Am ant wo i em-oꞌohani ahni James mani d piongaj g t-kownalig Jesus Christ.

2 Am g wabsh wo si s-ap e tahtkkad mat hekid ab wo em-aꞌahe g shoꞌigdag. 3-4 Id o aꞌappem g em-wohochudadag ch wo i gewkai. Kumt hab s-ap wo nahtoisk ch s-ap wo nakogad g e-shoꞌigdag.

5 Haꞌijj amtp hems haꞌichu pi amichud. Kuni am em-ahgid mamt ab wo tai g Jiosh g amichudadag. T ab wo i em-mah. Jiosh o si s-baꞌama ab ha mamka g hemajkam mo haschu i tatchua ch pi ha kehꞌid. 6 Mt wabshaba hemho wa wo s-wohochudad mat hab wo em-juni g Jiosh mam haschu ab i tahni. Hegam mo pi wohochud at wabsh haꞌichukaj wo e kudu hab sha masma mat g shuhdagi g hewelkaj wo e kudut k an aꞌai has wo e wuad. 7 Idam at g Jiosh pi am hu hab wo ha juni mat haschu ab wo i tai 8 no pi pi am hu shelinim wawani g ha-wohochudadag.

9 Chum achs hems haꞌijj d shoꞌigkam ch eda wo chum si s-ap t-tahtkkad nat pi t-doꞌibia g Jiosh. 10 Kut g s-kakais hab waꞌap wo chum si s-ap e tahtkkad e doꞌibiak. Jiosh o am wehs t-wepo t-haꞌichuchud. S-kakais at haꞌas s-hohtam gam hu hab wo i e juh mat g shoꞌigkam. 11 T g si s-has haꞌichu hab ha-juni wo huhug hab sha masma mat g haꞌichu wuhshanig wo huhug mat hekid wo gaksh g jewed am s-toni k ed.

12 Tt wo si s-ap t-tahtkk matt hekid s-ap ab wo nako g t-shoꞌigdag. Ab o t-mahkch g Jiosh g wechij doakag ahchim mach ab si tatchua ch am wo i t-wahpki e-kihdag ed matt hekid wehs wo gahi wuwha g t-aꞌappemadag.

13 Pi g hab wo shaꞌi chehꞌi mas g Jiosh hab chum em-wua mamtp wo sha pi ap nako g e-aꞌappemadag k hab wo juh g pi apꞌekam. Jiosh o pi hekid hab wua g pi apꞌekam ch pi hedai hab chum ha wua mas hab wo juh g pi apꞌekam. 14-15 Oꞌodham o wabsh hejel e-tatchuikaj hab wua g pi apꞌekam. T g Jiosh ab wo i ha mah g s-koꞌok namkidadag heg wehhejed.

16 Haꞌi o chum ha iattogid ch hab chechꞌe mo g pi apꞌekam ab d Jiosh amjedkam. Pi g ab hu wo shaꞌi ha wohochud, ahpim ni-wehm wohochuddam. 17 Jiosh at s-kehg nahto wehs haꞌichu. K wehs s-kehgaj hegai mo ab t-mahkch. Tash ch mashad ch huhuꞌu hebaichuj pi ab hu t-mahkch g tonlig no pi g jewed e nodgid. K wabshaba g Jiosh pi hekid gawul e wua ch chum hekid tonlidch g t-chegitoidag g wohokamkaj. 18 Jiosh at am i t-tashogi g wohokam. Kutt ab i s-wohoch. T hekaj ab i t-gawulkad k ab i t-mah g wechij doakag matt d wo aꞌaligajk.

19 Pi g wo s-e hohtkid mamt haꞌichu hab wo chei. Baꞌich o i s-apꞌe mamt wo haꞌichu kaihamad.

Pi g am wabsh pehegi haꞌichukaj wo babgat. 20 Pi at hab masma wo i e apꞌech g pi em-apꞌedag. Jiosh at am wo waꞌi apꞌech g pi t-apꞌedag.

21 Gam g hu hab wo i juhni wehs haꞌichu mo s-bihtagi am em-chegitoi ed ch am em-doakag ed. Ab g wabsh wo i e shoꞌigchud Jiosh wui k ab wo i s-wohoch g haꞌichu ahgaj. Kut heg hekaj wo em-doꞌibia.

22 Pi g am wo hejel e iattogidad mamt wabsh wo kaihamad g Jiosh haꞌichu ahga ch eda pi am hu hab wo junihid. 23 Jiosh oꞌohana o hab sha masma mo g neidakud matt heg eda ab wo i t-neid k wo cheh mo haschu pi kehg hab mahs am t-doakag ed. 24 Pi g gam hu wabsh wo hihim pi am hu i chegitok mo has mahs g em-doakag 25 k wabshaba am wo si oidahid g Jiosh haꞌichu ahga ch am hab wo junihid. T g Jiosh ab wo si i s-em-hoꞌigeꞌid k ab wo i em-wehmt wehs haꞌichu hab em-juni ed. Kut g haꞌichu ahgaj ab wo i em-wuwhas pi apꞌekam t amjed.

26 Hegam mo hedai hab kaij mo d Jiosh wohochuddam ch eda wo pi ap neneokad o wabsh hejel e iattogid. K g ha-himdag pi haꞌichu wehhejed s-kehgajk. 27 Bo d elidag g Jiosh mat g t-wohochudadag haꞌichu wehhejed wo s-kehgajk. Hemho wa att wo si t-nuhkudad mat pi wo t-padch g jewed t ab haꞌichu. Kut hab ep wo t-juh g t-wohochudadag matt haꞌichukaj wo i ha wehmajk hegam mo d heheꞌejel wihpkam uꞌuwi ch aꞌal. T hab pi wo e shoꞌigchudad.