2
Sa Vina Kilasa te Zihova koasa Popoa Moabi
1 Hiera gua si zama nia e Zihova:
“Koari ka ṉeta sinea te Moabi meke kamo ka made,
si lopu kaqu va kekere pule ia Rau sa vina kilasa,
sina ele pada mo sari na dia sinea meke lopu boka beto.
Koa gua sapu sulu i sa, guana sulu binu,
sari susurina sa baṉara pa Edomu,*Ais 15:1 kamo hinia 16:14, 25:10-12; Zer 48:1-47; Izk 25:8-11; Zepa 2:8-11
2 ke kote garunu la nika si Arau koari pa Moabi
sapu kote sulu i sari vasileana ta gobadi pa Kerioti.
Se Moabi si kote tava gore pa keke vinaripera nomana
pa vari korapadi rina iraṉa na kukili vinaripera meke na kabona sa buki.
3 Kote va mate pania Rau sa nana baṉara
meke va matei sari doduru nana koimata,”
zama gua se Zihova.
Sa Vina Kilasa te Zihova koasa Popoa pa Ziuda
4 Hiera gua si zama nia e Zihova:
“Koari ka ṉeta sinea te Ziuda meke kamo ka made,
si lopu kote va kekere pule ia Rau sa vina kilasa,
sina ele pada mo sari na dia sinea meke lopu boka beto.
Koa gua sapu ele kilu pania rini sa tinarae te Zihova
meke lopu kopuni rini sari Nana ginarunu,
ke ta turaṉa va seu si arini koari na tamasa kokohadi,
sari tamasa sapu luli ri tiatamadia pukerane,
5 ke kote garunu la nika si Arau koari pa Ziuda
sapu kote sulu i sari vasileana ta gobadi pa Zerusalema.”
Sa Vina Kilasa te Zihova koasa Popoa pa Izireli
6 Hiera gua si zama nia e Zihova:
“Koari ka ṉeta sinea tamugamu pa Izireli meke kamo ka made,
si lopu kaqu va kekere pule ia Rau sa vina kilasa,
sina ele pada mo sari na mia sinea meke lopu boka beto.
Koa gua sapu holuholu ni siliva gamu sari tie toṉotodi,
meke koari na sadolo mo holuholu ni gamu sari tie sapu loke dia.
7 Neti gamu batudi sari tie malaṉa
guana neti mia pa kavuruna sa pepeso
meke lopu poni tinoṉoto gamu sarini pu ta ṉoṉovala.
Tamana meke sa tuna koreo si la ia si keke vineki mo
meke ṉoṉovala ia gamu sa Pozaqu Hopena.
8 Seke tinarae si gamu totoso eko gamu pa kalidi ri doduru hope,
koari na poko sapu ta tuqe vagidi pude tana gale lopu ele ta lipudi.*Tiro laia Diut 23:12-13.
Pa korapa vetu tanisa dia tamasa
si napoi rini sari vaeni sapu tabarani ri tie malaṉa totoso tava lipulipu hoboro si arini.
9 Seke goreni Arau sari na tie Amoraiti pa kenu dia,
vea ululu guana huda sida si arini,
meke vea ṉiṉira guana huda oaku si arini.
Sari vuvua tanisa panaulu si huari Rau
meke gua tugo sari karosona pa kauruna.*Diut 3:8-11
10 Arau vagi vurani gamu pa Izipi,
meke turaṉa gamu koari ka made ṉavulu puta vuaheni pa soloso qega
pude poni gamu sa pepeso tadi na tie Amoraiti.
11 Va noma sage i tugo Arau sari poropita pa vari korapadi ri tumia koreo
meke vizata vagi tie Naziraiti*Sa tie Naziraiti si na tie sapu va madi pule nia koe Zihova meke lopu napo vaeni meke lopu koto kalu si asa. Mi tiro laia sa buka Nab 6:1-21. koari mia tie vaqura.
Vea, lopu hinokaradi si hire, gamu na tinoni pa Izireli?”
zama vura gua se Zihova.*Nab 6:1-8
12 “Ba va napo ni vaeni tu gamu sari tie Naziraiti
meke zamai gamu sari poropita pude tukui ṉuzudia.
13 Ego, kamahire si kote naqoto gamu Arau
gua sa totopili susuraṉana huiti sapu ta mamatani sari qaqaloto huiti ke qirato.
14 Arini koa gamu pu haqala rerege si lopu kote govete,
arini pu ṉiṉira si kote malohoro tu,
meke sa varane si lopu boka harupu pule nia.
15 Sa tie gona bokala si kote rizu togolo pule,
sa tie varipera sapu reregena ba lopu kote govete,
sa tie koi hose ba lopu boka harupu pule nia.
16 Sari tie varane sapu bokabokadi hola
ba kote dodohodi meke govete koa sa rane asa,”
zama vura gua se Zihova.
*2:1 Ais 15:1 kamo hinia 16:14, 25:10-12; Zer 48:1-47; Izk 25:8-11; Zepa 2:8-11
*2:8 Tiro laia Diut 23:12-13.
*2:11 Sa tie Naziraiti si na tie sapu va madi pule nia koe Zihova meke lopu napo vaeni meke lopu koto kalu si asa. Mi tiro laia sa buka Nab 6:1-21.