12
Peidek duwen Rahnen Sapad
(Pil tehk Mark 2.23-28; Luk 6.1-5)
Rahnen Sapad ehu Sises ahpw ketin weidla nan mwetin wihd kei. Sapwellime tohnpadahk ko, nan ar men mwengedahr, re ahpw dolungada wahn wihd kei oh kangkang kohla. Deud. 23.25. Parisi kei lao kilangada met, re ahpw patohwanohng Sises, “Maing, komw mahsanih pwe sapwellimomwi tohnpadahk kan wiewia mehkot me atail Kosonnedo keinapwih en wiawi rahnen Sapad!”
A Sises ketin sapeng irail, mahsanih, “Kumwail sohte kin wadek dahme Depit wiadahro, ahnsou me ih oh ienge ko kerenieng mehkihla ar duhpeklahro? 1 Sam. 21.1-6. Duwen eh pedolong nan tehnpas en Koht, ih oh ienge ko, ahpw sakanla lopwon en pilawa sarawi ko, me keinepwihsang ih oh irail en sakan—pwe samworo kohte me mweimweiong en kin sakan. Lip. 24.9. De kumwail pil sohte kin wadek nan Kosonned en Moses duwen samworo kan en Tehnpas Sarawio ar kin kauwehla kosonned en Sapado, ni ar kin doadoahk rahnen Sapad koaros, re ahpw sohte kin wiahkihda dihp? Nempe 28.9-10. Kumwail en ese pwe mie met emen me lapalapasang Tehnpas Sarawio. Pwe Pwuhk Sarawi mahsanih: ‘I sohte kin anahne meirong en mahn, pwe kadek oh kalahngan.’ Eri, ma kumwail uhdahn wehwehki mouren mahsen pwoatet, kumwail sohte pahn kin kadeikada me mwakelekel kan; pwe Nein-Aramas me pil Kaunepen rahnen Sapad.” Mad. 9.13; b Os. 6.6.
Ohl emen me Mwoator Apali Peh
(Pil tehk Mark 3.1-6; Luk 6.6-11)
Sises lao ketiketla sang wasao, e ahpw ketilong nan sinakoke ehu. 10 A iet, ohl emen, me mwoator apali peh, iang mihmi wasao. Pil ekei aramas mihmi wasao me kin reperepen mehn kadipohng Sises. Irail eri idek reh, “E soh kin uhwong atail Kosonnedo aramas en kakehlahda me soumwahu men rahnen Sapad?”
11 Ih eri ketin sapeng irail, mahsanih, “Ihs rehmwail me nah sihpw men mie me pwupwudiong nan pwoahr loal ehu rahnen Sapad, e seu pahn pitipit ale oh kihda sang nan pwoahro? Luk 14.5. 12 A ia duwen, aramas seu kesempwalsang sihpw? Iei me atail Kosonnedo mweidohng kitail, kitail en kak sewese emen ni rahnen Sapad.” 13 Sises eri mahsanihong ohlo, “Kapahwei pehmwen.”
Ohlo ahpw kapahla peho, e ahpw mwahula ahnsowohte, duwehte pali teio. 14 Parisi ko ahpw pedoisang nan imwen kapakapo oh pokonpene pwe en kapwungada duwen ar pahn kemehla Sises.
Sapwellimen Koht Papah me Pilipildahro
15 Sises lao mwahngihada met, e ahpw ketiketla sang wasao; lapalahn pokon ehu ahpw idawehnla. A e ahpw ketin kakehlahda irail koaruhsie me soumwahu ko, 16 oh ketin kehkehlingkihong irail re en dehr kin lohkiseli duwen ih. 17 Ih duwen me Koht ketin mahsanihong soukohp Aiseia pwe en patowanohng aramas akan,
18 “Iet ei laduwo, me I piladahr,
kompoakepahio me I kin popohlki.
I pahn audehkihda Ngeni,
oh e pahn padahkihong aramas koaros duwen pwungen ei kadeik. Ais. 42.1-4 (LXX).
19 E sohte pahn kamworongada wasa, e sohte pahn weriwer,
e pil sohte pahn lokaia ni ngihl laud pohn ahl akan;
