1 Hiera sa zinama sapu kamo mae koe Zeremaea pa guguadi ri doduru tie Ziu pu koa pa Izipi Peka, Miqidoli, Tapanesi, meke pa Memipisi, meke pa Izipi Ulu: 2 “Hiera gua si zama nia e Zihova Tadi na Qeto Minate, sa Tamasa pa Izireli: ‘Dogoria mia gamu sa tinasuna nomana sapu va kamo nia Rau koasa popoa pa Zerusalema meke koari na vasileana pa Ziuda. Rane ṉinoroi si ivulu meke ta huara 3 koa gua koari na kinaleana pu taveti rini. Sari dia tinavete va uququ oto huda humaṉa lea meke vinahesi tamasa karovodi si va gevuria sa Qua tinaṉaziri. Sari tamasa arini ba lopu gilani gamu babe ari tiatamamia. 4 Garunu pilipule maeni Rau sari Qua nabulu, sari na poropita, arini si zama guahe, “Mi lopu tavetia sa tiṉitoṉa kaleana hie sapu kana hola ia Rau!” gua. 5 Ba lopu hite va avoso babe va taliṉa mae si arini; lopu hiva noso si arini koari dia hahanana kaleadi babe noso pa vina uququ humaṉa lea la koari na tamasa karovodi. 6 Gua ke, ta zoropae vura sa Qua tinaṉaziri ṉiṉirana la koari na vasileana pa Ziuda meke koari na sisiraṉa pa Zerusalema, meke kamo pa rane ṉinoroi si korapa na popoa ta huaradi si arini.’

7 Ego, hiera gua si zama nia e Zihova Tamasa Tadi na Qeto Minate, sa Tamasa pa Izireli: ‘Na vegua ke kote va kamo puleni gamu tinasuna nomadi tu? Ura lopu keke gamu pu mae gua mia pa Ziuda si kote toa: sari tie na barikaleqe meke sari koburu na haha. 8 Na vegua ke va gevuru Au tu gamu pude bugoroni saripu taveti gamu pa lima mia meke koari na vina uququ oto huda humaṉa lea la koari na votiki tamasa pa Izipi, vasina pu mae si gamu pude koa? Na kote va huara puleni gamu meke tavete puleni gamu na vina sisireina meke na pozapoza tana lineveleve koari doduru butubutu pa popoa pepeso. 9 Vegua, ele muliṉini tu gamu sari tinavete kaleadi pu taveti rina tiatamamia meke sari na baṉara meke sari dia kalaho pa Ziuda meke sari kinaleana pu taveti gamu meke sari mia barikaleqe pa popoa Ziuda meke koari na sisiraṉa pa Zerusalema? 10 Kamo pa rane ṉinoroi si lopu hite va pepekae puleni gamu si gamu babe talotaṉa, lopu pamaṉa Nau, meke lopu hite luli i gamu sari Qua tinarae meke na tinozi pu vekoi Rau pa kenu mia meke koari tiatamamia.’

11 Gua ke, hiera gua si zama nia e Zihova Tadi na Qeto Minate, sa Tamasa pa Izireli: ‘Arau ele hiva sisigiti pude va kamoni gamu tinasuna meke pude huara ia sa doduruna sa Ziuda. 12 Kote vagi pani Rau sari ka visavisa tie pa Ziuda sapu odi hiva la sisigiti pa Izipi meke koa vasina. Ari doduru si kote mate beto pa Izipi; kote mate si arini pa vedara babe pa soṉe. Podalae koari pu hitekedi kamo koari pu nomadi si kote mate beto pa vedara babe pa soṉe. Sa pozadia si kote ta evaṉae na dia lineveleveina arini, na pozapoza variva holoqoruna, kote ta zutu meke ta ṉoṉovala. 13 Kote va kilasi Rau sarini pu la koa pa Izipi pa vedara, pa soṉe, meke pa oza, gua sapu va kilasi Rau sarini pa Zerusalema. 14 Lopu keke ari kasa visavisa tie koa holadi pa Ziuda pu la koa pa Izipi si kote govete babe toa pude kekere pule la pa popoa pa Ziuda, sa vasina pu hiva pule sisigiti la ia rini pude koa; loketoṉa si kote pule ba kaiqa tie govetedi mo.’ ”

