11
Sa Tataru te Tamasa koari pa Izireli
1 Totoso koburuna se Izireli, si tataru nia Rau si asa,
ke tioko vura nia Arau pa Izipi sa Tuqu koreo.*Ekd 4:22; Mt 2:15
2 Ba totoso titioko nono la si Arau koe Izireli,
si rizu va seu nono la tu si arini koa Rau.
Va vukivukihi la koe Beolo si arini
meke va uququ humaṉa lea la si arini koari na beku.
3 Arau mo va tumatumae nia ene se Iparemi,
turaṉi Arau pa lima dia;
ba lopu boka tumae nia rini
sapu Arau mo salaṉi.
4 Arau turaṉi koasa iku tataru
koari na aroso tataru kopuni Rau.
Ovulu pania Rau sa ioki pa ruadia
meke kokopo gore si Arau pude poni i.
5 Hokara kote pule la mo pa Izipi sari
meke hokara kote Asiria mo baṉara ni
sina korodia pule mae koa Rau?
6 Na vedara si malakapi pa korapa dia vasileana,
kote ta huara sari roto koari dia sasada
meke va mate pani sari dia hiniva.
7 Sari Qua tinoni si ṉiṉira sa dia hiniva pude taliri va seu koa Rau.
Be titioko mae si arini koa Arau sa Tamasa Ululuna Hola
ba lopu kote la si Arau meke ovulu sageni.
8 Iparemi, vea meke kote veko pani igo Arau?*Diut 29:23
Izireli, vea meke kote vala nigo Arau koari na kana?
Vea meke kote huara igo Arau gugua ari pa Adima?
Vea meke kote guni nigo Arau sapu gua ari pa Zeboimi*Sari vasileana Adima meke Zeboimi si ta huara turaṉae koari Sodomu meke Qomora.?
Sa Buloqu si hobe pa korapaqu Arau;
siṉia na tataru sa Buloqu.
9 Lopu kote va gorevura ia Arau sa Qua tinaṉaziri,
meke lopu kote taliri si Arau meke huara ia se Iparemi.
Ura na Tamasa si Arau meke lopu na tie,
sa Tamasa Hopena si pa vari korapa mia.
Lopu kote mae si Arau pa binugoro.
10 Kote luli Au rini si Arau Zihova
kote kurumu guana laione si Rau.
Meke pana kurumu si Arau
si kote neneqara sari Qua koburu meke pule mae gua pa kali lodu rimata.
11 Kote neneqaradi meke kamo mae
guana kurukuru, mae guadi pa Izipi,
guana kukuva pa Asiria.
Kote va koa i Arau pa dia popoa,”
zama vura gua se Zihova.
Ta Zutu sari pa Izireli meke Ziuda
12 Zama se Zihova, “E Iparemi si ele vari likohae Nau koha,
sa butubutu Izireli si vari likohae Nau sinekesekei.
Meke Ziuda si lopu pamaṉa nia sa Tamasa,
lopu vahesi Au rini, Arau sa Tamasa Hopena sapu kopu ni sari Nana zinama.