Dos Unnon Sulat ni Pablo Atag to mgo Toho
TESALONICA
Unna nod Bosan
Inis Tesalonica, dakkoo to langun no bonuwa riyot Macedonia. Iddot timpu no id oubpa si Pablo woy dos mgo duma rin no si Silas woy si Timoteo riyot Tesalonica, id ponudtuu ran kos kahit Monama riyot mgo simba-an to Judio. Pomon tadda, duwon don mgo Judio woy konna mgo Judio no mid pomakoy ki Disas Krays. Na, duwon dumon mgo Judio no id supak ongki Pablo, woy id ukag dan iddos tivuk no bonuwa, de-en nopohos id awa onsi Pablo rutun (Pinuungan 17:1-10). Id undiyon sikandan to Berea woy nopongnga, diyon mandon to Atenas. Laggun to riyon don sikandan, norinog dan no id posupittan iddos od pompomakoy riyot Tesalonica. Purisu id popiyod ni Pablo si Timoteo, su amoy od inniyat kandan nod mosalig diyot kopomakoy. Na idda en mandad no timpu, id undiyon si Pablo to Corinto (Pinuungan 18:1). Laggun tid oubpa sikandin dutun, id inguma si Timoteo woy si Silas no id pomon diyot Macedonia, woy id ponudtuu ran iddos moka-atag to kopomakoy to mgo toho Tesalonica. De-en id popiyod si Pablo to sulat diyot kandan amoy od mosalig kos kopomakoy woy kodginawa ran.
Diyot sulat din, id posolamat sikandin to Monama atag kandan. Id posampot din mandad kandan iddos moka-atag to kodlivod tod Longaggon no si Disas Krays, woy dos od kotomanan tod pompomakoy no id poomatoy ron. Na pomon to duwon mgo minuvu riyot Tesalonica no id polin-uhus dan iddos dontulon onni Pablo to kodponudtuu to kahit Monama, id paabbotlabbot din ka-ay'n sulat iddos moka-atag to dontulon woy kodbovotasan dan to riyon pa sikandan to Tesalonica. Id nonaw rin mandad iddos moka-atag to ko-ubpa no id kahaa-i to Monama.
Dos mgo Nokota-aw:
Kodpokilaa (1:1)
Dos kopomakoy woy ko-ubpa to mgo toho Tesalonica (1:2-10)
Dos kodbovotasan onni Pablo (2:1-12)
Dos kosupittan tod pompomakoy riyot Tesalonica (2:13-16)
Dos kovuha onni Pablo atag tod pompomakoy riyot Tesalonica (2:17 taman to 3:13)
Dos ko-ubpa no id kahaa-i to Monama (4:1-12)
Dos kodlivod tod Longaggon (4:13 taman to 5:11)
Kotompusan no mgo pomandu woy kodpongumusta (5:12-28)
1
Kodpokilaa
Siyak si Pablo kos mid sulat ka-ay duma ki Silas woy ki Timoteo. Id sulat doy ini atag koniyu no id lolivuung nod pompomakoy ruwot Tesalonica no nosokkad diyon to Monamon Amoy woy ki Disas Krays nod Longaggon.
Muopa nod kotanggap dow kos kandin no kopiyannoy woy kosunayan.
Dos Kodposolamat ni Pablo atag to mgo Toho Tesalonica
Inaayun koy od posolamat to Monama pomon koniyu langun, woy dii koy en od kolingow nod apii koniyu riyot mgo dosalon doy. Inaayun doy od sompotton diyot Monamon Amoy ta iddos moppiyon pinuungan dow no id pomon to koniyun kopomakoy. Waa koy mandad nolingow taddot kod-oiluggat dow no id pomon to koniyun kodginawa, woy dos kodti-is dow pomon to mosalig no kod-imman dow to kodlivod tod Longaggon ta no si Disas Krays.
Mgo suwod no id ginowannan to Monama, nokosaddoo koy no id aam kow nikandin. Oyya su iddot id nonaw koy koniyu to Moppiyon Dinoggan, konna ra no id oseng koy koniyu, ko konna, iddos osengan doy, id dumannan to kotuusan to Uhis no Ispiritu, woy idda en kos id boggoy konami to kodsalig no bonnaa en kos id nonaw roy. Nosorollan dow man iddos kodbovotasan doy to ruwon koy pa to koniyu. Dos langun nod puungan doy, atag da en to koniyun kopiyannan. Id ikuu kow konami woy riyon tod Longaggon, oyya su ahad diyot dakkoon kodposuppit, id tanggap dow kos kahit Monama duma to kahaan no id pomon to Uhis no Ispiritu. Purisu novovallan kow no moppiyon ponunggelengan to langun nod pompomakoy ruwot prubinsya to Macedonia woy ka-ay to Acaya. Oyyos pomon koniyu, nokoso-ob kos kahi tod Longaggon, konna ra riyot Macedonia woy Acaya, ko konna, ahad ingkon norinog to mgo minuvu iddos moka-atag to kopomakoy row to Monama. De-en konnad ko-ilangan nod itulon doy pa ini, su sikandan don en kos od ponudtuu moka-atag taddot moppiyon kodtanggap dow konami iddot kod-unduwon doy to koniyu. Id ponudtulan koy nikandan no id tanan kowd taddot konna bonnaan mgo monama, amoy od dumoruma kowd taddot mooggot woy ma-antoy'n Monama. 10 Woy id ponudtuu ran mandad no id aangat kow to kod-inguma taddot Anak din no si Disas pomon diyot datas to langit. Id badnow sikandin to Monama woy sikandin kos od poleggua keta taddot od ingumon moka-arat-arat no kodsilut to Monama pomon to langot din.