15 Meke sari doduru tie pu gilania sapu sari na dia barikaleqe si va uququ oto huda humaṉa lea la koa rina votiki tamasa, meke sari doduru barikaleqe pu turu dia vasina, sa doduruna sa vinarigara, meke sari tie koadi pa Izipi Peka meke Izipi Ulu, si zama koe Zeremaea, 16 “Gami si lopu kaqu hiva avosia sa inavoso pu zama mae nia goi koa gami pa Pozana e Zihova! 17 Gami kote tavete hinokara i sari doduru gua pu hiva taveti gami: Kote va uququ oto huda humaṉa lea la mami koasa baṉara maqota pa Maṉauru meke kote zoropo napo vinariponi la koa sa, gua mo sapu taveti ri tiatamamami, sari mami baṉara, mami koimata, meke gami tugo, koari na vasileana pa Ziuda meke koari na sisiraṉa pa Zerusalema. Koari totoso arini si soku gemami ginani meke leadi sari mami kinoa meke loke tinasuna na kamo gami. 18 Ba sipu noso gami va uququ oto huda humaṉa lea la koasa baṉara maqota pa Maṉauru meke zoropo napo vinariponi la koa sa, si loketoṉa tugo si tagoa gami meke mate lamo si gami pa vedara meke pa soṉe,” gua.

19 Zama toka la sari barikaleqe, “Totoso va uququ oto huda humaṉa lea la si gami koasa baṉara maqota pa Maṉauru meke zoropo napo vinariponi la koa sa, si na tumae nia dia ri mami palabatu sapu tavete beku palava pa kinehana sa barikaleqe si gami meke zoropo napo vinariponi la koa sa si gami.”

20 Meke zamai Zeremaea sari doduru tie, sari barikaleqe meke palabatu, arini pu olaolaṉa la koa sa. 21 “Balabala ia gamu sapu lopu tumaeni e Zihova sari vina uququ oto huda humaṉa lea koari na vasileana pa Ziuda meke koari na sisiraṉa pa Zerusalema tamugamu meke tadi na tiatamamia, mia baṉara, mia koimata meke sari tiena sa popoa hie, gua? 22 Totoso lopu boka tuqe pule nia e Zihova koari mia hahanana kaleadi meke sari tinavete variva maledere pu taveti gamu, si ta evaṉae nia na pozapoza linevelevei rini sa mia popoa; sa popoa ta huarana, ivuluna, meke guana qega si asa pa rane ṉinoroi. 23 Sina va uququ humaṉa lea la koari na beku si gamu meke taveti gamu sapu sea la koe Zihova meke lopu va tabea gamu babe luli sari Nana tinarae, na vina turu, na ginarunu, ke kamo atu sa tinasuna hie, gua sapu dogoria mia gamu kamahire.”

24 Meke zamai Zeremaea sari na tinoni meke gua tugo sari na barikaleqe, “Mi avosia sa zinama te Zihova, doduru gamu tinoni pa Ziuda pu koa pa Izipi. 25 Hiera gua si zama nia e Zihova Tadi na Qeto Minate, sa Tamasa pa Izireli: Gamu meke sari mia barikaleqe si ele ta dogoro koari mia tinavete gua sapu va tatara nia gamu totoso zama guahe si gamu, ‘Gami kote taveti gua sapu tokotokoro nia gami pude va uququ oto huda humaṉa lea meke zoropo napo vinariponi la koasa baṉara maqota pa Maṉauru,’ gua si gamu. Ke mi tavete la mia tu, taveti gua sapu va tatara nia gamu! Kopuni gua sapu zama tokotokoro nia gamu!

26 Ba mi avosia sa zinama te Zihova, doduru gamu pu koa pa Izipi: Zama vura guahe se Zihova, ‘Tokotokoro si Arau koasa Pozaqu lavata sapu lopu keke koari pa Ziuda sapu koa pa Izipi kaqu varavara pule pa Pozaqu babe tokotokoro guahe, “Hinokara gua sapu toana se Zihova sa Baṉara,” gua. 27 Ura korapa kopuni Arau, pude va kaleani lopu pa lineana; sari tie Ziu pa Izipi si kote mate pa vedara, meke pa soṉe, osolae mate beto si arini. 28 Sarini pu boka govete nia sa vedara meke ta luarae pa Izipi meke pule la pa popoa Ziuda si kote ka visavisa hola. Sari ka visavisadi pa Ziuda pu mae koa pa Izipi kote tumae nia, tesei zinama si kote gorevura, Taqarau ba tadirini.’

29 Zama vura guahe se Zihova, ‘Hiera sa vina nonoga koa gamu sapu kote va kilasa gamu Rau si gamu koa sa vasina hie, pude mi tumae nia sapu sari Qua zinama pude va kaleana gamu si kote ta evaṉa.’ 30 Hiera gua si zama nia Arau Zihova: ‘Arau kote vala nia se Pero Hopira, sa baṉara pa Izipi, la koari nana kana pu hata hiva va mate ia si asa, gua sapu ele vala nia Arau se Zedekaea sa baṉara pa Ziuda koe Nebukaneza sa baṉara pa Babiloni, sa nana kana pu hata pude va mate ia si asa,’ gua.”*2 Baṉ 25:1-7