1 Ma naga sago ivereku da aku ruvaruva ma ivoneku bo, “Kenae da God ina Taparoro Numana ma suwara kana kema keruvai. Ma bade kamonai iyavo kava evovokavakavara na kevi yavisi.*Ezek 40:3; Zech 2:1-2 2 Ma Taparoro Numana kupunai gari na kevoterei, ke kuna ruvai. Tuna garina kamonai na kupuna damsi kii gawara, iyamna iyavo kava ke ita vivitumaghaneku na averesi. Ma ti damsi na nani kwanatuna vovokaravina Jerusalem ini tugudagudai da nawaravi 42 ina kovi.*Nawaravi 42 na mara 1,260. *Luk 21:24 3 Ma aku peroperoveta ruwa ana vinesi da kubiiku vonavaghata ini mamatarei ma rewapana ana veresi da mara 1,260 kamonai gara dumadumasi ini kote ma aku sisiya ini yonayonei.”†Gara dumadumana na ‘sackcloth,’ tuna nakanani ma kamboro kana begi rasirasina ma Israel damsi gote vunivunina dumadumanai garana iyamoni da siyapa kubiine ikote.

4 Nani vimamatara wawayisi na oliv kiisi ruwa ma ti na bade rampa kii tutura gawarisi ruwa da dobu kana Bada maghinonai emiimiiri.*Zech 4:3, 11-14 5 Ma iyavo kava ina vivipaparana da iti gubagisi na nani vimamatara wawayisi kawasiyai keyama yebayebarina ina kiibau da ina karagavovorisi. Iyavo kava ina vivighaviyesi na nakanani ina rabobo. 6 Weni vimamatara wawayisi i rewapana emakamakai da maranai God ina sisiya ina viviyonayonei na kwavu ina gudui da garewa ke ina katuna. Ma bade rewapana gwabisiyai da okowa kudubina ina berai da ini tara. Ma i ku kayokayowanai ina beraberai da dobuwai nuwapoya ghamaghamasi bogii ma bogiiyai ini turagudei.*1Kgs 17:1; Exod 7:17-19; 1Sam 4:8

7 Ivi ruwa God ina sisiya ini mamatarei ina kovi na ghamoghamo kayakayayina Abis bonaghina kamonai ina ghae ma yavata ini ruwa da ina ghegavovorisi ma ini kiivunuwana.*Dan 7:7, 21; Rev 13:5-7, 17:8 8 Ma Jerusalem kamonai tupuwisi ketiyai ini keneyana. Tuna kwanatuna kamonai i Bada ituparatui da irabobo. Ma bade kwanatuna kana vava ikwatuviiviiyakei da Sodom bo Egypt.‡Ikwatui Sodom bo Egypt iyamna Jerusalem na nani dobusi nakanani, kamonai wawaya i berabero irakata. *Isa 1:9-10 9 Ma tupuwisi ke ina dogoi da mara aroba ma ku tepana na mara nevanevana kava§Mara 3 1/2 ketiyai ini keneyana da nani kamonai na wawaya dam ma dam kamosiyai, i dobu ma gamosi bogii ma bogiiyai, peyarisi ina pisi ma ina gayomakiiyesi. 10 Ma nani vimamatara wawayisi irabobo kubiine na wawaya peyarisi dobuwai nuwanuwasi ina biibii kirakai da ini puyovivirana, iyamna nani vimamatara wawayisi inekiibau na nuwapoya ma vikamyuyuwa ghamana ipiyei weni dobuna makamakiisi kurisi. 11 Mara aroba ikovi ma mara kana viruwamaruwa madegha punai nakanani ma God yana yawayawana itawei da nani peroperoveta raborabobosi ku kamosi na bade iruyawayawa ma ivomiiri. Ma iyavo kava ikitisi ivovomiiri na iyabumana kirakai.*Ezek 37:10 12 Muriyai na peroperovetisi ivi yana da kunumai gamo ghamana ioru da ivonesi bo, “Koghae wike.” Kii ghavighaviya ikitakitisi ma kwavuwai ighae ku kunuma. 13 Ma nani maranai nukenuke ghamana itupuwa da kwanatuna nevanevana**Nevanevana iyamna na 1/10. iugurikai da wawaya ivi 7 tausan irabobo. Ma iyavo kava ke ita rabobo na iyabumana kirakai da God kunuma makamakiina kana kadara kubiine ivi gheghena kirakiiyei.*Rev 6:12, 16:18

14 Kokitai, weni tuna na nuwapoya kana viruwa itatawei ma kegha da nuwapoya kana viaroba na gisina kava ma ina nekiibau.

15 Muriyai na aneya kana vimiikovimaruwa ina ture iuveni na kunumai gamo ivivi kiirareyana bo, “Karako dobu kudubina na ita Bada God ma ina Vivinevine Wawayina yavata rapesiyai da ini badei. Ma God ina vikiivavona ina makii nonowa.”*Exod 15:18; Dan 2:44, 7:14, 27 16 Ma magumagura ivi 24 i vikiivavo gawarisi tepasiyai imakamakai na kudubisi ivomiiri ma God maghinonai ivi tuwaporeruruwana ma itawotesi ioru da maghitepasi dowa ikiitovoni ma ivokavakavari. 17 Ivonavona bo,

19 Ma kunumai God ina Taparoro Numana ivotawei da kamonai na vivaghina makamakiina kana Aki akitai. Ma namanamara ma gugura ma bade warikeyakeya da nukenuke ma garewa pakapakana nakanani ma wakima iororu.††Garewa pakapakana: Garewa pakapakana nakanani ma wakima iyamna na hail bo ice. *Rev 8:5, 16:18, 21