Rukas wasaniha Sesus soho ziwatahaka
Taparaka Rukasta batu Sesus tuk pão, bykyze zuba Sesus tazo bo ziksizoze ihumo tispirikporẽta niyzik. Sudeubyita tu nokponi zizuruku Toroade hudikhudikwy anaeze Pauro ibo zihobyk. Myzororowykytsa niy. Deus hyrikoso ziapewywyky iwatahi Sesus soho ziwatahaka.
1
Uta Teopiro bo piwatahaka. Kyze tapara sizubarẽtsa kytsa papeu humo botu ziwatahanaha katsa mybaze hawa tsinynaha ziwatahabanaha. Tapara zinynahatsa kino mybo nitsasobanaha Deus harere kino niwatihi nitsasobanaha. Ikia tsahyrinymyrẽta botu wasaniha soho niy. Abaka uta kino tubabatu kahyrinymyrẽta. Iwatahi uta kytsa iksipeha:
— Hawa skaraba niy — iky. Kabo sizubarẽtsa nitsasobanaha. Iwatahi uta ikia bo pykyhytu piwatahaka. Iwatatu tsipinymyry wasani tsimy. Kytsa ikia bo botu nitsasokonaha wasani hỹ. Tapara mopamykyso Sakarias soho ioke niwatihi.
Suão Batista nipuruk naha soho.
Kyze Erodes pehatsa Sudeutsa hudikhudikwy eze tuze Sakarias niy. Deus wahoro zubata eze ziknapamykysokota niy. Abias astsabarẽtsa niy Deus wahoro zubata eze nikara. Abias atsatubarẽtsa tsekokatsa ziknapamykysokonahatsitsa niwatihi. Atatsa ioke Arão tsekokatsa ikny niy. Arão niwatihi Deus wahoro eze ziknapamykysokota. Isabeu inarokotatsa. Isukzakata zikzuruku harape tuk Deus harere bo hyỹ ziknakaranaha iwatahi Deus isukzakata soho tihi:
— Wasani mynakaranaha — niy. Kytsa isukzakata soho humo wasani nikaranaha. Batu ihyrytsa ka. Iwatatsahi ibykyhy byitatsa zikzuruku. Ihyrytsa ahabyita tu nitsaikbanaha.
Kyze Sakarias Deus wahoro zubata bo niy. Anaeze Deus tuk tarabaja nikara. Ziknapamykysokota humo tarabaja nikara. Abias astsabarẽtsa tarabaja nikara. Tapara ustsa ziknapamykysokonahatsitsa ibo nitsasokonaha:
— Abaka ikiazakta! Ikia hi Deus wahoro zubata bo tsimytsuk. Tsimytsukze anaeze Deus bo jokmorẽnikia ty tyziwezoko — niaha. Hyỹ niy. 10 Deus wahoro zubata bo nitsuk. Jokmorẽnikia ziwezokoze aparakbahatsa isturupeze Deus bo nipamykysokonaha.
11 Niytahi atsoko bijoikpe iknykta Deus tsumuẽhĩtsa ibo inasik. Iwezowy baze jokmorẽnikia niriktohoko. 12 Sakarias ibo nikozoze ihyrinymyrybyita nikara. Iwatahi ipokso nipyby. 13 Bijoikpe iknykta Deus tsumuẽhĩtsa ipe niy:
— Apyby byitykta! Ikia tsikzapykykynaha Deus ziwaby. Aba aoke tabykyhy. Atse mopurukze Suão ty tsipinaro niy. 14 Ikia atse mopurukze akurẽta tsimozik. Kytsa kino niwatihi atse humo sakurẽtsa moziknaha. 15 Deus okze ka maku myhyrizikwani mozik. Iwatahi duabohotsa tsik ty ka tsõ tsõbyity my, tsõsĩ humo kino niwatihi tsõ tsõ byity. Taje arakokeze tuze Deus ituk mynapykyry. Deus hyrikoso piakse, mopurukze tu Deus hyrikoso ituk mynapykyryk hỹ — niy.