20 sohte ahlek pu pwoat e pahn kauwehla,
sohte lamp me pahn kunlahr ehu e pahn kakunla,
sapwellime pwuhng lao pahn kaunda wasa;
21 oh tohn wehi koaros pahn koapworopworkihla mware.”
Sises oh Peelsepwul
(Pil tehk Mark 3.20-30; Luk 11.14-23)
22 Eri, aramas ekei ahpw wadohng Sises ohl me maskun oh lohteng men pwehki ngehn suwed eh tiadahr powe. Sises eri ketin kakehlahda ohlo; e ahpw lokaiahda oh kilangada wasa. 23 Aramas koaros eri malamalawangkihla oh ndinda, “Kaidehkin ih kisehn kadaudok en Depito men?”
24 Parisi ko lao rongada met, re ahpw nda, “E kin kausasang ngehn suwed akan rehn aramas pwehki Peelsepwul, kaunen ngehn suwed kan, me kin kihong manaman en wia met.” Mad. 9.34; 10.25.
25 Sises mwahngih ar lamalam, iei me e ketin mahsanihkihong irail, “Wehi ehu me towe kan pahn uhpene oh peipene nanpwungahr, sohte pahn mour werei. Oh kahnimw ehu de peneinei ehu me towe kan pahn uhpene nanpwungahr oh peipene, uhdahn pahn mwerpeseng! 26 Eri, ma ekei pahn uhwong ekei nan wehin Sehdan, met wehwehki me wehin Sehdan pwalpesengehr oh e pahn mwadang mwerpeseng. 27 Kumwail ndinda me I kin kausasang ngehn suwed kan pwehki Peelsepwul eh kin kihong ie manaman en kausasang. Eri a, ihs me kin kihong iangamwail kan manaman en kausasang ngehn suwed akan? Pein iangamwail kan kadehdehiong kumwail duwen amwail sapwung! 28 Eri soh, pwe Ngenen Koht me kin ketikihong ie manaman en kausasang ngehn suwed kan rehn aramas, iei met me kasalehda duwen Wehin Koht eh leledohngkumwailehr.
29 “Sohte aramas emen kak wehdpeseng imwen ohl kehlail emen oh pirapahla eh kepwe kan, ma e sohte salihedi mahs me kehlailo; e ahpw pahn kulihasang eh kepwe kan. Dop. 8.3.
30 “Mehmen me sohte iang uhpalihkin ie, nahn e kin pelian ie; oh mehmen me sohte kin iang ie dolungpene, nahn e kin kamwerepeseng. Mark 9.40. 31 Iei me I ndakihong kumwail: me dihp koaros oh soangen lahlahwe koaros kak lapwasang aramas akan; a ihte, dipen lahlahwe Ngehn Sarawi, me sohte kak lapwasang. 32 Mehmen me pahn lahlahwe Nein-Aramas, dipeo pahn lapwasang; a mehmen me pahn lahlahwe Ngehn Sarawi, e sohte pahn lapwasang, met oh pil kohkohlahte.” Luk 12.10.
Tuhke pwoat oh Wah kan
(Pil tehk Luk 6.43-45)
33 “Ma kumwail padokedi tuhke mwahu, e pahn wa mwahu. Ma kumwail padokedi tuhke suwed pwoat, e pahn wa suwed. Pwe kumwail kin esehki iren tuhke kan wahrail akan. Sir. 27.6; Mad. 7.20; Luk 6.44. 34 A ia duwen kumwail me rasehng sineik kan? Ia duwen amwail lokaia kan eh kak mwahu, nan amwail loal suwed? Pwe ewen aramas kin kapwadewei audepen nan kapehde. Mad. 3.7; 23.33; Luk 3.7; b Mad. 15.18; Luk 6.45. 35 Aramas mwahu men kin kasalehda mehkot mwahu pwehki eh direki me mwahu; a aramas suwed men kin kasalehda mehkot suwed pwehki eh direki me suwed.
36 “Eri, kumwail en ese pwe ni Rahnen Kadeiko, aramas koaros uhdahn pahn pwukoahki lokaia mwahl koaros me re wiahier. 37 Pwe pein amwail koasoi kan me pahn kadeingkumwailda; re pahn kasalehda amwail mwakelekel de amwail dipan.”
