9
Sa Vina Kilasa te Zihova
1 Dogoria rau se Zihova sa Baṉara turu Nana pa kalina sa hope, meke zama guahe si Asa:
“Seke pani sari batudi ri dedegerena sa Zelepade
pude va niu ia sa nuqunuquruana.
Va hoqa mae i pa batudi ri doduru tie;
sarini pu koa hola si kote va mate i Arau pa vedara.
Lopu keke si kote toa,
loke tie si kote govete.
2 Be geli gore la si arini pa vasina tadi na tie matedi,
ba sa Limaqu kote la vagi vurani vasina.
Be haele sage la si arini pa maṉauru,
ba vasina kote vagi gore mae ni Arau.
3 Be la tome puleni si arini pa batu toqere Kameli,
ba kote tuqe vagi Rau si arini.
Be la tome Nau rini si Arau pa hubina sa lamana,
ba vasina kote garunia Rau sa noki lavata pude garati.
4 Be ta hadu la pa tinaraovo si arini koari dia kana,
ba vasina kote garunia Rau sa vedara pude seke i.
Sa mataqu Rau si kote doṉo toto la mo koa rini
pude va kaleana i, lopu pude va leana i.”
5 Sa Baṉara, se Zihova Tadi na Qeto Minate,
Asa tiqu ia sa popoa pepeso meke va kolo ia,
meke va kaboi sari tie;
sa doduruna sa popoa si kote odu sage gua pa Naelo,
meke lodu gore pule gua sa ovuku pa Izipi.
6 Asa pu kuri ia sa Nana vetu baṉara panaulu pa maṉauru
meke va sokirae ia Sa pa popoa pepeso,
pu tioko vagi kolo pa lamana
pude va ruku boboso ia sa pepeso,
si e Zihova sa Pozana Sa.
7 “Vea, lopu kekeṉoṉo gua mo ari pa Itiopia
si gamu pa Izireli koa Rau?”
zama vura gua se Zihova.
“Lopu Arau tu vagi vura nia se Izireli pa Izipi,
sari tie Pilisitia pa Nusa Kiriti,
meke ari Siria pa Kiri?
8 Hinokara sapu sari matana e Zihova sa Baṉara
si doṉo la koasa butubutu baṉara sapu tavete va kaleana.
Kote huara pania Rau
koasa popoa pepeso,
gua ba lopu kote huara beto taloa nia Rau
sa butubutu te Zekopi,”
zama vura gua se Zihova.
9 “Ura kote vala nia Rau sa ginarunu,
meke kote niu ia Rau sa butubutu Izireli
pa vari korapadi ri doduru butubutu
gua sa huiti sapu ta paqaha koari na remoremona,
meke lopu keke boni si koa hola.
10 Doduru tie tavete va kaleana koari Qua tinoni
si kote mate pa vedara,
doduru arini pu zama guahe,
‘Lopu kote tutuvia babe kamo gami na tinasuna si gami,’ gua.
11 Koasa rane asa si kote va vaqura pule ia Rau
sa butubutu baṉara te Devita sapu guana keke ipi hoqana.
Kote tuvaka pule i Rau sari vasidi sapu ele rikata,
tavete va leana pule i sari vasidi sapu kaleana,
meke kuri pule ia gua sapu tatasana,*TTA 15:16-18
12 pude boka la zau vagi rini saripu koa hola pa Edomu
meke sari doduru butubutu saripu vahesi Au rini,”
zama vura gua se Zihova pu kote taveti sari doduru hire.
13 “Sari rane si korapa mae, zama vura gua si Arau Zihova,
totoso pakepakete sa tie si kote kamo ia mo sa tie geli pepeso pude lelete,
meke sa tie lelete si kote kamo la ia mo sa tie munamunala vaeni.
Na vaeni vaqura si kote zoloro koari na toa
meke totolo gore koari na toqere.
14 Kote turaṉa pule mae ni Arau sari Qua tinoni pa Izireli pu ta raovo taloadi;
kote kuri pule i rini sari vasileana ta huaradi meke kote koa i rini.
Kote lete vaeni si arini meke napo i teledia;
kote tavete inuma si arini meke hena i ri sari vuadi.
15 Kote lete ia Rau se Izireli pa dia pepeso soti,
meke lopu kaqu ta rabutu pule hokara
koasa pepeso sapu Arau poni lani koa rini,”
zama gua se Zihova mia Baṉara.