16-17 — Atse taypykze Sudeutsa Deus bozo mysioktyhyryk. Atse Erias wata mozuruku. Erias Deus hyrikoso tuk zikzuruku. Atahi Deus zikwy ziwatawy. Deus harere ziwatawyky. Atse niwatihi Deus zikwy piwatawyky. Atahi kytsa Deus zipehata weryk pizozikbawy. Izotsa mytsatyziu maha. Sihyrytsa bo mytsaty maha iwatsatu niharapepehakanaha nakokozonaha atse harere humo mykaranaha. Abaka kytsa Deus harere bo hyỹ maha. Iwaze Deus zipehata mozumuze ityryktsa botu piperykynaha — niy.
Iwaze bijoikpe iknykta Sakarias bo itse soho nitsaso.
18 Niytahi Sakarias ipe niy:
— Iwaze sa kaoke tabykyhy tsimy. Hawa sa aharere baba. Utakta ba iktsaikba kaoke kino niwatihi nitsaikba. Iwatatsatu sa tabykyhy — niy.
19 — Utakta Deus tsumuẽhĩtsa Deus tuk mynapykyryk. Utakta kanaro Kabarieu. Deus zikpehata hi abo iknasik. Iwatahi wasania ty mopamykysoko. 20 Iwatahi ikia wabyziutykta kaharere bo yhỹ ahabyita hi iwatahi tsimyharerebyri. Atse mopurukze tsipaharerezo. Kaharere ka wasaniha — niy.
21 Kyze aparakbaha Deus isturupeze ziperykynaha. Sakarias Deus wahoro ekze izoik ziperykynaha. Aparakbaha paikpa iktsa nikaranaha.
— Amy skaraba atahi Deus wahoro eze tu batu aidy puke ziky — nikaranaha.
22 Izoize niharerebyri. Sakarias Deus wahoro eze tuze itsotospyk waha zinyhik. Mytsotospyk waha ana hi zinymyrynaha. Bijoikpe iknyktsa bo iktsa niy. Myzubaha okze tu niharerebyri iwatahi tatsyhyrypetsa ty zuba pawyk nikara. Taharek ty zuba zikziwatawyky.
23 Iwaze zuba Sakarias tarabaja Deus wahoro zubata eze zepykze tawahoro bo ziksizo. 24 Taoke zityrykzuwyze tabykyhy. Estuba tsyhyrywa byzoje zetsuze tawahoro eze tu ziknapykyryk. Isabeu tihi:
25 — O Deus tsiksapywyky. Kahumo tsimypokzitsiukrẽta. Taparaka kasikpybyrẽtatsa. Kabykyhy byizeka kasikpybyrẽtatsa. Abaka batu. Batu kasikpyby. Iwatatsahi ikbykyhy hỹ. Abaka aparakbaha humo batu kasikpyby. Iwa ikbykyhy tatsatu Deus ziksikpybybyri — Isabeu nikara. Iwatatsahi Sakarias oke tabykyhy. Ibykyhyhuk byitatsa tu tabykyhy niy.
Sesus Kiristu nipuruk naha soho.
26 Kyze usta byzoje eze Deus bijoikpe iknykta Maria bo izipeha. Bijoikpe iknykta Deus tsumuẽhĩtsa Maria bo inatakaha Kabarieu inarokota. Deus zipehata. Deus ipe niy:
— Maria pe nawa tykta Kabarieu atatsa Nasare ezektatsa bo — niy.
Hyỹ niy.
27-28 — Maria ityrykduwyhybyitatsa tu tabykyhy. Ikia atatsa bo wasania ty tsimy — niy. Iwaze byri puẽtsikze Sose atatsa piakse. Sose Dawi tsekoka niy. Iwaze atatsa bo bijoikpe iknykta inasik. Atahi:
— O Deus atuk mynapykyryk — niy.