Pekpen Manaman ehu
(Pil tehk Mark 8.11-12; Luk 11.29-32)
38 Sounkawehwehn Kosonnedo kei oh Parisi kei ahpw patohwanohng Sises, “Maing at Sounpadahk, se men kilang ehu manamanen sang rehmwi.” Mad. 16.1; Mark 8.11; Luk 11.16.
39 A Sises ketin sapeng irail, mahsanih, “Ia uwen suwed oh soaloalopwoat en aramas en ahnsou wet kan! Kumwail pekipeki rehi ehu manamanen? Eri soh, ihte manaman me pahn kohieng kumwailen, manaman en soukohp Sona. Mad. 16.4; Mark 8.12. 40 Pwe duwen Sona eh mihmihki nan kapehd en rohso rahn siluh oh pwohng silipwong, ih duwen Nein-Aramas eh pahn mihmihte rahn siluh oh pwohng silipwong pahn sampah. Sona 1.17. 41 Ni Rahnen Kadeiko, tohn Ninipe kan pahn uhwong kumwail oh kadeingkumwailda, pwehki ar koluhla oh wiliakapwala ni ar rongada en Sona kapahreko; a iet, kumwail en ese pwe me mihmi meto, iei e lapalapasang Sona. Sona 3.5. 42 Ni Rahnen Kadeiko, lih nanmwarkien Sipa men pahn uhwong kumwail oh kadeingkumwailda, pwehki eh seiloak sang ni imwin sampah pwe en ketidohng karonge padahk kupwurokong en Solomon; a met, kumwail en ese pwe me mihmi meto, iei e lapalapasang Solomon.” 1 Nan. 10.1-10; 2 Kron. 9.1-12.
Ngehn Saut Pwurodohng nan Dewe
(Pil tehk Luk 11.24-26)
43 “Ngehn saut lao kin kohieisang rehn aramas emen, e kin kohkohseli nan sapwtehn, raparapahki wasa e pahn kommoaldi ie. A ni eh sohte kin diar, 44 e kin mengimengloalki, ‘I pahn pwurowohng nan imweio wasa I pidoisang ieo.’ Ih eri lao kin pwurolong oh diar eh tehnlahr oh mwakelekellahr oh kapwadahr, 45 e ahpw kin kohieisang, ale ngehn isimen me suwedsang, irail ahpw kin pedolong loale oh kousoanla ie. A ni imwilah, aramas meno kin suwedsang nin tapio. Ih duwen me pahn wiawihong aramas suwed en dih wet.”
Inen Sises oh Rie kan
(Pil tehk Mark 3.31-35; Luk 8.19-21)
46 Sises ketin mahmahseniong pokono, a ineo oh rie ko pa lel likin ihmwo. Re uh liki oh sekerehki me re men tuhwong. 47 A emen tohn ihmwo ahpw patohwanohng Sises, “Komw mwahngih pwe inomwi oh riomwi kei patopato liki, oh men tuhwong komwi.”
48 A Sises ketin sapeng, mahsanih, “Ihs me inei? Ihs me riei?” 49 Ih eri ketin kapahla limeo oh idihada sapwellime tohnpadahk ko, mahsanih, “Ien inei oh riei kan! 50 Pwe me kin kapwaiada kupwur en Semei me ketiket nanleng, iei me riei ohl, riei lih, oh inei.”

12:1: Deud. 23.25.

12:3: 1 Sam. 21.1-6.

12:4: Lip. 24.9.

12:5: Nempe 28.9-10.

12:8: Mad. 9.13; b Os. 6.6.

12:11: Luk 14.5.

12:18: Ais. 42.1-4 (LXX).

12:24: Mad. 9.34; 10.25.

12:29: Dop. 8.3.

12:30: Mark 9.40.

12:32: Luk 12.10.

12:33: Sir. 27.6; Mad. 7.20; Luk 6.44.

12:34: Mad. 3.7; 23.33; Luk 3.7; b Mad. 15.18; Luk 6.45.

12:38: Mad. 16.1; Mark 8.11; Luk 11.16.

12:39: Mad. 16.4; Mark 8.12.

12:40: Sona 1.17.

12:41: Sona 3.5.

12:42: 1 Nan. 10.1-10; 2 Kron. 9.1-12.