SA BUKA
TE IZIKELI
Sa Vinabakala
Sa poropita Izikeli si somana ta raovo la pa Babiloni pa vuaheni lima gogoto sia ṉavulu zuapa, meke toa pa kinoa tinaraovo si asa pa popoa Babiloni pa korapana sa totoso sipu lopu ele ta huara sa popoa Zerusalema meke mudina sa totoso sapu ta huara sa pa korapana sa vuaheni lima gogoto vesu ṉavulu onomo sipu lopu ele podo se Zisu Karisito. Sari nana kinorokorotae meke tinarae si ta garunu la koari na tie Izireli, arini pu ta raovo la pa Babiloni meke koari na tie pa Zerusalema. Sa buka te Izikeli si koa ia ka onomo kukuru pinaqahana: (1) Tinioko te Tamasa la koe Izikeli pude na poropita. (2) Sari na vina balau la koari na tinoni koasa vinaripitui te Tamasa meke pa guguana sa hinoqa tina huarae te Zerusalema sapu kaqu mae ta evaṉa koasa. (3) Sari na kinorokorotae maedi koasa Baṉara pa guguana sa Nana vinaripitui sapu goto la koari kaiqa popoa sapu naqoto va kilasi meke turaṉa va seai sari nana tie. (4) Va manotia sa se Izireli pa mudina sa tinahuarae te Zerusalema meke sa vina tatara pa kinoa learane pa totoso sapu mae pa kenudia. (5) Kinorokorotae ta soto nia sa butubutu Qoqi. (6) Sa dinogodogorae te Izikeli gua sapu dogoria sa koasa kinuri pulena sa Zelepade meke sa popoa Izireli.
Izikeli si keke tie lohina pa rinaṉeraṉe. Sokudi ri nana dinogodogorae si mae gua pa hahanana sapu dogori sa pa pinutagita, meke soku sari nana vivinei si tozi sa pa vina titila sapu bakala valeana. Izikeli zama sisigiti nia sa inarilaena gua pude va vaqura pulea sa korapa bulo meke sa maqomaqo tie, meke sapu hopeke tie kote mate nia sa nana sinea soti telena, ba lopu tana votiki tie. Tozi helahelae nia tugo sa sa nana inokoro na rinonu pa vina vaqura pule koasa tinoa tanisa popoa. Keke hiama meke poropita tugo si asa ke vivinei nia sa sa Zelepade meke sa vina via pa sinea meke sa tinoa madina koe Zihova.
Sari Ṉati Pinaqapaqahana sa Buka
Tinioko te Izikeli. Hinia 1:1 kamo hinia 3:27
Tinozi tanisa tina huarae pa Zerusalema. Hinia 4:1 kamo hinia 24:27
Sa vinari pitui te Tamasa koari na votiki butubutu. Hinia 25:1 kamo hinia 32:32
Sa vina tatara te Tamasa koari Nana tie. Hinia 33:1 kamo hinia 37:28
Sa kinorokorotae ta soto nia sa butubutu te Qoqi. Hinia 38:1 kamo hinia 39:29
Sa dinogodogorae koasa Zelepade meke sa popoa pa totoso mae hiroi. Hinia 40:1 kamo hinia 48:35
Dinogodogorae Kekenu te Izikeli koasa Tamasa
1
1:1, 7:27
Izikeli pa Babiloni
Pa vina toloṉavulu puta vuaheni, koasa vina made sidara, pa vina lima rane, totoso korapa koa turaṉi arau sari tie ta raovodi pa kali taqele Ovuku Keba pa Babiloni si tukele sa maṉauru meke dogori rau sari dinogodogorae te Tamasa.* Rev 19:11
Koasa vina lima sidara, pa vina lima vuahenina sa tinaraovo te Zehoiakini sa baṉara,* 2 Baṉ 24:10-16; 2 Koron 36:9-10 si kamo mae sa zinama te Zihova koe Izikeli sa hiama, sa tuna koreo e Buzi, pa taqelena sa Ovuku Keba pa popoa Babiloni. Vasina si kamo la koe Izikeli sa Limana e Zihova.
Eṉa sage si rau meke dogoria si keke givusu raneboṉi vura mae gua pa kali gede* Sa kali gede hie si be tia la sa tie pa kali gasa rimata., na lei moatana sapu lulia na malakapi meke vari likohae nia na kalalasa ṉiṉirana. Pa kokorapana sa nika si guana boronizi lerana, meke pa korapana sa nika si keke sapu doṉo guana ka made kurukuru toadi. Sa kinehadi si gua tugo na tie,* Rev 4:6 ba hopeke ka made isumatadi si arini meke ka made tatapurudi. Sari nenedi si toṉoto; sari petapetala nene dia si gua tana bulumakao meke pelara guana boronizi ṉedalana. Pa kaurudi rina tatapurudi, koari ka made kalidia si koa sari limadia sapu tana tie. Ari ka made arini si tago isumata meke tatapuru beto, meke sari tatapuru dia si vari tiqui. Rizu keke gua si arini pa doduru dia inene, lopu taliri pana rizu si arini.
