxngiting amrlx. [4—5]
Nzayrplapxngr amrlx mz yiz kcng rlimz tzrpibz Mzli r Nzkxpungr Kxtrka-zlwz. [6—19]
Jiszs yzlu-mou-ngrmle mz Jerusalem kxmrna, murde na-aclvele nrlc mz nzngini-krde King r king amrlx. [19—22]
1
Ninge Jon, kxnzawz ne Jiszs. Krlcng da kx naprtilzng kx aelwa-ngrm Jiszs bange. Rlr-ngrbz Gct mz Jiszs da lcng tqycpe pipz nzprtz-krmlr, mz nzvz-nqblq-krde me pnz drtwrde, murde na-aelwa-ngrbzle mz kxnzawz nedeng. X Jiszs atwzlr-ngrmle dq enjrl nede bange, murde nayokaetipxmle bange drtwr ngr da lcdeng. Mz nzmu-krde lcde, sc tqyropex da amrlx kcng tqmcxng x tqxlrxng. Krlcng natq Gct x nrpa angidr ngr Jiszs Kxnzmcpx. Namrlzbz mz doa kx rlwxpxle natq lcng tqyrox mz buk lc. X namrlz-kzpz mz leplz kcng tzxlrlr x tzyrlq-angidrlr natq lcng. Murde sa nakrlz-angidrlr da lcng amrlx mzli kc tqycpe pipz nzprtz-krmlr.
Jon Ryrbz Mz Dzbe Lrmakxtr Mz Taon Rlimz Mz Esia Provins
4-5 Ninge Jon, ryrbo bamu nimu dzbe lrmakxtr kcng mz taon rlimz mz Esia Provins.
Krka'-ngrne kx zmrlzkxmyalz x nzmnc-zpwxngr na-avzom Gct, Mqngrkxtr x Jiszs Kxnzmcpx bamu. Gct kc tqmnc mzli ka, x tqmnc zvz, x sa navzm. X Mqngrkxtr kc tqmnc mz tron kc tqwxbungr Gct x nzwz-krdeng kcng rlimz. X Jiszs Kxnzmcpx kc tqrpipx angidr natq Gct, x doa kx nzatulz-kaip mz nzbzngr, a' trpengr nzbz-krde. X nide kc tqaclvele king amrlx mz nrlc tulvzo. Sam 89:27; Nzyrplapxngr 14:5, 25; Jeremaea 42:5; Rom 8:29; 1 Korint 15:20-22; Filipae 2:9-11; Kolosia 1:18; Hibru 12:23; Nzaelwapxngr 17:14; 19:16
Jiszs Kxnzmcpx lc mrlzti-zvzle nigu, x aopxpebzle drtqgu mz zmatq ngr alwx rgung mz nzbzo-krmle mz kros. X ata-lxblrtrle nigu mz dzbede kc esz', murde nawztrpzku mz Gct Trtede, kc tqngi King rgu, mz nzngini-krgu pris nedeng. Takitrde nzglqlz-zvzngr nide mz nzetukr zmatq ngrde, kc tqvzpe tqvzpe. Eu, angida. Nzrlaszngr 19:6; Asaea 61:6; 1 Pita 2:5, 9; Rom 12:1; Hibru 13:15
Jiszs sa navzom natuom mz dcbz. X sa namc leplz amrlx ngr nrlc tulvzo, nidr badr leplz kcng tzrbatrpzng nzrluplxtingr nrkrdrtq Jiszs mzli kc. X leplz amrlx mz nrlc sa namwxlrng x nayrni-zlwzng. Me tutr-ngrde lape! Eu, angida. Daniel 7:13; Sekaraea 12:10-11; Matiu 24:30; Jon 19:37; 1 Tesalonika 4:17
Rpi Yawe kx, “Ninge Gct kc tqrninr, kc tqmnc mzli ka, x tqmnc zvz, x sa navzm. Ninge nou da amrlx x kx ayrkrpx da amrlx.” Nzrlaszngr 3:14; Asaea 44:6; 48:12; Nzaelwapxngr 1:8, 17; 2:8; 21:6; 22:13
Jiszs Kxnzmcpx Opx Mz Mz Jon Apule Mrlx Leplz
Ninge Jon, x prtrku mz dzbede kc esz' mz nztu-amqngi-krgu kxmule-esz' nzaetqbz drtqgu murde mnclzbzku mz Jiszs mz nzngini-krde King rgu. Nzadwatrlr ninge presin mz trmctu Patmos, murde yapwxtipx-zvzx natq Gct x Nrpa ngr Jiszs. 10 Mz kzdq Sade mrlc, zmatq ngr Mqngrkxtr prsrle ninge, x obq-rmwiblex. Mzli lcdepwz xlrkixle mz nibrnge kzdq natq Kraes kxetu apule nzyrnikr trpu. 11 Rpile kx, “Yro mz buk da amrlx mcqng, x atwzlr-ngrbz buk lcde mz Esia Provins mz dzbe lrmakxtr mz taon rlimz seleng: Efiszs, Simrnz, Prgamzm, Taeatira, Sadis, Filadelfia x Laodisea.”
12 Kx lxlvrkimc kc mq mz nzmc-krnge kc tqycmnem bange, mcx da rlimz kx ngi gol kxwxbuo-ngrm lam. Sekaraea 4:2-6 13 X mz mzlirdr, kzdq ncblo, kx apule Mrlx Leplz, kq nzkq kxboi, x lunyao-ngrde kc da kx apule gol. Daniel 7:13; 10:5 14 Nqngi narde prkitxpx apule nqbya ngr nrc. X mzte nzapulr nalzpq nyr. Daniel 7:9 15 X nanycde kz nzapulr nzpnaprkr bras kc tzayrleni mz nyr x sc tzalqtipe. X nzokr natqde apule nzyrpukr nrc. Esikel 1:7, 24; 43:2; Daniel 10:6 16 X malele mz mqde kxrtc vri rlimz, x lvcpxm mz naode kc toki r vea kxmalc nrlarde rlilr, x nzyzlrkr rtrlrmzte apule nzlulikr nepi mzli kc bea. Asaea 11:4; 49:2; 60:1; Daniel 10:6; Malakai 4:2; Matiu 13:43; 17:2; Efiszs 6:17; Hibru 4:12
17 Kx mcx kc nide, rtco-lzbq-ngrbo mz nanycde apux ncblo kx bz, mz nzangio-krnge nide. A' mqde kxrtc bxtrple ninge x rpimle bange kx, “Bzkq mwxlrq. Ninge kx rtwayz x ninge kx rmnr-ngrbz. Asaea 44:6; 48:12; Nzrlaszngr 33:20; Asaea 6:5; Esikel 1:28; 3:23; 43:3; 44:4; Daniel 8:17-18; 10:7-10; Matiu 17:7; Aposol 9:3-4; Nzaelwapxngr 1:8; 2:8; 21:6; 22:13 18 Ninge nou nzlungr. Bzx mzli kc ena, a' nzlupe-mou-krmc lc mzli ka tqvzpe tqvzpe. Lolvzx zmatq ngr nzrlvxngr x nzrbqtrngr naonrx ngr mrnyz mqngr leplz kxnzbzpeng. Matiu 16:16; Jon 1:1-3; 6:57; 14:6; Hibru 2:14; 3:12; 9:14; 10:31; 12:22 19 Yro da kcng tqmcqng, tqprtilzng mzli ka, x da kcng naprtilzng mz nibrde. 20 Drtwr ngr vri lcng rlimz tqmalex mz mqnge kxrtc x da rlimz kx ngi gol kxwxbuo-ngrm lam nidr sele. Vri kcng rlimz drtwr ngrdr kxnzaclvelr dzbe lrmakxtr mz taon kcng rlimz, x da rlimz kx ngi gol kxwxbuo-ngrm lam, drtwr ngrdr dzbe lrmakxtr mz taon lcng rlimz.”

