1 Mara sago gomara ghamana nani dobunai itupuwa. Ma gomarina kubiine Aisiki mau inae ku Gera dobuna, Pilisti damsi i kiivavo Abimaleki kurina. Weni tuna na gomara kana viruwa, kunona gomara sago Abraham ina mariyai itupuwa. 2 Bada inekiibau Aisiki kurina da ivonei bo, “Ke kunoru ku Egypt, avonavonem da weni dobunai kemakai. 3 Kemakai mara gisina ma taku na gwabimuwai ma ani biibiinim. Weni dobuna kudubina na tam, tupurereghim yavata ana veremi. Nakanani ana berai na aku vonakiiyapa bagibagina am mamai Abraham kurina aterei na ana nunuri. 4 Ana berai da tupurereghim ina rakata da nakanani ma gwamegwame kunumai. Ma weni dobuna kudubina ana veresi da rapesiyai. Ma tupurereghim tepasiyai na dam ma dam dobuwai ani biibiinisi. 5 Am mamai Abraham ivotekateka bubuniku da aku vonaviyoyovana, aku sisiya bagibagisi ma aku kayowana kudubina ibera yavui, tuna kubiine ani biibiinim.”

6 Aisiki nani sisiyina Bada gwabinai iviiya, tuna kubiine Gera dobunai imakiikikina. 7 Ma nani dobuna tomotomowisi ipisi kawana Rebeka kubiine ivi tarakiiyanei. Kawana ivi karawata kirakai ma Aisiki iyabumana, inotai da ita vona bo, “Tuna kawaku,” na tomotomowisi ita kiivunui ma kawana ita rutini. Tuna kubiine ivi bero, ivona bo, “Tuna novuku.”

8 Aisiki nani dobunai imakii kirakai. Ma mara sago Pilisti damsi i kiivavo Abimaleki ina numa tepanai ikita ioru da Aisiki ikitai, kawana Rebeka itaraghavui ma iyoyoni. 9 Tuna kubiine Aisiki ikwatui inae kurina ma ivonei bo, “Kuvi bero! Wavinena na kawam! Avi kubiine kuvona da tuna na novum?”

Aisiki ivonapotei bo, “Anotai da ati mamatara da tuna na kawaku na kota kiivunuku.”

10 Ma Abimaleki ivona bo, “Avi kubiine weni berana kuberai kurikai? Aku wawaya sago kawam ita kenei na wavuna kata kavari.”

11 Vaghina ma, Abimaleki ina sisiya bagibagina iterei ina wawaya kudubisi kurisi, ivonesi bo, “Meni wawayina Aisiki bo kawana ini kayotiranei na vaghina, wawayina kani raboboi.”

12 Ma vaghina, Aisiki gwabisiyai imakai ma Bada ivi biibiini, nani dobunai iwayowa da mura ghamanakina ipanani. 13 Ina mura irakata ma nakeda irakarakata da ina mura isasara. 14 Ina bigabiga wawayisi ma ina sipu da ina kau yavoyavosi ipeyari, tuna kubiine Pilisti damsi inuwakapiyei. 15 Ti na ivomiiri da dogo peyarisi idogo potapota yavu, dogosi na Aisiki ina mamai ina bigabiga wawayisi yavata iyaba.

16 Nani murinai Abimaleki, Aisiki ivonei bo, “Akii dobu kekiibutawei, tam kuvi rewapana kirakai, ke nakanani ma tokai.”

17 Vaghina ma Aisiki nani dobuna ikiibutawei ma inae da Gera anaghinai itupagigira da imakai. 18 Ma dogo viya nani dobunai na ina mamai Abraham iyaba ma irabobo murinai na Pilisti damsi idogo potapota. Ma Aisiki na dogosi peyarina iyabame. Ma ina mamai ikikava kii vava iveresi na nakanani ivi vava meyesi.

