1 Jeikap bade ivomiiri inenae da God ina aneaneya ketiyai iverupotesi. 2 Ikitisi na ivona bo, “Weni tuna na God ina taki.” Tuna kubiine nani gawarina ivi vavei ‘Mayanaim.’*‘Mayanaim’ iyamna ‘taki ruwa.’

3 Inenae na yonayona ivonatawesi ivi nao ina tuwa Iso kurina, Edom dobuna kamonai, dobuna kana vava sago na Seya. 4 Ma ivonaviyoyovanesi bo, “Konae da aku bada Iso kana sisiya weni nakanani kovonei, ‘Taku na am bigabiga Jeikap ma ani akovim da weni marana gurigurina Leiban yavata kamakamakai da karako na weni. 5 Taku gwabikuwai na kau, donki, sipu, gote ma bigabiga wawayisi tomotomowisi ma wivinesi. Ma wekarakava na sisiya avonavonatawei tam aku bada kurim. Ainowi da kade kuni vaghinei da tam ma taku tinuwasago bo kegha.’ ”

6 Yonayona wawayisi ivovira Jeikap kurina ma ivonei bo, “Tokai kanae am tuwa Iso kurina ma tuna na namada epipisi da ina verupotem ina wawaya ivi 400 yavata.”

7 Jeikap weni sisiyina ivi yanei na iyabumana ma ivi nuwapoya kirakai. Ina wawaya ivorereghisi da koroto ruwa iyamoni ma nakanani bade ina sipu, gote, kau ma kamel yavata. 8 Inota da Iso ina pisi da koroto sago ina ravisi na koroto sago na inonagha.

9 Vaghina ma Jeikap inipowana ina doboro Abraham da ina mamai Aisiki i God kurina, ivona bo, “Bada tam kuvoneku, ‘Kevovira am ku dobu, am rakaraka kurisi ma ana berai da am mura ina rakata.’ 10 Taku ke wawaya kiimatana ma kegha da am agabiibai ma am nuwaviina kuriku irakata da bera biibiisi ipeyari kuberai taku am bigabiga kubiiku. Rorova kava imakuwai na diwona kava ma Jodan okowina adamani ma karako na aku koroto ruwa itupuwa. 11 Ma aniponipowana da kevi tarapaparaneku da aku tuwa Iso ke ina kiivunuku, iyamna ayabuyabumana da ina pisi na ina raviku ma bade maduwa mau natunatusi yavata ina ravisi. 12 Kenotai da kuvoneku bo, ‘Vonavaghata, ana berai da am mura ina rakata ma ana berai da tupurereghim ina peyari da nakanani ma gonugonu kikirai, iyava kavakavana.’ ”

13 Didibarai Jeikap nani dobunai ikena. Mara itom na aviyavisina gwabinai na biibiisi ivovinesi da ina tuwa Iso ita puyoi. 14 Weni nakanani ivovinesi. Gote wivinesi ivi 200 ma bade tomotomowisi ivi 20, sipu wivinesi ivi 200 ma bade tomotomowisi ivi 20. 15 Ma kamel ivi 30 wivinesi ere natunatusi ma kau wivinesi ivi 40 ma tomotomowisi ivi 10. Ma bade donki wivinesi ivi 20 ma tomotomowisi ivi 10. 16 Ivinesi ikovi na iyavo nununai itura ma ina bigabiga ivonesi da sagosago duma na yavosi ita koyaghisi. Ma ivona bo, “Kovi nao, ma kokitaruvai da taraboga nani yavosi basusiyai ina makai.”

17 Ma vinoraveraveyana wawayina sisiya bagibagina iverei, ivonei bo, “Aku tuwa Iso ina nepotemi ma ini tarakiiyanem, ‘Tami iyi ina wawaya ma mike konenae ma weni ghamoghamosi maghinomiyai na iyi rapenai?’ 18 Ma weni nakanani kuna vonapotei bo, ‘Am bigabiga Jeikap rapenai. Ma weni ghamoghamosi ivonatawei tam ina bada kurim, ina puyom. Ma wawayina na murikiiyai vaghata epipisi.’ ”

19 Ma bade bigabiga wawayisi kana viruwa da kana viaroba ma iyavo kava nani yavosi ivivi noravesi na peyarisi sisiyina sago iveresi. “Iso kona panapanani na bade sisiyina sago kovonei. 20 Ma konota bogai da weni nakanani kona vonei, ‘Am bigabiga Jeikap murikiiyai vaghata epipisi.’ ” Jeikap namada ina nota irereghi da ivona bo, “Weni puyosi ana vonatawei ini nao da aku tuwa nuwanuwana ani nubai. Muriyai ana nepotei na aku berona ina notatawei.”

21 Vaghina ma Jeikap ina puyo ivi nao inae ma tuna na ina takiyai ikena.

22 Nani didibarinai Jeikap ivomiiri da kakawana ruwa ma ina bigabiga wivinesi ruwa ma natunatuna tomotomowisi ivi 11 irutinisi da Jaboki okowina ivi damanisi. 23 Ivi damanisi ikovi ma murinai na bade ina sawara kudubina ivi damani. 24 Ma Jeikap ina kina kava imakai.

Ma tomowa sago ipisi da yavata ivi vowa inene da gisina kava da mara iti kwata. 25 Ma tomowina damina iviiya da ke ruvaruvana da Jeikap ita ghetani na ivororona da Jeikap geyageyana ikiitovoni. Ma vaghina ivivi vowa kamonai ma Jeikap damina iviiya da geyageyana itamotawe. 26 Muriyai tomowina ivona bo, “Mara ikwata ma kevotereku ana nae.”

Ma Jeikap ivonapotei bo, “Kuni biibiiniku na ana voterem da kuna nae.”

27 Tomowina Jeikap ivi tarakiiyanei bo, “Kam vava iyai?”

Ma ivonapotei bo, “Jeikap.”

28 Vaghina tomowina ivona bo, “Kam vava Jeikap na karako ikovi. Tam na God ma wawaya yavata kovi vowa da kughetanisi, tuna kubiine kam vava vuna na ‘Israel.’†Hibru gamonai ‘Israel’ iyamna ‘God yavata ivi vowa.’ Nani vavana iverei, ivi matakira da Jeikap ina yawasa kamonai, nuwapoya bogii ma bogiiyai ighegavovori. ”

29 Vaghina Jeikap ivona bo, “Ma kade kam vava kuta voneku.”

Ma tomowina ivonapotei bo “Avi kubiine kekayokayowei da kaku vava kunakovi?” Ivi sisiya ikovi na Jeikap ivi biibiini.

30 Tuna kubiine nani dobuna ivi vavei ‘Peniyel.’‡Hibru gamonai ‘Peniyel’ iyamna ‘God maghighina.’ Jeikap nani dobunai ivona bo, “God yavata kavi kitapoteyana ma patana da taku yawayawaku, ke ata rabobo.”

31 Madegha ighetawei igheghae ma Jeikap, Peniyel ikiibutawei ma geyageyana itamotawe kubiine ivivi sike. 32 Tuna kubiine nani maranai da ku karako na Israel damsi na ghamoghamo viyosi geyageyasi baranai ke ita kamkam. Tomowina Jeikap geyageyana ikiitovoni da ikiitawei.