29 Tsipybyrẽtatsa iharere pokso nikara. — Hawa ha skaraba — niy.
30 — O apyby byityktsa Maria. Deus ahumo papokzitsiki. Ikia tuk mynakara. Aba tsipabykyhy. 31 Atse mopurukze Sesus ty tsipinaro. Taypykze maku myhyrizikwani mozik. 32 Aparakbaha isoho humo “Deus tse” maha. Deus tyryktsa tuk mynapykyry ba zikpyk — niy. Deus hi Sesus Sudeutsa pehatsa mozik Dawi wata, ahadiri mypehatsa wata. 33 Sesus Sako tsekokatsa pehakatsa. Sesus Deus tyryktsa tuk mypehatsa tawahi mynapykyryk.
34-35 Maria ipe niy:
— Hawa sa katyrykduwyhybyitatsa tu sa pikbykyhy — niy.
— O atyrykduwyhybyitatsa tu tsipabykyhy Deus hyrikoso humo tsipabykyhy. Iwatatsahi atyrykduwyhybyitatsa tu tsipabykyhy niy. Iwatsahi kytsa atse soho humo. “Deus tse” maha — niy.
36 — Wabyty! Ajetsy Isabeu ibykyhyhuk byitatsa tu abaka tabykyhy nitsaikbatatsa tu tabykyhy hỹ. Tapara kytsa tsasowy “batu ibykyhyhuk” nikaranaha. Abaka tabykyhy tatsa estuba tsyhyry wa byzoje zetsuze. 37 Aba itse mopuruk. Deus tuk batu amy tohi ihokdaha — niy.
38 — O nawa my. Deus pikpehaze hyỹ my. Katyrykduwyhybyitatsa tu katse mopuruk. Ikza hyỹ my — niy.
Niytahi bijoikpe iknykta hokda zuba niy. Batu ity nyzo.
Maria Isabeu bo inakozore.
39 Bykyze Maria Isabeu bo harakoso bo atsoko niparak. Isabeu wahoro bo zumu. Ana hi hudikhudikwy Sudejaka. 40 Sakarias wahoro bo paku niy. Isabeu ziharapyryk. Nipamykysoko. 41 Atatsa Maria harere ziwabyze ibykyhy iarakokeze tsakurẽta nikara iwatahi kuanare kuanare nikara. Deus hyrikoso Isabeu tuk mynapykyryk. 42 Iwatatsahi Maria bo opykani nipamykysoko:
— Deus pasapywyky. Ikia hi akurẽtatsa tynapykyryk. Awaky wytykyryk tynasiyzikwyky. Abykyhy niwatihi tsakurẽta. 43 Parakbaha okze tu ikza myhyrizikwanibyitatsa tu my. Hawa tsikytatsa ikia kapehatsa je kabo tsimynakozore.
44 Aksoho iwabyze atakta kaharakokeze tu kuanare kuanare nikara. Tsakurẽta iwatahi kuanare kuanare nikara.
45 Ikia bijoikpe iknykta Deus tsumuẽhĩtsa harere humo hyỹ tsiky. Iwatatsahi akurẽtatsa. Iwaze Deus harere humo aspirikporẽtatsa akurẽtatsa tsimy — Isabeu niy.
Maria Deus bo nisakibazikik.
46 Niytatsahi Maria Deus bo nipamykysoko:
— Ikza tihi: O Deus ikia zuba tsamysapyrẽta.
Ikia humo kakurẽtatsa.
47 Deus bo mykara zeka ipokzi kakurẽtatsa.
48 Iwatahi kabo mytsaty niy. Nanabyi humo kanamybyitatsa tu sa atsumuẽhĩtsata mozik.
Abaka myzubaha kape maha Deus atatsa humo tsimypokzitsiarẽta mykaranaha.
