1 Mara sago God ivi sisiya Jeikap kurina, ivonei bo, “Kevomiiri kuna nae ku Betel da nani dobunai kuna makai. Ma nani dobunai suwara kana kema kevowai taku God kubiiku, taku rorova arumatara kurim maranai varesim Iso yabumanina kuveraverau.”

2 Tuna kubiine Jeikap ina rakaraka ma iyavo kava nani dobunai ivivi makiiyana na ivonesi bo, “Ami kokoitau kudubina kovi tawetaweyana ma kovovunagha meyemi ma kami gara biibiisi kovi kote. 3 Wekarakava na tanae ku Betel ma nani dobunai suwara kana kema ana vowai God kubiine. Tuna aku nuwapoya peyarina kamonai iviteku ma mike anenae na mara nonowa gwabikuwai.” 4 Ma vaghina peyarisi i kokoitau iviiya da iverei ma kii tinayodi ivivi kote na ivi votaweyana da bade iverei. Jeikap kudubina iyuna ma inae da Sekem kwanatuna baranai ‘oak’ kiina kunukununai idogo. 5 Idogo ikovi na ina wawaya yavata ikiibau da inae. Ma meyagai kudubisi nani dobuna kamonai wawaya ivivi makiiyana na yabumana ikunisi da ke ita verukivinisi ma ke ita kayaya kurisi.

6 Jeikap ina wawaya yavata inekiibau ku Betel (kana vava sago na Lus), Keinan dobuna kamonai. 7 Ma nani dobunai wakima ivi dabura da suwara kana kema ivowai ma dobuna ivi vavei, ‘El Betel’*Hibru gamonai ‘El Betel’ iyamna ‘Betel ina God.’ iyamna nani dobunai God irumatara kurina maranai varesina yabumanina iveraverau.

8 Nani dobunai imakamakai na Rebeka kana koyakoyagha kana vava Debora irabobo. Tuna kubiine inae Betel baranai ‘oak’ kiina imiimiiri na rogunai idogoi ma dobuna ivi vavei ‘Alon Bakuti.’†Hibru gamonai ‘Alon Bakuti’ iyamna ‘tou kiina.’

9 Rorova Padan Aram‡Padan Aram kana vava sago na Northwest Mesopotemiya. dobunai ivovira ku Betel na God inekiibau Jeikap kurina da ivi biibiini. 10 Ma ivonei bo, “Kam vava ana virai da ke Jeikap. Karako ma nake na kam vava vuna na ‘Israel.’§Hibru gamonai ‘Israel’ iyamna ‘God yavata ipaparana.’ ” Ma vaghina, tuna maranai ivi vavei Israel.

11 Ma God ivona bo, “Taku na ‘God Rewapana Kirakiina’**Hibru gamonai ‘God Rewapana Kirakiina’ kubiine ina vona bo, ‘El Sadai.’. Ma kevi tuwa kirakai da tupurereghim ina peyari da dam ma dam ma kiikiivavo na tami kamomiyai ina kiibau. 12 Ma tano rorova Abraham da Aisiki averesi na karako tam avereverem ma bade murimuwai tupurereghim ana veresi.” 13 Ma vaghina God, Jeikap ikuyowei.

14 Nani murinai Jeikap wakima sago ivi miirini. Ma wain da oira ku tepana itepoi ivi matakira da nani dobunai God kurina ivi sisiya. 15 Ma gawarina kana vava ‘Betel.’††Hibru gamonai ‘Betel’ iyamna ‘God ina numa.’

16 Jeikap ina rakaraka yavata Betel ikuyowei ma inenae da keta borinai karakava da ku Eperati ita nekiibau ma Risera damina iviiya da iti tuwa ma ipanani da ina inivisi irakata. 17 Ma ina inivisi irakarakata na ina vivowavowa wavinena ivona bo, “Ke kuna yabumana, iyamna natum na bade tomowa.” 18 Ma kegha, Risera damina iviiya da iraborabobo ma muriyai da yatupona ita tapurai na natuna ivi vavei ‘Ben Oni.’‡‡Hibru gamonai ‘Ben Oni’ iyamna ‘aku nuwapoya kamonai natuku avi tuwei.’ Ma muriyai Jeikap natuna ivi vavei ‘Benjamin.’§§Hibru gamonai ‘Benjamin’ iyamna ‘natuku biibiina ina panani.’

19 Risera irabobo na Eperati ketana baranai idogoi. Dobuna karako tavonavonei bo, ‘Beteliyem.’ 20 Ma dogona tepanai na Jeikap wakima ivi miirini da karako weni ku marana nani wakimina imatakira da nani dobunai Risera idogoi.

21 Jeikap, bo kana vava vuna na Israel, na inae Eperati kwanatuna ikuyowei ma inenae da Migidal Ede nevanai ina yobe itini ma imakai.

22 Jeikap nani dobunai imakamakai ma kamonai Ruben irui da Biliya yavata ikena. Biliya na Risera ina bigabiga wavinena ma Jeikap ivi kawanei da yavata imakai. Jeikap sisiyina ivi yanei da nuwanuwana ipughu kirakai.

Jeikap natunatuna tomotomowisi ivi 12.

23 Liya natunatuna na Ruben (tuna Jeikap natuna iyarokona), ma bade Simiyon, Livai, Juda, Isaka ma Sebulun.

24 Risera natunatuna na Josepa da Benjamin.

25 Risera ina bigabiga wavinena Biliya natunatuna na Dan da Napitali.

26 Liya ina bigabiga wavinena Silpa natunatuna na Gedi ma Asera. Weni tomotomowisi peyarisi na Padan Aram kamonai itupuwamakai ma Benjamin ina kina kava na kegha.

27 Jeikap inae ina mamai Aisiki kurina ku Mamre, tuna Kiriyati Aba kwanatuna baranai, dobuna kana vava sago na Hibron. Kunona ina doboro Abraham ma ina wawaya nani dobunai ivivi makiiyana. 28 Ma vaghina, Jeikap ina mamai Aisiki imakai da kana madegha 180. 29 Imakai inae da imorapa kirakai ma irabobo ma natunatuna Iso da Jeikap idogoi.