46
Sa Kinorokorotae pa Guguana Izipi
1 Hiera sa zinama te Zihova sapu kamo mae koe Zeremaea pa guguadi ri na votiki butubutu:
2 Pa guguana Izipi:
Hiera sa inavoso sapu la gua koasa qeto minate te Pero Neko sa baṉara pa Izipi, sapu va kilasia e Nebukaneza sa baṉara pa Babiloni pa Kasemisi koasa Ovuku Iuparetisi pa vina made vuahenina sa binaṉara te Zehoiakimi sa tuna koreo e Zosaea sa baṉara pa Ziuda:*Ais 19:1-25; Izk 29:1 kamo hinia 32:32
3 “Va nama i sari mia lave, hiteke na lavata,
mamu topue vura la pa vinaripera!
4 Va nama i sari na hose
mamu suraṉa koari na totopili varipera!
La turu pa mia tuturuana
mia toropae varipera va sagei!
Va ṉaru i sari mia hopere,
mia poko varipera va sagei!
5 Ba na sa si dogoria Rau?
Na matagutu tu sarini,
meke togolo pule tu,
sari na varane si ta seke gore.
Govete tuturei hola,
lopu liṉana pule hokara,
meke tarazuzu si arini pa doduru vari kalina,”
zama vura gua se Zihova.
6 “Sari pu rerege si lopu boka haqala taloa
sari pu ṉiṉira si lopu boka govete.
Pa kali gede tata koasa Ovuku Iuparetisi
si tubaraeni meke hoqa.
7 Esei si hie sapu odu sage gua sa Ovuku Naelo,
guari na ovuku sapu naqe sage pa taqele?
8 E Izipi si odu sage gua sa Ovuku Naelo
guari na ovuku sapu naqe sage pa taqele.
Zama si asa, ‘Kote odu sage si rau meke kamo la pa doduruna sa popoa pepeso;
kote huari rau sari vasileana meke sari tiedi,’ gua.
9 Haqala totoro la, gamu na hose!
Tuturei la razai sari na kana gamu na totopili varipera!
Mi ene la, gamu na varane,
gamu na tie pa Itiopia meke Libia pu paleke lave,
gamu na tie pa Lidia pu ṉavea sa bokala.
10 Ba sa rane asa si nana sa Baṉara, Zihova Tadi na Qeto Minate,
na rane pude tubehe, pude tubehi sari Nana kana.
Sa vedara si kote gani osolae deṉa si asa,
osolae beto sa memeha tanisa pa napo ehara.
Ura sa Baṉara, Zihova Tadi na Qeto Minate si kote va vukivukihi
koasa popoa pa kali gede, pa taqele Ovuku Iuparetisi.
11 Sage la pa Qileadi, mamu la vagi meresena,
agoi vinekimu pa Izipi.
Sari soku mua meresena si lopu boka;
lopu salaṉa igo rini.
12 Sari butubutu kote avoso nia sapu tava kurekure si gamu;
sa uui tamugamu si kote siṉia sa popoa pepeso.
Sari varane si kote vari tupele va hoqai;
meke kote hoqa gore varigara dia.”
13 Hiera sa inavoso sapu zama la nia e Zihova koe Zeremaea sa poropita pa guguana sa minae te Nebukaneza sa baṉara pa Babiloni pude rapatia sa popoa Izipi:*Zer 43:10-13
14 “Mu tozi vura nia si hie pa Izipi, meke urahae nia pa Miqidoli;
mamu urahae nia tugo pa Memipisi meke pa Tapanesi:
‘La vagi mia tuturuana, mamu va namanama,
ura sa vedara si kote variva mate mo pa varikali mia.’
15 Na vegua ke hoqa gore tu sari mia varane?
Lopu boka turu tu sari, ura kote tupele va hoqai e Zihova.
16 Kote ta tubarae pilipuleni sarini;
meke hoqa vari hakei teledia.
Kote zama sari, ‘Gasa turu, mada pule la
koari nada tinoni meke nada popoa soti,
seu koasa vedara tanisa kana.’
17 Vasina kote zama vura si arini,
‘Se Pero, sa baṉara pa Izipi si vevehe hola
meke hola taloa dia sari lolomo leleadi.’
18 Gua sapu hinokara toaqu si Rau, sa Baṉara,
sapu sa Pozaqu si e Zihova Tadi na Qeto Minate,
keke si korapa mae sapu ululu gua sa toqere Tabora hola ni sari na toqere,
gugua sa toqere Kameli sapu tata la gua pa masa.
19 Va namai sari mia pinaleke pude ta raovo,
gamu pu koa pa Izipi,
ura sa vasileana nomana pa Memipisi si kote ta huara
meke koa doṉo hikare meke ivulu.
20 Izipi si leleana guana bulumakao vaqurana,
ba na dodoa si korapa mae pude garatia,
mae gua pa kali gede pude rapatia si asa.
21 Sari tie varipera ta tabaradi te Izipi
si noboko gua tugo na bulumakao.
Arini ba kote taliri meke govete varigara,
lopu kote turu meke aqa varipera,
ura sa rane tinasuna si korapa mae pude raza i,
sa totoso tadirini pude tava kilasa.
22 Sa mamalaiṉi te Izipi si guana noki gotolo taloana
totoso qeto nuquru sa kana;
kote kamo mae si arini koa sa, paleki na dia maho,
guana tie mae maho dia huda.”
23 Zama vura pule se Zihova, “Kote maho goreni rini sari nana huda,
be vea moata gua sa hiqohiqo.
Na soku hola ni rini sari kupokupo,
pu lopu boka ta nae.
24 Sari tinoni pa Izipi si kote tava kurekure,
meke tava vala koari na tinoni pa kali gede.”
25 Hiera gua si zama nia e Zihova Tadi na Qeto Minate: “Arau si nama pude va kamo ni vina kilasa sari Amoni sa tamasa pa Tibisi, koe Pero, koe Izipi, meke sari nana tamasa meke sari nana baṉara, meke arini pu kalavarae koe Pero. 26 Kote valani Arau koa rini pu hiva va matedi, koe Nebukaneza sa baṉara pa Babiloni meke sari nana koimata. Mumudi si kote koa pule ia na tie sa popoa Izipi, gugua pa totoso pukerane,” zama vura gua se Zihova.
Kote Harupi Zihova sari Nana Tinoni
27 “Kei Zekopi Qua nabulu, mu lopu matagutu;*Zer 30:10-11
mu lopu nunala, Izireli.
Hinokara kote harupu vura nigo Arau koari na vasidi pa seu,
sari tutimu koari na vasidi ta raovo la rini.
E Zekopi si kote koa pule pa binule,
meke loke tie kote va matagutia.
28 Ke mu lopu matagutu, Zekopi Qua nabulu;
ura Arau korapa koa turaṉigo,” zama vura gua se Zihova.
“Na huara pani tugo Arau sari doduru butubutu,
sari vasidi pu hadu lani igo Arau,
ba lopu kote huara pani beto igo Arau si agoi.
Kaqu va kilasa igo tugo Arau, ba koari na vinilasa toṉotodi;
na lopu sapu, lopu kote tava kilasa hokara, sapu gua.”