Wabyty! Myzubaha eze mopamykysokonaha “Deus ziktsumuẽhĩkĩ” mykaranaha niy.
Abaka aparakbaha sitsekokatsa niwatihi kasoho
“Deus atatsa humo zisapywyky” mykaranaha.
49 Deus kino atatsa tsyhyryze tsihokdaharẽna zik niy.
Atahi tsizikwyrẽta. Atahi mekywata.
50 Deus aparakbaha humo tsimypokzitsiarẽta. Iwatsahi sispirikporẽtsa moziknaha.
Abaka aparakbaha,
sitsekokatsa kino niwatihi
Deus sihumo tsimypokzitsiarẽta.
51 Deus ziwatahaka tsihyrinymyrẽta hiba. Sizubarẽtsa mytsaty maha zeka “uta zuba mypehatsa” sisopykyktsa asahi mysipykik.
Iwaze kytsa siharere tsihikbyitsa moziknaha.
52 Ispehatsa sihudikhudikwy ezektsa niwatihi mysipykik. Myhyrizikwybyitsa hi
myhyrizikwanitsa moziknaha.
53 Siarapanikitsa disahawy ka tsizubarẽna mopykyryknaha.
Sinamynikitsaktsa mysinamybyri. Batu amy tohi mykaranaha.
54 Iwa Deus Sudeutsa mysitsumuẽhĩkĩ.
Tatyryktsa mysitsumuẽhĩkĩ.
55 Tubabatu Deus harere mydiritsa ispirikze niy.
Abaka wasani niy. Sibo nitsasoko: “Ikiahatsa humo kamypokzitsiarẽta” niy.
Mydiritsa bo Abarão tsekokatsa bo iwa.
Deus taharere humo ba zikspiriktsokda
Iwa Maria Deus soho humo nikara.
56 Iwaze byzoje harakykbyihi zitsuze Maria Isabeu tuk niapykyk. Iwaze tawahoro bo ziksizo.
Suão Batista purukwy.
57 Iwaze Isabeu bykyhy nipuruk. 58 Itukytsa, iututsa pauktsitsa kino niwatihi sakurẽtsa niapykyryknaha. Isabeu tse humo sakurẽtsa. Ziwabynahaze Deus atatsa humo tsimypokzitsiarẽta, iwatsahi sakurẽtsa niyziknaha.
59 Niahatsahi izumukunaha. Iwatsahi ibykyhy tsibik pipiakzyknaha. Kyze ibykyhy tsibik mytsyhyrytsa asiba nisipykze kytsa izumunaha. Zinaro tsihikiknaha Sakarias ty izo naro ty zinaro tsihikiknaha. 60 Ije ispe niy:
— Batu zik. Sakarias humo batu inaro tsihik. Inaro babaka Suão — niy.
61 Iwaze ipe niaha:
— Ikiatsaktsa zik anahumo ka batu atukytsa naro kok — nikaranaha.
62 Niahatsahi izo pe niaha.
— Askyrywy sa tsipinaro — niaha. Sakarias niharerebyitahi iwaze kytsa ibo tahatsyhyrypetsa ty ziwatawykynaha zuba. 63 Niytahi Sakarias kino:
— Kabo iwatahawy ty nynytynaha — niy. Hyỹ niaha. Iwaze ziwataha — Inaro ka Suão. — Aparakbaha paikpa iktsa nikaranaha sipybyrẽtsa nikaranaha.
64 Iwazebabatu Sakarias inataharerezo. Tsakurẽta. Iwaze nipamykysokozo. Deus pe niy:
— O Deus ikiahi tsamysapyrẽta — niy. Iwa Deus bo nipamykysoko. 65 Iututsa pauktsitsa iwaha pokso hi sipybyrẽtsa nikaranaha. Nanabyitaba wasaniha Suão soho nitsasokonaha. Harakoso Sudeja eze tuze Suão soho ty nipamykysokonaha. 66 Ziwabynahaze mytsaty nikaranaha:
— Hawa sa ibykyhy mozik Deus zikwy ituk mynapykyryk — nikaranaha.