19 Mara sago anaghina kamonai, Aisiki ina bigabiga wawayisi dogo vuna iyabai da okowa biibiina ipanani. 20 Ma Gera dobuna wawayisi, ti na sipu kii koyakoyagha, na ivomiiri da Aisiki ina sipu kii koyakoyagha iyeghisi nani dogona kubiine, ivonesi bo, “Weni okowina na tokai akii okowa, ke tami.” Tuna kubiine dogona ivi vavei ‘Eseki,’ nani vavana iyamna ‘Vigamowana.’

21 Vaghina ma, Aisiki ina bigabiga inae da dogo sago iyabai ma kegha, nani dogona kubiine na bade ivi gamowana. Tuna kubiine dogona ivi vavei ‘Sitna,’ nani vavana iyamna ‘Miiripote.’ 22 Nani dogona ikuyowei ma inae da bade dogo sago iyabai na kesago iyai nani dogona kubiine ita gamo. Tuna kubiine ivi vavei, ‘Reyobota,’ nani vavana iyamna ‘Taraboga Ghamana.’ Ma ivona bo, “Wekarakava na Bada ivotaweta ma taraboga ghamana ivereta da tamakai bubuna ma mura ghamana tapanani.”

23 Muriyai Aisiki nani dobuna ivoterei ma inae ku Beyaseba. 24 Inekiibau ma nani didibarinai Bada irumatara kurina ma ivona bo, “Namada avonakiiyapa aku bigabiga Abraham kurina da tupurereghimi ina rakata, tuna kubiine ani biibiinim ma ana berai da nakanani ina tupuwa. Taku na am mamai Abraham ina God. Taku gwabimuwai, tuna kubiine ke kuna yabumana.”

25 Vaghina ma, Aisiki suwara kana kema iyamoni ma Bada ivokavakavari. Ma nani dobunai itupagigira da ina yobe itini ma ina bigabiga wawayisi dogo sago vuna iyabai.

26 Mara sago Abimaleki, Gera dobuna kamonai ivomiiri inae Aisiki kurina. Ma ina wawaya ruwa irutinisi da yavata inae. Sago na ina wawaya akakovina kana vava Ayusati ma sago na ina iyo wawayisi i bada Pikol. 27 Ivi aroba inekiibau na Aisiki ivona bo, “Rorova kovi kawapateku na kokwaviniku da akiibutawemi. Ma wekarakava na avi kubiine kopisi kuriku?”

28 Ivonapotei bo, “Wekarakava kakovi da Bada gwabimuwai. Kanotanotai da tam ma tokai na vivaghina kata berai. Kakayokayowei da kurikai kuna vonakiiyapa 29 da ke kuna kiiviberokai. Rorova tokai bade ke kata kiiviberom, kakoyagha bubunim da damonai na nuwanubiiyai kavonatawem da akii dobu kukuyowei. Ma karako kakitai da ivi biibiinim.”

30 Vaghina ma, Aisiki kamporagha ghamana iberai kubiisi da ikam ma iuma. 31 Mara itom ma mara boiboiyai peyarisi vivaghina iberai, sagosago duma vonakiiyapa bagibagina iterei. Nani murinai Aisiki ivi kiikiiwesi ma nuwanubiiyai ivonatawesi da inae.

32 Inae ma murinai na Aisiki ina bigabiga wawayisi inekiibau ma ivonei da dogo sago iyabai. Nuwabiibiiyai ivona bo, “Okowa kapanani!” 33 Ma Aisiki dogona ivi vavei ‘Siba’*Hibru gamonai ‘Siba’ iyamna ‘vonakiiyapa bagibagina.’ ma kwanatu nani dobunai ivowai kana vava ‘Beyaseba.’†Hibru gamonai ‘Beyaseba’ iyamna ‘vonakiiyapa bagibagina ina dogo.’ Ma karako kwanatuna patana da emakamakai ma kana vava ke ita virai, kana vava Beyaseba.

34 Aisiki natuna Iso kana madegha 40 na Hiti wivine ruwa iravaghisi. Sago na Beri natuna Juditi, ma kana viruwa na Elon natuna Basemati. 35 Iso nani wivinesi iravaghisi na Aisiki da Rebeka i yawasa ivi beroi ma nuwapoya ghamana iveresi.