1 Kasa tasiqu, mamu lopu toka kale pa tie, sina va hinokaria gamu sa nada Baṉara Zisu Karisito, sa Baṉara lavata. 2 Be nuquru mae pa mia vinarigara si keke tie sapu pokopoko valeana, meke riṉiriṉi qolo, meke nuquru mae tugo si keke tie malamalaṉana sapu koadi meke luluradi nana poko. 3 Meke be keke koa gamu si va kamo valeania sa tie pu pokopoko valeana, meke zama koasa, “Mae tani mamu habotu valeana,” gua. Ba koasa tie malamalaṉana si zama guahe si asa, “Turu paki vasina, babe habotu pa hatara tani, pa kapa nenequ,” gua. 4 Ego, be gua asa si toka kale si gamu, sina va lavatia gamu si keke meke doṉo va karia si keke. Meke vari vilasi telemia pa vari korapa mia si gamu koari na mia binalabala seadi.

5 Kasa tasiqu ta tatarue mia, mi va avoso mae au! Ele vizati tu Tamasa sari na tie malamalaṉadi pa kasia popoa hie, pude koa tagotago pa rinaṉeraṉe, meke pude tagoa sa Binaṉara Tanisa, sapu ele va tatara nia Sa koa rini pu tataru nia sa Tamasa. 6 Ba ṉoṉovali gamu sari na tie malamalaṉadi. Vegua, lopu sari na tie tagotago tu si va tasuna gamu, meke turaṉa lani gamu pa vinari pitui? 7 Lopu arini tu na zama ṉoṉovala ia sa pozapoza arilaena te Karisito sapu ta pozae nia gamu?

8 Be va tabea gamu sa Tinarae arilaena sapu koa pa Kinubekubere Hope sapu guahe: “Mu tataru nia sa turaṉamu, gua sapu tataru pule nigo si agoi,” gua, si tavete valeana mia si gamu.*Liv 19:18 9 Ba be toka kale si gamu koari na tie, si sea tugo si gamu. Meke zutu gamu sa Tinarae te Tamasa sapu na tie seke tinarae si gamu. 10 Ura asa sapu kopu nia sa doduruna sa Tinarae ba sekea si keke tinarae, si ele sea beto ni tugo sa sari doduru. 11 Ura zama sa Tamasa, “Meke mu barabarata.” Meke zama gua tugo he si Asa, “Meke mu variva mate,” gua. Ke be lopu barabarata si goi, ba na va mate tie mo, si na tie seke Tinarae te Tamasa tugo si goi.*Ekd 20:13-14; Diut 5:17-18 12 Ke mu zama nia mamu tavetia, pude guana tie ta pitu mia koasa tinarae te Karisito sapu vata rupaha gita. 13 Ura loke tataru na tinaleosae si koa pa vinaripitui te Tamasa, koasa tie sapu lopu va vura ia sa tataru na tinaleosae. Ba sa tataru na tinaleosae si mataqara hola nia sa vinaripitui.

14 Kasa tasiqu, lopu arilaena, be zama si keke tie, “Na tie raṉeraṉequ si rau,” gua. Ba be lopu vata dogoro nia sa pa tinavete sa nana rinaṉeraṉe, si lopu boka harupia sa rinaṉeraṉe sana si asa. 15 Meke be keke tasimia koe Karisito si malaṉa meke loke nana poko na ginani, 16 meke be keke koa gamu si zama koasa, “La mua tu, kote leana mua mo si goi, mamu koa valeana, na henahena valeana,” gua; ba be lopu poni nia sa si keketoṉa sapu ta hivae koasa tinina, si namu loke laena sa nana tinokae. 17 Meke kekeṉoṉo gua tugo asa sa rinaṉeraṉe sapu be telena mo, meke loke nana tinavete, si matena mo sa rinaṉeraṉe asa.

18 Ba kote zama si keke tie, “Keke tie si raṉeraṉe, meke keke tie si tavetavete.” Ba sa qua inolaṉa si, “Mu va dogoro nau sa mua rinaṉeraṉe, be loke mua tinavete. Meke arau ba, maqu va dogoro nigo sa qua rinaṉeraṉe koari na qua tinavete.” 19 Vegua, va hinokaria tugo goi sapu keke mo sa Tamasa? Ego, sari na tomate kaleadi ba va hinokaria tugo, meke neneqara na matagutu si arini.

20 Na tie duvili si goi! Hie sa vina sosodena sapu sa rinaṉeraṉe pu loke nana tinavete si loke laena. 21 E Ebarahami sa tamada, si lulia sa sa hiniva te Tamasa, pude va vukivukihi la nia koa Sa pa hope se Aisake sa tuna. Ke pa nana tinavete si ta pozae na tie toṉoto koe Tamasa si asa.*Zen 22:1-14 22 Ego, dogoria goi sapu sa nana rinaṉeraṉe meke nana tinavete si tavetavete varigara, meke tava gorevura sa nana rinaṉeraṉe koari nana tinavete. 23 Meke tava gorevura valeana sa Kinubekubere Hope, sapu zama guahe: “Va hinokaria Ebarahami sa Tamasa, meke koasa nana rinaṉeraṉe si ta pozae tie toṉoto koe Tamasa si asa.” Meke poza nia Nana baere tugo Tamasa si asa.*Zen 15:6; 2 Koron 20:7; Ais 41:8 24 Ke dogoria goi sapu pa tinavete tugo si ta pozae na tie toṉoto koe Tamasa sa tie, ba lopu koasa rinaṉeraṉe mo telena.

25 Gua tugo asa se Rehabi sa maqota, sapu ta pozae na tie toṉoto tugo koe Tamasa, sina va kamoi sa sari na tie piko, meke garunu pule lani sa si arini pa keke votiki siraṉa.*Zos 2:1-21 26 Gua asa, ke sa rinaṉeraṉe sapu loke nana tinavete si matena, si gua tugo sa tini sapu loke maqomaqona si matena.