Colosenses
¿Jesucristoga Tayta Diospa wamranchu?
¿Cay pachacho y janaj pachachöpis Jesuschu mas munayniyoj caycan?
¿Pitaj isquirbiran? Apóstol Pablumi yanapajnin Timoteo mösuwan ishcan cartacuran.
¿Picunapätaj isquirbiran? Cay cartata isquirbiran Colosas siudächo caycaj ermänucunapämi. Chay ermänucunaga llapan-japuymi mana Israel runacunalla caran. Colosas siudäga Éfeso siudäpita pachac pichga chuncan (150) kilömetruchönömi caycaran. Laodicea marcacho caj ermänucunawan rucanacuypa liguinanpämi cay cartata apachiran (4.16).
¿Imaytaj isquirbiran? Romachöna carsilcho caycashanpitami wata 61 d.C. wichan cay cartata isquirbiran.
¿Imataj cay cartacho caycan? Epafras caran willacur Pabluta purïshej. Pay caran Colosas siudäpitami. Paymi Colosaschöga inlisyata camacächiran. Epafrasga Pabluta watucur willaparan Colosas inlisyacho imanöpis caycashanta (1.7,8). Pablo quiquinga manami imaypis Colosasman aywaranchu (2.1).
Cay cartacho niycan yachacushanta mana gongaypa goyänanpämi (1.23; 2.6–16; 3.1). Pullancamaga ermänucunata willapaycan alli willacuyta chasquicushan rasun caj cashantami (1.11–22; 2.2, 3, 6, 7, 9–15). Nircur willapaycan waquin yachachicojcuna imanöpis cawashanta. Waquin yachachicojcunaga laycunata yapaj «Ama töpaychu», «ama micuychu», «ama yataychu» nir (2.21).
Capítulo 3 y 4–cho rimaycan Tayta Dios munashanno caway imano cashantapis. Manami «cayno-wacno ruray» nishanta cumlirchu cawananchi. Chaypa ruquin Tayta Jesucristo cawarircur munayninwan yanapämaptinchïmi allillata rurar cawanchi (3.1). Chaynömi cawananchi inlisyacho y wasinchïchöpis. Manami japallan shuyni cawacunanpächu niycan. Pablo niycan «cuyapänacuy» «tantiyachinacuy» «perdunanacuy» «cuyanacuy» nirmi. (3.12–4.6).
Capítulo 4.7–18 Colosascho caj ermänucunata Pablo wamayaycan. Nircur dispidicuycan.
1
Carta gallaycunan
1-2 Colosas siudächo caycaj ermänucuna:
Noga Pablumi gamcunaman cay cartata apachimö. Timoteopis salüdunta apachicamunmi. Nogataga Jesucristupa apostulnin canäpaj Tayta Diosninchïmi acramasha. Tayta Diosninchi, [y Taytanchi Jesucristo] cuyapaycushunqui ari alli cawanayquipaj.
Ermänucunapaj Pablo Tayta Diosta mañacushan
Jesucristupa papänin Tayta Diosta gamcunapaj cada mañacuyllämi simri agradësicuycä. Nogacunaga mayashcämi Jesucristuman yäracurcaycashayquita, ermänucunatapis cuyarcaycashayquita. Chayno cawarcaycanqui Tayta Diospa ñaupancho imaycamapis cawanayquipaj cashayquita musyarmi. Tayta Diospa ñaupancho cawanayquipaj cashayquitaga musyashcanqui Jesucristupa alli willacuyninta chasquicurmi. Jesucristupa alli willacuynin gamcunaman chayamushanga may-chaymanpis mayacaycanmi. Chay alli willacuyta chasquicurmi runacuna allina cawarcaycan. Gamcunapis Jesucristupa alli willacuyninta chasquicushayquipita-pachami musyashcanqui Tayta Dios cuyapäcoj cashanta. Chay alli willacuytaga gamcunata willapar yachachishurayqui ermänunchi Epafrasmi.* Col. 4.12; Film. 23 Paymi nogata willacäshimaran. Jesucristupa sirbejnin carmi gamcunatapis willapäshurayqui alli cawayta tarinayquipaj. Epafras chayaycamurmi willamasha Espíritu Santu yanapäshuptiqui fiyupa cuyacoj caycashayquitapis.
