Ebréws
Yuma hiyeg ahiyekten ku pariye hiyeg awahkis inin kagta. Kaayhsima hiyeg ikiy ku in awahkiska gapit Uhokri giwatni amekene Pol. In awahkiska giminkis madikte hiyeg judeyenepwi ku pariye kamaxwenepwi gipitit Kiyapwiye Jesus. Igkis mpiksaptihka gapitkis gikebyupwikis adahan igkis diyuh amin gihiyakemnikis minikweknene.
Inin kagta ikene gawaygyikis adahan igkis ka isahkis gikamaxwankis gipititak Kiyapwiye Jesus awaku ku samah igkis hiyepne mbeyne. In akki gitkis ku Kiyapwiye Jesus gihiyakemni kaayhsima kabayte ariw gihiyakemnikis minikweknene.
1
Uhokri Gikamkayh Kagikiythanisima
Kol 1.15
1 Minikwak Uhokri wasapanaw giminkis amekenegben gibiygikkis gawnepepu. Igwa Uhokri awnene gipititakkis. Ig akki aritnanyupwi ku samah gihiyakemni. Ig akkin akak arakembet arekhetni adahan ekkene ku samah gihiyakemni.
2 Kurime amaksemni hawkri ig wasapanaw uminwiy gibiygik igyerwa gikamkayh. Igwa Uhokri ay gipit ig ekkene ku samah inyerwa Uhokri gihiyakemni. Ig gikamkayh kaayhsima gikiythani. Madikte ku pariye Uhokri gidahan in gidahanwata gikamkayh. Hennewa ig Uhokri gimawkan. Ig Uhokri kehkis inin hawkri ta git ner gikamkayh.
3 Ig gikamkayh kipun akak Uhokri gihiyakemni ku pariye kanenikiythanisima. Ignewa kahayaksa wotwiy igyerwa Uhokri amadga inin. Ig wewkis inin hawkri he akak giwnnenwa. Giwn kanidatnisima. Minikwak ig sagahptawiy ariw utaraksanwiy. Pisenwa ig batahkiswe adahan ig kumadukene gihumwa Ukiparawiy detye ayhté inugik, ay amun ini iwetrit ku pariye kanenikiythanisima kihehaptak.
Uhokri Gikamkayh Pi Kiyatte Giwkis Ahj
Apok 19.10
4 Ku samah ig bat gihumwa Uhokri in kahayak nikwe ku ig pi kiyatte giwkis madikte ahj. Hawwata gikanmak ku samah ig kanumka Uhokri gikamkayh in pi kiyatte giwkis ahj gikanmakkis.
5 Mmanawa ig Uhokri awna ta git gikamkayh:
“Pis nukamkayh. Ku apim inin nah akkap ku pis igyerwa nukamkayh.”
Ig ka awnati inakni henne git pahapwinama ahj. Hawwata akiw ig awna gimin gikamkayh:
“Nah gig, igme nukamkayh.”
Henneme ig ka awnati inakni henne gimin pahapwinama ahj.
6 Kawa. Ku aysaw ig Uhokri awahkiswiye gikamkayh atan amadgat inin, ta gitkis ahj ig awna:
“Nuhiyegapu ahj, adohepkinigbay.”
7 Hawwata akiw Uhokri gannasan minikweknene awna giminkis ahj ku igkis ka kiyesradima gikiythanikis gitiput. In awna:
“Uhokri ikiy giwatnipwi ahj ke maygbe. Ig ikiy igkis gihiyegapu ahj ke tiketbe kadawempiyebe.”
Hennewatbaki ig Uhokri kinetihwa giminkis ahj.
8 Giminme gikamkayh ig annase yuwit pi kabayte akiw. In awna:
“Kiyapwiye Uhokri, pis kumadukanek adahan apanenekwa. Apanenekwa pikumadukan waditnenekwa. 9 Pis batek keh ku pariye wadit. Pis ka batek akak ku pariye kane wadit. Innebaki keh piwohkiga Uhokri kipunsap akak kaayhsima batekka mpiya madikte hiyeg.”
Hennewatbaki ig Uhokri gannasan awna.
10 Hawwata akiw in awna:
“Kiyapwiye, pitatye akapuska hawkri pis keh waxri humaw. Akakwa piwak pis keh en. 11 Aysawnemenek in biyukenek. Pismeti dahwa adahan apanenekwa. Aysawnemenek in mugumugupnek ke kamisbe. 12 Apim ini pis minaminemninek adahan pis awinyimpitninek ke kamisbe. Pismeti ka uniyehwati. Pis pidukwenewa msakwa adahan apanenekwa.”
13 Hawwata akiw ig Uhokri awna ta git gikamkayh:
“Batnaba ay nuhumwa kihehaptak amun inin iwetrit kiyatye ku samah nah sibuhkisnete pipetunyapu pit.”
Ig ka awnati inakni henne ta git pahapwinama ahj.
14 Nah akkamnihte yit ku samahpa ahj. Igkis Uhokri gibukpig yuma gipitkis kema hiyegma amadgayapu inin. Ig Uhokri awahkisrikis adahan gayapetnikis nerras ku pariye amnihkapu gapit Uhokri.