1 Pa sidara vina zuapa koasa vuaheni asa, si turaṉi e Isimeli sa tuna e Netanaea, sapu sa tuna e Elisama sapu koa koasa tuti baṉara pa Ziuda meke na keke koimata tanisa baṉara, sari ka manege puta tie meke mae koe Qedalaea sa tuna koreo e Ahikama pa Mizipa. Totoso korapa henahena varigara dia vasina,*2 Baṉ 25:25 2 si gasa turu mo se Isimeli sa tuna koreo e Netanaea meke sari ka manege puta tie meke seke va mate nia vedara mo rini se Qedalaea sa tuna koreo e Ahikama, sapu sa tuna koreo e Sapani. Va mate ia mo rini si asa pu ta vizatana koasa baṉara pa Babiloni pude qavuna, meke kopu nia sa popoa. 3 Va matei tugo Isimeli sari doduru tie Ziu sapu koadi koe Qedalaea pa Mizipa, meke gua tugo sari na tie varipera pa Babiloni sapu koadi vasina.

4 Pa koivugona sipu lopu ele gilania ri tie sa vina matena e Qedalaea, 5 si kamo mae gedi sari ka vesu ṉavulu puta tie, mae guadi pa Sekemi, Saelo, meke Sameria. Neri pani rini sari na gumidi, rikati rini sari dia poko, meke va bakora puleni. Paleke mae vinariponi huiti na oto huda humaṉa lea pude la vukivukihi dia pa Zelepade te Zihova gua. 6 Vura pa Mizipa se Isimeli, kabokaboa meke la tutuvi sa. Kamo la sa si zamai sa, “Mae koe Qedalaea sa tuna koreo e Ahikama,” guni sa. 7 Totoso nuquru la rini koasa vasileana lavata si seke va matei ri Isimeli meke sari nana tie si arini meke gona lani pa keke pou popana tana naqiti kolo ruku. 8 Ba ka manege puta tie koa rini si zama guahe koe Isimeli, “Lopu va mate gami! Gami si ari mami huiti, bale, oela, meke zipale, tomei gami pa inuma,” gua. Ke vekoi rini meke lopu va mate luli ni rini koari kasa. 9 Ego sa pou tana naqiti kolo ruku sapu gona nuquru nia tini tie matedi e Isimeli, somanae tugo sapu te Qedalaea, si na pou sapu e Asa sa baṉara tavetia. Na kukuruna sa nana tinuru va nabu totoso rapatia e Basa sa baṉara pa Izireli si asa. Va siṉi nia tini tie matedi e Isimeli.

10 Meke vagi betoi e Isimeli sari doduru pu koadi pa Mizipa pude nana boso, sari tuna vineki sa baṉara meke sari doduru pu koa hola pa Mizipa, saripu veko lani e Nebuzaradani, sa tie tuturaṉa koari tie kopu tanisa baṉara, koe Qedalaea sa tuna koreo e Ahikama pude kopuni. Vagi e Isimeli sa tuna koreo e Netanaea, si arini meke topue karovo la gua pa popoa Amoni.

11 Totoso avoso ni e Zohanana sa tuna koreo e Karea meke sari doduru koimata varipera pu koa turaṉia, sari tinavete kaleadi pu evaṉi e Isimeli sa tuna koreo e Netanaea, 12 si vagi rini sari doduru dia tie meke vura la raza ia rini se Isimeli sa tuna koreo e Netanaea. La kamoa rini si asa tata koasa kopi nomana pa Qibione. 13 Totoso dogoria ri doduru tie ta pusidi te Isimeli se Zohanana sa tuna koreo e Karea meke sari na koimata varipera pu somana lulidi koa sa, si qetu hola si arini. 14 Meke sari doduru tie pu vagi e Isimeli pa Mizipa pude nana boso gua si kekere meke karovo la dia koe Zohanana sa tuna koreo e Karea. 15 Ba se Isimeli sa tuna koreo e Netanaea meke ka vesu nana tie si govete nia rini se Zohanana meke la dia pa popoa Amoni.

16 Ke turaṉa taloani e Zohanana meke sari na koimata pa vinaripera saripu harupi rini pa Qibione; sari tie koa holadi pa Mizipa pu turaṉa vagi e Isimeli sa tuna koreo e Netanaea mudina sapu va mate ia sa se Qedalaea sa tuna koreo Ahikama. Turaṉa taloa ni sa sari tie varipera, sari barikaleqe, na koburu, meke sari tie tavetavete pa vetu baṉara. 17 La si arini meke la noso pa Qeruti Kimihamu, tata pa Betilihema, korapa ene hola la dia pa Izipi gua. 18 Na govete ni rini sari pa Babiloni. Na matagutu ni rini sina va mate ia Isimeli sa tuna koreo e Netanaea se Qedalaea sa tuna koreo e Ahikama, pu vizatia sa baṉara pa Babiloni pude na qavuna koasa doduruna sa popoa.