1 Hinokara hola sa zinama hie: Be keke tie si hiva koa na koimata pa ekelesia, si okoro nia sa si keke tinavete marilaena hola. 2 Sa koimata pa ekelesia hie, si mani koa va toṉoto, meke kaqu kekeke mo sa nana barikaleqe. Mani koa kopu na va balau, meke totoli pule nia, meke na tie ta pamaṉaena, na hoke va kamoi sa sari na votiki tie pa nana vetu, meke boka variva tumatumae,*Ta 1:6-9 3 lopu na tie naponapo, babe na tie komikomiti, ba ṉoṉo meke na tie bule, meke lopu na tie okokoro poata si asa. 4 Kaqu na tie leana si asa, sapu kopu valeana nia sa nana kinoa tatamana. Meke sari nana koburu si kaqu va tabea na pamaṉa nia si asa doduru totoso. 5 Sina be lopu kopu valeana nia sa tie sa nana kinoa tatamana soti, si lopu kaqu boka kopu valeana nia tugo sa tie hie, sa ekelesia te Tamasa. 6 Kaqu na tie komihana pa rinaṉeraṉe, meke lopu na tie tiqe kekerena si asa. Sina be lopu gua, si kote vahesi pule nia meke hoqa pa tinazutu, kekeṉoṉo gua e Setani. 7 Kaqu na tie ta pamaṉaena si asa koari pu lopu va hinokara, pude lopu kaqu tava kurekure meke tava hoqa koasa sipata te Setani si asa.

8 Meke gua tugo sari na tie varitokae pa ekelesia, si madi koa pa hahanana sapu garo pude ta pamaṉae, na zama va hinokara koari na tie, meke lopu naponapo babe hata poata pa hahanana kaleanadi. 9 Meke kaqu tuqe va ṉiṉira ia rini sa rinaṉeraṉe hinokara pa korapa bulo viana, na tinavete toṉotodi. 10 Kaqu ta podeke paki si arini, meke pana ta dogoro sapu loke tinazutudi, si kote tiqe tavetavete si arini. 11 Meke gua tugo sari dia barikaleqe, madi koa pa hahanana sapu garo pude ta pamaṉae, meke lopu kaqu vari nanaei, ba kaqu koa kopu, na ta ronuedi pa doduru ginugua. 12 Na tie varitokae si kaqu keke mo sa nana barikaleqe, meke kaqu kopu valeana ni sa sari na tuna meke sa nana kinoa tatamana. 13 Ura sari na tie varitokae saripu tavetavete valeana, si hoke koa tava lavata koari na tie, meke lopu matagutu nia rini pude tarae nia sa guguana e Zisu Karisito pa dia rinaṉeraṉe.

14 Kubere atunia rau sa leta hie, ba lopu sana kote atu dogorigo mo rau. 15 Ba be ta hukata si rau, meke lopu ture atu, ba sa qua leta hie si kote tozi nigo sapu gua leana pude tavetia goi koasa puku tatamana te Tamasa, sapu sa ekelesia tanisa Tamasa toana. Ura sa ekelesia sina dedegere sapu zuka ia sa hinokara. 16 Sa vina tumatumae hinokarana te Karisito sapu tiqe ta dogoro kamahire si arilaena hola, sapu guahe: