Hebreocunaman Cartacuśhan
Israel caśhtacunätam “Hebreo” nipäculatac.
Chay timpucuna achca Israelcunam Jesusman chalapacüśha capäcula. Chay chalapaculcäśhanpïmari ñacachishacuna capäcula. Jinalmi waquinnincuna Jesus yaćhachishancunäta caćhaycul Moises puntacta nishanmannülla chalapacuyta pinsapäcula. Chaymi cay cartaćhu caycunapi limayan: Moises yaćhachishanmannuy cawsay'a camacäśhañam cayan Jesus lluy cumpliycuptin. Jesusninchic juchanchiccunapïta wañuyninwanmari Tayta Dioswan caśhan cutiycachimänanchicpä cayan. Chaymi Tayta Diospa munaynin'a Jesus yaćhachishannüllaña cawsananchic. Canan'a Jesus sasirdütinchicmi cayan. Chayurá manañam imactapis juctá lulananchicñachu. Aśhwanpa camacaycäcama ima sasachacuy ñacay śhacamuptinpis Jesusllanchicman masïsu chalapacuśhun niyan.
1
Anjilcunäpïtapis Jesus'a mas-maslämi
Tayta Diosmi unay timpućhu awquillunchiccunacta puydï willacünincunawan imaymanap imaymanawan limapäla. Canan lluy lulacacalpunan timpucunañatacmi ichá paypa quiquin chulin śhamücäwan limapaycamanchic. Paypam lluy-lluy jinantin pachäta camaycula. Paymantacmi lluy jinantinta tücaycachila. Cay chulinmi Tayta Diospa sumä-sumä allin cayninta camalaycachïnin; imanuy caśhanpis quiqui-quiquin caśhannüllamari. Paytacmi lluy imactapis sumä munayniyu limayninwan cällanćhu caycachin. Lluy nunap juchancunacta chuyanchaycachilmi janay pachäćhu Sumä Munayniyücäpa allï-lädunman taycucuycula. Chayurá caynu sumä allinninpälä ćhulaycuśha cayal'a ima cayninpis mas-maslämi anjilcunäpïtá. Nipäcuśhan śhutinpis mas-maslätacmi.
Má ¿pï anjiltatan Dios:
“Anmi chulí canqui; cananñatacmi ya'a taytayqui cá” Sal 2.7 nila?
Manatacmi pï anjiltapis:
“Ya'ami taytan caśhä. Paytacmi chulí can'a” 2S 7.14; 1Cr 17.13 nil nilachu.
Ñatac wamä chulinta cay pachäman caćhamulmi ichá niyan:
“Tayta Diospa lluy anjilnincuna alawapäcuchun” Dt 32.43-wan Sal 97.7-mi
Anjilcunapïtam nin: “Uywaynin anjilcunaca waywa-yupayllañam, ninap walayninnuy-camallam” Sal 104.4 nil.
Chulinpïtañatacmi ichá nin:
“Diosnilláy, gubirnanqui wiña-wiñaypämi. Allin tincüllanmantacmi gubirnaycunquipis.
Allincätam imaypis ama-pacha niycunqui; mana allincätañatacmi ćhïnicunqui.
Chaymi Tayta Diosniqui lluy cusca cä masanniquicunapïtapis mas jatun cushicuytalä uycul altuman juluycuśhulanqui” Sal 45.6-7 nil.
10 Chaynütacmi niyan:
“Taytay, allaycuycäćhu anmi allpäta camalanqui; janay pachäpis lulayniquim.
11 Lluy caycuna camacällamari. Amñatacmi ichá wiñaypä caycunqui. Chaycuna müdananümi lluy mawcälun'a.
12 Müdanactanümi lluy pitwïlunquipis, cambiälunquipis. Amñatacmi ichá mana imaypis cambiä canqui; mana camacä watayümi cayanquipis” Sal 102.25-27 nil.
13 Ñatac, má ¿pï anjilllactá Diosninchic:
“Cay allïnï-läduman taycacamuy ćhïnïniquicunacta ćhaquiquiman uyshuycachimunäcama” Sal 110.1 nil nilatan?
14 Cay anjilcunacá Tayta Dios salbanancunäta sirbiyta yanapänanpä caćhamuśhan ispiritucunallamari.

1:5 Sal 2.7

1:5 2S 7.14; 1Cr 17.13

1:6 Dt 32.43-wan Sal 97.7-mi

1:7 Sal 104.4

1:9 Sal 45.6-7

1:12 Sal 102.25-27

1:13 Sal 110.1