8
Zutua e Zihova se Izireli pa Vinahesi Beku
1 Veko la nia sa buki pa berumu!
Keke atata*Sa atata si na vinagilagilana sa butubutu baṉara te Asiria. si pa kali sage koasa butubutu Izireli te Zihova
sina sari tie si seke ia rini sa Qua vinariva egoi
meke lopu luli rini sari Qua tinarae.
2 Kabo vura se Izireli koa Rau,
‘Kei Tamasa, na mami Tamasa tugo si Agoi’
3 Ba se Izireli si ele kilu ia sapu leana;
gua ke keke kana kote hadu luli ia si asa.
4 Va turu dia baṉara pa dia hiniva soti lopu Taqarau;
vizata dia koimata ba lopu pa Qua vina malumu.
Koari dia siliva na qolo
si tavete dia beku si arini
meke va kamo nia dia tinahuara teledia.
5 Kei Sameria, gona vura nia sa mua beku bulumakao!
Sa Qua binugoro si guana nika la koa rini.
Vea seunae gua si kote koa boni eko mo si arini?
6 Na mae guadi pa Izireli!
Sa tuna bulumakao hie sapu na tie peqopeqo tavetia
si lopu na Tamasa.
Kote ta moku umumu mo si asa,
sa tuna bulumakao tadi pa Sameria sana.
7 Lete ia rini sa givusu
meke paketia rini sa vivirua.
Sa qaqaloto si koa ba loke kikona;
ke loke palava si kote va gavoria sa.
Pana va vura huiti sa,
ba ari tie karovodi na kote onolo pania.
8 Ta onolo taloa se Izireli;
kamahire si koa turaṉa votiki butubutu si asa
guana keke tiṉitoṉa sapu loke laena.
9 Ura ele ene seu latu pa Asiria si arini
guana doṉ'ki pinomo sapu ene ekena.
Ele holuholu pule nia se Iparemi la koari nana babaere.
10 Na ele holuholu puleni tu koari kaiqa butubutu,
ba kote varigara puleni Arau.
Kote podalae matemate palae si arini
pa kauruna sa vina kilasa tanisa keke baṉara ṉiṉirana.
11 Taveti tugo Iparemi sari soku hope tana va vulasa sinea,
ba ta evaṉae na hope tana tavete va sea mo si arini.
12 Kubere poni Rau sari soku ginugua koari Qua tinarae,
ba guni ni arini na tiṉitoṉa karovodi tu.
13 Va vukivukihi mae si arini koa Rau
meke henai rini sari masa,
ba lopu qetu ni Arau Zihova si arini.
Kamahire kote balabala pulei Rau sari dia kinaleana
meke va kilasi koari dia sinea:
Kote pule la mo si arini pa Izipi.
14 Ele muliṉi nia Izireli si Asa pu va podakana,
meke kuri dia vetu baṉara;
meke gobai Ziuda sari soku nana vasileana.
Ba kote garunu gore la nia Arau sa nika koari dia vasileana lavata
sapu kote sulu pani sari dia vasileana ta gobadi.”