LUHAMBA LWA PAULU KWA
FILIMONI
ULONGOLERU
Luhamba ludidini kwa Filimoni lulembitwi na ntumintumi Paulu (1:1). Pamonga Paulu pakaweriti katatilwa mushibetubetu kalulembiti luhamba alu pakaweriti Rumi. Handa pakaweriti Rumi, luhamba alu lulembitwi pamonga mushinja sha malongu sita na yimu Pakwiyuka Yesu, shipindi shilaa pakalembiti luhamba kwa Wakolosayi.
Yomberi kamlembiliriti muntu yumu yakashemwa Filimoni. Filimoni kaweriti yumu gwa wantu yawamjimira Yesu, vulaa kaweriti na mmanda Onesimu. Paulu kamlembiliriti yomberi kumgambira nakamwazibu mmanda gwakuwi Onesimu yakamtiriti Filimoni. Kwa malagaliru ga Rumi, Filimoni kaweriti teratera kumlaga Onesimu. Paulu katumiyiti uwezu wakuwi kumpanana moyu Filimoni kumjimira Onesimu kuwera mlongu yakamjimira Yesu na kashauli kuwera kalekiziwi katendi pamuhera na Paulu. (1:13-14).
Yagaweramu
Paulu kankumlamusiya Filimoni, shipandi sha 1:1-3:2.
Shakapanu Paulu kankumluwira Onesimu kuwera Filimoni kamwanki yomberi handa mlongu yakamjimira Yesu, shipandi 1:4-21
Paulu kankumalilira luhamba lwakuwi kwa kutakula nfiru yakuwi ya kutyangira na malamusiwu ga upeleru, shipandi sha 1:22-25.
1
1 Neni Paulu, mtatilwa toziya ya Kristu Yesu, nwera pamuhera na Timotewu mlongu muyetu.
Tukulembera gwenga Filimoni mtenda lihengu myetu yatukufira, 2 na dada Afiya na Arikipu shonta myetu na Shipinga sha wantu yawamjimira Yesu shawaliwona ukaya kwaku. 3 Tuwafilireni manemu na ponga ya Mlungu Tati gwetu, na kwa Mtuwa Yesu Kristu.
Mafiliru na moyu gwa Filimoni
4 Nonga mayagashii Mlungu shipindi shoseri panukuluwira Filimoni, 5 toziya mpikanira ntambu yagumjimira Mtuwa Yesu na ntambu yaguwafira wantu woseri wa Mlungu. 6 Numuluwa Mlungu kakupanani likakala kuwagambira wantu wamonga njimiru yaku su guvimani goseri maheri gatuwera naga kwa kulikolerana pamuhera na Kristu. 7 Ufiru waku unjegera nemeleru nkulu na kuntula moyu toziya gwenga guyinemeziya myoyu ya wantu wa Mlungu.
Paulu kankumluwa Filimoni kamntangi Onesmu
8 Su, neni mlongu gwaku kwa kulikolerana pamuhera na Kristu, handa hangu weza kuwera na ugangamala kukugambira ntambu yagufiruwa kutenda, 9 kumbiti toziya ya mafiliru, nukuluwa hera. Neni Paulu nwera mzewi vinu na mtatirwa toziya ya kumtendera Yesu Kristu, 10 nukuluwa kwajili ya Onesimu, yakawera gambira mwana gwangu yakamjimira Kristu, nweriti tati gwakuwi gwa shirohu neni panweriti kushibetubetu. 11 Makashu Onesmu kaweriti shintu ndiri, Kumbiti vinu kawera muntu gwa utanga kwa neni na gwenga vulaa.
12 Vinu numtuma kwagwenga, yomberi ndo moyu gwangu. 13 Menfiriti kalikali na neni su kantangi lihengu panu kwajili ya mwenga shipindi ashi neni shawera mushibetubetu toziya ya Shisoweru Shiwagira. 14 Nfira ndiri kutenda shoseri pota na gwenga kujimira, su utanga woseri yamgenda kumpanana yomberi, uweri wa kufira maweni.
15 Pamonga Onesmu kawukiti kwa gwenga kwa katepu hera, su kawuyi kayi kwagwenga mashaka goseri. 16 Na vinu yomberi mmanda ndiri kayi, kumbiti kawera kuliku mmanda, yomberi ndo mlongu gwetu. Yatumfira. Kaweri muntu gwa utanga kwaneni na hakaweri muntu gwa utanga nentu kwagwenga, pakawonikana handa ndo muntu muyetu na mlongu Mumtuwa.
17 Handa yaguwona neni kuwera mlongu gwaku su gumwanki Onesmu ntambu yagunangiti neni. 18 Handa kakukosera shintu, ama kawera na uwanda kwa gwenga, su neni hanumlipiri. 19 Neni Paulu nemba namweni kwa liwoku lyangu, hanukulipi. Handa hangu gwenga paguwera na uwanda wa ukomu waku kwaneni. 20 Mlongu gwangu gutendi hangu kwa kuntanga neni toziya ya litawu lya Mtuwa, handa mlongu gwangu kwa kuwera pamuhera na Kristu, gugufiliziyi moyu gwangu.
21 Neni nwera na unakaka kuwera nembiti aga, hagutendi nentu ya ganukugambira. 22 Pamuhera na aga, muntandiri shumba sha kugonja toziya Mlungu pakankula ganduwa na neni hanuwatyangiri.
Malamusiwu ga upeleru
23 Epafura, mtatirwa muyangu toziya ya kumtendera Kristu Yesu, kankukulamsiya. 24 Na ashina Mariku na Alisitariku na Dema na Luka na awa watenda lihengu wayangu, viraa vilii wankukulamusiya.
25 Manemu ga Mtuwa gwetu Yesu Kristu gaweri pamuhera namwenga.