Sakarias Deus soho nitsasokota niy.
67 Iwaze niytahi nipamykysoko. Deus hyrikoso ituk ziknapykyryk. Iwatahi nipamykysoko. Atahi:
68 — Ikiahatsa Deus bo tsimypamykysokonaha. “Ikia hi tsamysapyrẽta.
Ikia zuba wasani tsimykara. Iwaze ikia soho humo myharereziurẽtsa tsimaha” niy.
Kyze Isareu tsekokatsa, Sudeutsa Deus humo myspirikporẽtsa.
Katsaktsa Deus humo myharereziurẽtsa. Deus tyryktsa tsimoziknaha.
Ata kino tatyryktsa bo mymyoktyhyryk — niy.
69 Deus mymyoktyhyrykta mybo myzipeha.
Mymyoktyhyrykta Dawi tsekokatsa iknykta.
Dawi mydiri Deus tsumuẽhĩtsa.
70 Tubabatu Deus simysapyrẽtsa bo nitsasokonaha
asahi Deus harere sohokotsa nitsasoko:
71 — Deus ispirikze iharerebaba mymyoktyhyryk. Iwatahi mysukyrytsitsa ba zik mybanaha.
Iwaze kytsa myhumo siakyriukrẽtsa ba zik mybanaha.
72 Deus mydiri humo tsimypokzitsiukrẽta.
Katsa myhumo niwatihi tsimypokzitsiarẽta.
73 Tubabatu Deus Abarão bo taharere baba ty niy.
Abarão taparakta mydiri niy.
74 “Ikiahatsa pahaoktyhyrykta pipeha” niy.
Abaka taharere bo mytsaty niy.
75 Mymyoktyhyrykta pipehahik my nikara.
Mymyoktyhyrykta pipeha iwatsahi mysapyrẽtsa tsimoziknaha.
Mysukyrytsitsa ba zik mybanaha.
Mysukyrytsitsa pokso batu mypyby.
Niahatsahi tyzibyituhukunahatu Deus tsipitsumuẽhĩnaha.
Deus pokso batu mypyby — niy.
76 — Ikia kaskyrywy Deus sohokotsa tsimozik.
Ikia mymyoktyhyrykta haraze tsimy.
Kiristu Deus bo mymyoktyhyryk.
77 Iwaze mozumuze sizubarẽtsa ahumo mytahazozikymybanaha.
Mymyoktyhyrykta humo mokymynaha.
Iwaze hi aparakbaha bo mopamykysoko:
“Deus sisopyksapybyikitsa nikaranaha iwatsatu mysiokzohik. Deus kino mysioktyhyryk.
Iwatsahi Deus soho humo sispirikporẽtsa.”
Ikia humo Deus soho aparakbaha sispirikporẽtsa myziknaha niy.
78 Iwaze Deus myhumo tsimypokzitsiarẽta.
Tsimysapyrẽnikita my.
79 Abaka atakta mybo bijoikpe iknykta okoro hyritywaka katsa mybo myziharamweke.
Haramwe humo iktsa mahatsa watsa mypobyri katsaktsa mymyoktyhyrykta humo myspirikporẽtsa.
Taparaka miwa ahaburuk ziknaukurunahaze ky waha.
Abaka haramwe waha niyzik.
Iwatsahi kytsa mohyrikosokdanahaze batu sipyby.
Katsa batu mykyriuk. Katsa mykurẽtsa — niy.
80 Iwaze Sakarias Deus harere nitsasoko niy. Itse taypykykze Deus harere bo hyỹ mykara. Tsipaikrẽta mozik jerukbara bo niparak. Atazuba zikziuruku. Aiba zuba Deus tyryktsa bo niy.