1:4-5 Sam 89:27; Nzyrplapxngr 14:5, 25; Jeremaea 42:5; Rom 8:29; 1 Korint 15:20-22; Filipae 2:9-11; Kolosia 1:18; Hibru 12:23; Nzaelwapxngr 17:14; 19:16

1:6 Nzrlaszngr 19:6; Asaea 61:6; 1 Pita 2:5, 9; Rom 12:1; Hibru 13:15

1:7 Daniel 7:13; Sekaraea 12:10-11; Matiu 24:30; Jon 19:37; 1 Tesalonika 4:17

1:8 Nzrlaszngr 3:14; Asaea 44:6; 48:12; Nzaelwapxngr 1:8, 17; 2:8; 21:6; 22:13

1:12 Sekaraea 4:2-6

1:13 Daniel 7:13; 10:5

1:14 Daniel 7:9

1:15 Esikel 1:7, 24; 43:2; Daniel 10:6

1:16 Asaea 11:4; 49:2; 60:1; Daniel 10:6; Malakai 4:2; Matiu 13:43; 17:2; Efiszs 6:17; Hibru 4:12

1:17 Asaea 44:6; 48:12; Nzrlaszngr 33:20; Asaea 6:5; Esikel 1:28; 3:23; 43:3; 44:4; Daniel 8:17-18; 10:7-10; Matiu 17:7; Aposol 9:3-4; Nzaelwapxngr 1:8; 2:8; 21:6; 22:13

1:18 Matiu 16:16; Jon 1:1-3; 6:57; 14:6; Hibru 2:14; 3:12; 9:14; 10:31; 12:22