1 Sari na pinausu pu na tie te Karisito si madi pamaṉa zoṉazoṉa ni sari na dia palabatu, pude lopu kote ta zama va kaleana sa pozana Tamasa babe sa nada vina tumatumae. 2 Ba sarini pu tava pinausu koari na dia palabatu pu va hinokaria se Zisu Karisito, si madi pamaṉa ni tugo sari na dia palabatu, ura na tasidia pa rinaṉeraṉe si arini. Madi tavetavete valeana hola latu si arini. Ura sari na dia palabatu, pu ta tokae koari na tinavete tadi na dia nabulu, si na tasidia koe Karisito si arini, meke tataru hola ni rini sari na dia palabatu.

Mu va tumatumae ni na tarae ni koari na tie sari doduru gua pu ele tozi nigo rau. 3 Be keke tie si va tumatumae ni si kaiqa binalabala kokohadi, meke lopu vari ṉoṉoi la koa sa vina tumatumae gotogotona tanisa Baṉara Zisu Karisito meke koari na vina tumatumae hopedi tanisa nada ekelesia, 4 si na tie vahesi pulenia si asa meke loketoṉa si gilania sa. Na qetu ni na hatahata i sa sari na binalabala kaleana, sari na vinaritokei koari na ginuguadi ri na zinama, sa vinabetodi si kamo la pa vinari konokonoi, vinari ososi, zinama vari ṉoṉovali, meke na zinutu kaleadi na hoborodi, 5 meke na ninominomi loke vinabetodi. Koari na tie pu lopu hoke balabala valeana gua asa, si loke hinokara koai. Balabala ia rini sapu pude koa pa tinoa toṉotona gugua te Tamasa si kote boka tagotago nia rini, gua.

6 Na tinoa toṉotona gugua te Tamasa pu koai qinetuqetu, meke lopu okokoro likakalae, si nomana sa dia tinagotago pa maqomaqo. 7 Ura, loketoṉa si paleke nuquru mae nia gita koasa kasia popoa hie, meke loketoṉa hokara tugo si kote paleke vura nia gita! 8 Ke be ari gada ginani, na poko, si pada mo si arini koa gita. 9 Ba arini pu okoro nia sa tinagotago, si tale hoqa lamo pa tinoketoke. Ta turaṉa si arini pude ta sipata vagi koari na inokoro sea na binalabala pekipekidi sapu turaṉa lani pa tinasuna meke kamo nia rini koa sa tinahuara koa holana. 10 Ura sa tataru poata si na ṉatidi ri soku tinavete kaleadi, meke kaiqa arini pu okoro poata, si ele rizu va seu koasa rinaṉeraṉe, meke va bakora pule ni pa tinalotaṉa.

11 Ba sapu agoi na nabulu te Tamasa, si mamu govete nia sa inokorona sa poata, na gua. Mamu lulia sa tinoṉoto, na rinaṉeraṉe, na tataru, na tinoa toṉotona gugua te Tamasa. Mu turu va nabu pa totoso tinasuna, mamu koa va ṉoṉo. 12 Mu somana varipera koasa vinaripera leana pa rinaṉeraṉe koe Karisito. Mu tuqe va nabua sa tinoa hola, sapu ta tioko nia goi koe Tamasa totoso helahelae vura nia goi si asa pa kenudia ri doduru tie pu va sosode igo. 13 Pa kenuna sa Tamasa sapu ponia koari doduru tiṉitoṉa sa tinoa, meke pa kenuna e Zisu Karisito pu helahelae vura nia sa rinaṉeraṉe koe Ponitiasi Paelati, si tozi nigo rau,*Zn 18:37 14 pude mamu va tabei saripu ta tozi ni goi, pude mu koa via, meke loke tinazutumu, osolae kamo sa rane sapu kote vura pule mae se Zisu Karisito sa nada Baṉara. 15 E Tamasa si kaqu vata evaṉia koe Zisu Karisito sa Nana pinule mae pa totoso garona. Asa mo telena sa Tamasa pu va lavatia gita, sa Ṉati Hiniva tadi na ṉati hiniva, meke sa Baṉara tadi na baṉara. 16 Asa mo telena sa Tamasa sapu toa hola ninae rane, sapu koa pa korapa ṉinedalana sa kalalasa sapu loke tie boka doṉo la ia na tata ia, meke loke tie ele dogoria babe kaqu dogoria. Mani koa koa Sa sa ṉiniraṉira na vina lavata ninae rane ka rane. Emeni.

17 Mu tozi ni sarini pu tagotago koasa kasia popoa hie, pude madi lopu vahesi pule ni, meke lopu kalavarae koari na tinagotago pu lopu koa hola ninae rane, ba madi kalavarae koe Tamasa sapu poni va sokuni gita, meke va qetu gita koari soku likakalae leadi pa nada tinoa. 18 Tozi ni pude madi tavetavete valeana koari soku dia tinavete leadi, meke lopu puhi ni sari na dia tinagotago, ba pude variponi meke va hia i koari na tie. 19 Pa siraṉa gua mo asa, si kote va naqiti pule vekoa rini sa tinagotago koa holana, guana vina namanama nabuna tadi na rane mae hiroi, pude tuqe va nabua sa tinoa hinokara.

20 Ego Timote, mu kopu valeana ni saripu gua ele vatu nigo pa mua kinopu, mu taliri va seu koari na zinamazama duviduvilidi na hoborodi, meke na vina tumatumae kokohadi saripu balabala sea i rina tie, sapu poza ni “Na tinumatumae,” rini. 21 Ura kaiqa ri na tie si zama sapu tagoa rini “Sa tinumatumae,” asa, ba pa vinabetona si ene va seu koasa rinaṉeraṉe hinokarana si arini.

Sa tataru variharupi te Tamasa si mani koa koa gamu doduru.