SOSUA
Oaralap en Pwuhk wet
Pwuhken Sosua iei koasoiepen mehn Israel ko ar kalowehdi Kenan pahn kaweidpen Sosua, ohl me wiliandi Moses. Soangen mwekid kesempwal akan me koasoiepe mi nan pwuhk wet, me iangahki duwen mehn Israel ko ar kotehla Sordan, pwupwulahn Seriko, mahwen nan Ai, oh onohnsapahl en inou nanpwungen Koht oh sapwellime aramas akan. Ire me keieu dehde mwahu nan pwuhk wet iei, “Kumwail pilada rahnwet ihs me kumwail pahn papah, pwe ngehi oh ei peneinei, se pahn pahpa KAUN-O” (24.15).
Audepe ni Oaralap
Duwen mehn Israel ko ar kalowehdi Kenan 1.1—12.24
Duwen ar nehk sahpwo 13.1—21.45
a. Sahpw ni palimesehn Sordan 13.1-33
b. Sahpw ni palikapi en Sordan 14.1—19.51
c. Kahnimw kan en aramas akan me tangasang nan apwal 20.1-9
d. Kahnimw en mehn Lipai kan 21.1-45
Kadaudok en palimese pwuralahng nan sapwarail 22.1-34
En Sosua kapahrek en kamwurimwur 23.1-16
Onohnsapahl en inowo nan Sekem 24.1-33
1
Koht Mahsanihong Sosua en Kalowehdi Kenan
Mwurin sapwellimen KAUN-O ladu, Moses eh melahr, KAUN-O ahpw mahseniong nein Moses sounsawaso, me iei Sosua nein Nun, e mahsanih, “Ei ladu Moses melahr. Eri, kaunopada ahnsou wet, kowe oh mehn Isreal akan koaros, oh kotehla Pillap Sordan kolahng nan sahpw me I pahn kihong kumwail. Duwehte me I padahkihong Moses, I kihonguhkehr, oh nei aramas akan koaros, sahpw koaros me kumwail pahn kaparowohng ie. Deud. 11.24.25. Iet irepen sapwamwailen: sang sapwtehno ni palieir lel dolen Lepanon kan ni paliepeng; oh sang pillap laud, Iupreitis, ni palimese, iangahki sapwen mehn Id kan, lel Sehd Mediderenien ni palikapi. “Sohte me pahn kak kaloweiukedi erein omw mour. I pahn ieiang uhk duwehte ei kin ieiang Moses. I sohte pahn keseiukala. Deud. 31.1.6,8; Ipru 13.5. Kehlail oh kommwad, pwe kowe me pahn kahluwa aramas pwukat ni arail pahn kolahng nan sahpw me I inoukihong ar pahpa kahlap ako. A kowe, ke en kehlail oh kommwad. Oh kanahieng kapwaiada kosonnedo pwon me ei ladu Moses kihonguhkehr. Dehr mwamwahliki kosonnedo; eri ke pahn pweida mwahu wasa koaros me ke pahn kohla ie. Deud. 31.6,7,23. Kanahieng pwe pwuken Kosonnedo pahn kin wadawad ni ahnsoun kaudok koaros. Ke pahn kin sukusukuhlki nin rahn oh nipwong, oh kanahieng soahng koaros me ntingdier loale. Eri, ke ahpw pahn kepwehpwehla oh pweida. Tamatamante me I ndahnguhkehr ke en kehlail oh kommwad! Ke dehr masak de lamalam tikitik, pwehki Ngehi, KAUN-O, omw Koht, me kin ieiang uhk wasa koaros me ke pahn kin kohla ie.”
Sosua Kihong Kosonned ong Aramas ako
10 Sosua eri ndaiong kaunen mehn Israel ko re en kohla nan re kohla nan kahnimpwalo oh ndahng aramas ako, 11 “Kumwail kaunopada amwail kisin tungoal, pwe mwurin rahn siluh kumwail pahn kohla oh kotehla Pillap Sordan pwe kumwail en sapwenikihla sahpwo me KAUN-O, amwail Koht, pahn ketikihong kumwail.”
12 Sosua ahpw ndaiong kadaudok en Reupen oh Kad oh elep en kadaudok en Manase, Nemp. 32.28-32; Deud. 3.18-20; Sos. 22.1-6. 13 “Tamataman duwen sapwellimen KAUN-O ladu Moses, eh patohwanohng kumwail, me KAUN-O, amwail Koht, pahn ketikihong kumwail sahpw wet ni palimesehn Sordan pwe en wiahla amwail wasahn kousoan. 14 Amwail pwoud, noumwail seri, oh noumwail pelinmen kan, pahn mihmi wasaht, a noumwail sounpei kan me onopadahngehr mahwen pahn kotehla pillapo mwohn riamwail mehn Isreal akan pwe re en sewese irail 15 lao re sapwenikihla sahpwo ni palimesehn Sordan me KAUN-O amwail Koht ketikihongirailehr. Eri ni ahnsou me kadaudok en Israel koaros pahn kousoanla wasao, kumwail pahn pwurodo oh kousoanla wasaht nan sapwamwail ni palimesehn Sordan, sahpw me Moses, sapwellimen KAUN-O ladu, kihongkumwailehr.”
16 Irail eri sapeng Sosua, nda, “Se pahn wia soahng koaros me komwi padahkihong kiht, oh kohla wasa sohte lipilipil me komwi pahn kadarkitalahng ie. 17 Se pahn peikiong komwi duwehte at kin peikiong Moses, oh KAUN-O, omw Koht, en ketin ieiang komwi duwehte eh kin ketin ieiang Moses. 18 Mehmen me pahn pelian, de sapeikiong omwi kosonned akan, sohte lipilipil, e uhdahn pahn kamakamala. A komwi en kehlail oh kommwad!”

1:3: Deud. 11.24.25.

1:5: Deud. 31.1.6,8; Ipru 13.5.

1:7: Deud. 31.6,7,23.

1:12: Nemp. 32.28-32; Deud. 3.18-20; Sos. 22.1-6.