Habacuc
Imayllaga Tayta Diosta tapushcanquichu ¿imaycamataj chayno caycanga? nir.
¿Imanöpataj Tayta Diosga fiyu runacunawan castigachinman alli runacunata?
¿Pitaj caran? Waquin yarpan Habacuc juti «macallay» ninan cashantami. Cay librucho manami musyachimanchïchu ima famillya cashanta ni may marcapita cashantapis.
¿Maychötaj willacuran? Habacucga Judá nasyunchömi profëta caran.
¿Imaytaj willacuran? Habacuc willacuran Babilonia nasyunna munayniyoj nasyun ricacuycaptinmi. Ichanga cay willacushan caycan Babilonia runacuna manaräpis Jerusalenta charishan-wichanmi. (612–599 a.C.).
¿Imataj caycan cay librucho? Habacucga Tayta Dioswanmi chasquipänacuypa parlaycan. Imanir Tayta Dios ruraycashantapis tapuycan. Chayno quijacurpis Habacuc musyanmi Tayta Diosga jucha rurajcunata mana awantashanta, Judächo mana alli ruraycunalla caycashanta (1.2–4). Chaymi Tayta Dios niycan Judäcunata castigananpaj Babilonia runacunata aywaycächishanta (1.5–11). Chaypis profëta Habacucga manami tantiyayta atipanrächu (1.12–17). Chaura Tayta Dios yapay niycan profëtaga sïguir Tayta Diosman yäracur shuyaycänanpaj (2.2–4), y ollgoj fiyu runacunapis llapan iwal ushacänanpaj cashanta (2.4–20). Chaynöpis profëta Habacuc mañacuycan acrashancunata Tayta Dios yapay jorgunanpaj. Ichanga imano captinpis Tayta Diosllaman yäracuycan.
1
1 Tayta Diosmi imano cananpaj cajtapis profëtan Habacucta ribilaran. Chayga caynömi caran:
Habacuc llaquicur mañacushan
2 Tayta Dios, ¿imaycamaraj gayacaycämushaj yanapämänayquipaj?
Gayacamuptëpis gamga manami wiyamanquichu.
Fiyupa mana alli ruraycuna caycho captin
¿imaycamaraj mañacaycämushaj?
Chaypis gamga manami shamunquichu nogacunata salbamänayquipaj.* Job 21; Sal. 13.1–2; 73.4–14; Jer. 12.1–4; 14.9; Apoc. 6.10
3 ¿Imanirtaj ricachimanqui
fiyupa llaquicuycunatawan mana alli ruraycunata?
Noga goyaycashächöga caycan mana alli rurayllami, wañuchinacuyllami.
May-chaychöpis caycan rimanacuyllami, pillyallami.
4 Laytaga pipis manami cumlinnachu.
Pitapis manami alliga arriglannachu.
Fiyu cajmi alli runata gaticachan.
Chaynöpami mana allina arriglanpis.
Mañacuptin Tayta Dios nishan
5 Tayta Diosnami cutichir niran:
«Masqui ricay nasyuncunata.
Masqui ricay imano päsaycashantapis.
Fiyupa manchariypajcunata ruranäpämi caycä.
Imano ruranäpaj caycajtapis willashuptiqui
gamcunaga manami riguinquimanchu.* Hech. 13.41
6 Caldea runacunatami camaricachej-aywä guërraman aywananpaj.* 2Rey. 24.2
Paycunaga fiyu runacunami.
Juc nasyuncunata charicarcärinanpaj may-chaypapis purin.
7 Paycunaga fiyupa manchacuypämi.
Quiquincuna yarpashallantami imatapis ruran.
Paycunaga quiquincunapa laynillantami bälichinpis.
8 Tinricunapitapis masrämi cawalluncunapis cörriycärin.
Fiyu cayninpis löbu animalcunapita masrämi.
Suldäruncunapis cawalluta muntacarcärerga wayranörämi aywaycärin.
Pillyamanga carupitami yagacaycärin anca carupita chipsaman aywajnöraj.
9 Aywar tincushan cajtaga pï-maytapis wañurachinmi.
Llapantami manchachin.
Prësu apashancunapis caycan
lamar cantuncho agushpita mas aypallarämi.
10 Juc nasyunpa raynincunataga asipanmi.
Chaynömi ruran mas rispitädu runacunatapis.
Curalaraj siudäcunata ricarpis asicunmi.
Chaycunamanpis paycunaga patata ruraycurmi yaycun.
Nircorga chay siudäta charicarcärin.
11 Chay runacunaga löcu wayranömi purin.
Paycunaga callpallanmanmi yäracun.
Paycunapäga Dios manami cajnöchu.»
Habacuc llaquicur yapay mañacushan
12 Tayta Dios gamga Santo Diosmi canqui.
Imaycamapis cawaj cashpayquimi nogacunata wañunäpita salbaycämanqui.
Imapitapis chapämaj gagano caycaj Tayta Diosnë,
gammi Caldea runacunataga yanapashcanqui
munashayquino yarpaycashayquita rurananpaj.
13 Gamga limyu juchaynaj cashpayquimi mana alli ruraycunataga mana munanquichu.
Runa-masinta ñacaycächejtaga manami ricapaycanquimanchu.
Chayno caycarga ¿imanirtaj mana rimapayllapaga ricapaycanqui chay wañuchicojcunata?
¿Imanirtaj upällalla cacunqui chay fiyu runacuna alli runacunata illgaycächiptinpis?* Sal. 5.4–6
14 Gamga lamarcho caycaj tucuy casta pescäducunatanöllami ricaycämanqui.
Chaycunataga mandajniynajllatami rurashcanqui.
15 Caldeacunataga pescäduta charejtanömi churashcanqui.
Paycunaga ansuylawannöpis, redawannöpis nogacunata chariycäman.
Nircorga juc pachallaman shuntaycur fiyupa cushicun.
16 Chayno ruraptinmi paycunapaga can alli micuynin.
Chayno rurarmi redancunata ansuylancunata aduran.
Nircorga redanpa jutincho sacrifisyuta rupachin; insinsuwanpis saumachin.
17 Runa pescäduta charishano ¿jinallachuraj Caldea runacunaga charircaycämäshun?
¿Chaynöllachuraj mana cuyapaypa runacunata wañuycächenga?