Chayta musyashä junajpita-pachami waran-waran gamcunapaj Tayta Diosta mañacuycä. Chaynöpis mañacuycä Espíritu Santu yachayta goycushunayquipaj, Tayta Diospa buluntäninta musyanayquipaj. 10 Chaynami pay munashanno imaypis cawanquipaj. Gamcunaga cawanquipaj Tayta Diosta manchapacurmi, pay munashanta rurarmi. 11 Tayta Diosta mañacurcaycä munayninwan yanapäshunayquipaj, llapan rurashayquicunapis alli llojshipäshunayquipaj; ima päsashuptiquipis pasinsacur mana yamacaypa yäracunayquipaj. 12 Chaynöpami cushicushpayqui Tayta Diosninchïta agradësicunquipaj. Paymi salbasha-cashunqui acrashan cajcunawan iwal achicyaycaj syëlucho cawanayquipaj. 13 Paymi salbamashcanchi chacajpa munaynincho caycajta.* Efe. 6.12 Nircorga Cuyay Wamranpa maquinmanna churamashcanchi. 14 Chay Cuyay Wamran Jesucristo yawarninta jichashanpitami Tayta Diosninchi juchanchïcunata perdunar salbamashcanchi.* Efe. 1.7
Jesucristo llapanpitapis mas munayniyoj cashan
15 Tayta Diosta imaypis mana ricasha captinchïpis,
wamran Jesucristumi musyachimanchi pay imano cashantapis.
Payga caycarannami Tayta Dios manaraj imata camaptinpis.
16 Paywanmi Tayta Diosga camaran llapan ima-aycatapis
syëlucho cajcunata cay pachacho cajcunata,
ricacajcunata mana ricacajcunata,
munayniyoj anjilcunata, espiritucunatapis.* Efe. 6.12
Llapantapis camaran Jesucristuwanmi y paypa maquincho cananpämi.
17 Imapis manaraj captinmi Jesucristoga mayna caycaran.
Tayta Dios llapan camashancunapis Jesucristupa maquinchömi caycan.* Juan 1.1–3, 18; Heb. 1.2–3
18 Jesucristumi inlisyapa mandajnin car juc cuerpupa umanno caycan.
Inlisyanami cuerpuno caycanchi.
Paypitami inlisyaga cuerpuno cawaycan.* Efe. 1.22–23; 4.15
Chaypämi rimir-puntatapis cawarimusha.* Hech. 26.23; Apoc. 1.5
Chaynöpami Paypa maquillancho llapanpis caycan.
19 Tayta Diosninchëga quiquinmi camacächiran payno Jesucristupis cananpaj.
20 Jesucristu-raycumi Tayta Diosninchëga llapan camashancunatapis alli ricaycan.
Jesucristo cruscho wañur yawarninta mashtashanpitami
cay pachacho cajcunatapis syëlucho cajcunatapis
Diosninchëga alli ricaycan.* Efe. 2.16
21 Ñaupataga mana allicunata rurarmi, juchallayquicho cawar Tayta Diospita carucho y contran caycarayqui. 22 Cananmi ichanga Jesucristo wañuyninpa Diosninchi chasquishurayqui, paypa ñaupanchöna gamcuna juchaynaj canayquipaj. 23 Ñaupancho imaycamapis cawananchïpäga Jesucristuman imaypis yäracur alli willacuyninta wiyacur cawashun. Payman chaynölla yäracushpayquega imaycamapis paypa ñaupanchömi cawanquipaj. Chay alli willacuytaga may-chaychöpis willacurcaycanmi. Nogapis chay willacuyta willacuycämi.
Ñacarpis Pablo Tayta Diospa alli willacuyninta willacushan
24 Jesucristupa willacuyninta runacuna chasquicuptinmi willacushäpita runacuna ñacachimaptinpis mana llaquicöchu. Jesucristo gamcunapaj ñacashannömi nogapis gamcuna-raycu ñacar cushisha caycä. 25 Gamcunata cuyaparmi Tayta Diosga churamasha gamcunata yanapänäpaj. Chaymi Pay musyachimashancunata musyaycächë.* Efe. 3.2 26 Unayga chaycunata runacuna manami musyaranchu. Cananmi ichanga payman yäracojcunata Tayta Diosninchi musyachishana imano cashantapis. 27 Chaymi musyanchi, mana Israel runacuna caycaptiquipis gamcunawan Jesucristo caycashanta. Chaynöpami musyanchi may-chaypita carpis Tayta Diospa ñaupanman chayananchïpaj cashanta.
28 Nogacunaga Jesucristupita willacurmi llapan runacunata sumaj tantiyachir willapaycä. Sumaj yachaycächë Jesucristuta chasquicojcuna Tayta Dios munashanno cawananpaj. 29 Chaypämi imano ñacarpis Jesucristo munayninwan yanapämaptin willacur puriycä.

*1:7 Col. 4.12; Film. 23

*1:13 Efe. 6.12

*1:14 Efe. 1.7

*1:16 Efe. 6.12

*1:17 Juan 1.1–3, 18; Heb. 1.2–3

*1:18 Efe. 1.22–23; 4.15

*1:18 Hech. 26.23; Apoc. 1.5

*1:20 Efe. 2.16

*1:25 Efe. 3.2