10 Doṉo gua hie sari isumatadia: Hopeke ari ka made si tago isumata tie, meke pa kali matao si hopeke tago isumata laione si arini, meke pa kali gede si na isumata bulumakao; hopeke tago isumata atata tugo si arini.* Izk 10:14; Rev 4:7 11 Gua asa sari isumatadia. Sari tatapuru dia si repaha sage; hopeke karua tatapuru dia si tiqu la pa tatapurudi ri na kurukuru pa vari kalidi, meke hopeke karua tatapuru dia si nobi la pa tinidia. 12 Rizu keke gua si arini toṉoto la pa kekenu. Vasina la gua sa maqomaqo si vasina tugo si la gua si arini, ba lopu taliri si arini totoso rizu rini. 13 Sa dinoṉodi ri na kurukuru hire si guana patu leradi pa nika babe na zuke huruṉudi. Na nika si rizu la meke pule pa vari korapadi rina kurukuru; bakala hola meke na kapi si vura mae koa sa. 14 Sari kurukuru si rerege la meke pule guana kapi.
15 Sipu korapa doṉo la i arau sari ka made kurukuru si dogori rau sari ka made totopili pa pepeso, keke totopili pa keke kurukuru, koa pa hopeke kali dia ri ka made kurukuru sapu hopeke made isumatadi.* Izk 10:9-13 16 Guahe sa dinoṉodi meke kinehadi sari na totopili: Pinoro si arini guana patu ṉedala, meke doṉo kekeṉoṉo beto sari ka made. Hopeke doṉo guana keke totopili sapu viloro pa korapana keke totopili vilorona pule. 17 Totoso rizu rini si la gua si arini koa keke ri ka made kalina sapu vasina tia la sari na kurukuru, pa doduru vasina sapu hiva laia rini. 18 Ululudi sari totopili meke variva matagutudi; doduru bobolokuhaedi ri ka made totopili si siṉi beto i na mata.* Rev 4:8
19 Totoso rizu sari kurukuru si rizu tugo sari totopili pa kali dia; meke totoso ovulu sage pa pepeso sari kurukuru si ovulu sage tugo pa pepeso sari totopili. 20 Be pavei la gua sa maqomaqo, si la tugo si arini, meke sari totopili si sage luli gua tugo koa rini, sina sa maqomaqodi ri na kurukuru si koa koari na totopili. 21 Totoso rizu sari na kurukuru, si rizu tugo si arini, totoso noso si arini si noso tugo sari na totopili, meke totoso ovulae sage pa pepeso sari kurukuru, si sage luli tugo koa rini sari totopili, sina sa maqomaqodi ri na kurukuru si koa koari na totopili.
22 Ivara pa kali sage batudia ri na kurukuru si guana keke galegalearane, sapu ṉedala guana aesi, meke variva matagutuna.* Rev 4:6 23 Pa kauruna sa galegalearane si repahi rini sari tatapurudi sapu repaha la koari karua pa hopeke vari kalina, meke karua tatapurudi si nobini rini pa tinidia. 24 Avosia rau sa vevehedi ri na tatapurudi totoso tapuru rini; avoso guana ovaṉa pa ovuku, guana halabutu tadi na qeto minate, guana mamalaiṉina sa Tamasa pu tagoi sari doduru ṉiniraṉira. Totoso turu noso rini si va gorei rini sari tatapuru dia.* Rev 1:15, 19:6
25 Meke kamo mae si keke mamalaiṉi, pa kali sage koasa galegalearane sapu kali sage pa batu dia, sipu turu rini meke va gorei sari tatapuru dia. 26 Pa kali sage koasa galegalearane sapu kali sage koa rini si doṉo guana keke habohabotuana baṉara sapu ṉedala guari na patu buma ṉedaladi, ṉedala guana lamana peava, meke habotu nana panaulu koasa habohabotuana baṉara si keke kineha guana tie.* Izk 10:1; Rev 4:2-3 27 Dogoria rau sapu podalae koasa kopetena meke sage si guana kineha boronizi ṉedalana pa korapa nika si asa, meke pa kopetena meke gore si na kineha guana nika si asa; meke vari likohae nia si na kalalasa ṉiṉirana.* Izk 8:2 28 Sa malara pa varilikohaena Sa si guana kineha tanisa bigobigo koari na lei pa rane rukuruku.
Asa sa kinehana sa tinolava ṉedalana te Zihova. Totoso dogoria rau, si hoqa oporapaha pa pepeso, meke avosia rau sa mamalaiṉina si Asa sapu korapa zama.

*1:1 Rev 19:11

*1:2 2 Baṉ 24:10-16; 2 Koron 36:9-10

*1:4 Sa kali gede hie si be tia la sa tie pa kali gasa rimata.

*1:5 Rev 4:6

*1:10 Izk 10:14; Rev 4:7

*1:15 Izk 10:9-13

*1:18 Rev 4:8

*1:22 Rev 4:6

*1:24 Rev 1:15, 19:6

*1:26 Izk 10:1; Rev 4:2-3

*1:27 Izk 8:2