12
Zobi
1 Olaṉa se Zobi,
2 “Hokara, gamu tu si tagoa sa ginilagilana lohina.
Doduru ginugua si tumae beto ni gamu.
Pana mate gamu si kote mate turaṉia gamu sa tinumatumae.
3 Arau ba koadia qua ginilagilana gugua tugo gamu,
lopu na tumae hola nau gamu.
Esei na lopu gilani sapu zama ni gamu?
4 Ba va sisire nau ri qua baere,
ba pana varavara la si arau koe Tamasa visoroihe si hoke olaṉa au Sa.
Gua ke hegere nau rini, ba na tie ṉoṉo na toṉoto si rau.
5 Gamu si loke mia tinasuna, ba va sisire nau gamu;
tupelia gamu sa tie sapu tata hoqana.
6 Ba sari tie hikohiko si koa va bulei dia,
meke arini pu va bugoro ia sa Tamasa si koa valeana dia,
ba paleki mo rini sari dia tamasa beku pa limadia.
7 Nanasi mo sari kurukuru made nenedi meke kote va tumatumae gamu rini,
babe sari kurukuru tapuru pa galegalearane meke kote tozini gamu rini,
8 babe sari linetelete pa pepeso meke kote va tumatumae gamu rini,
meke sari na igana pa kolo ba kote va gilana gamu mo rini.
9 Ari doduru ele gilana betoa,
sapu sa tinasuna taqarau si mae guana koasa limana e Zihova.
10 Ura sa tinoa tadi doduru kurukuru si koa mo pa limana Sa,
meke sa siniṉo tadi na tie si koa pa Nana ṉiniraṉira.
11 Gua sa mea sapu hiva hola va liṉiliṉia sa ginani,
si sa taliṉa ba hiva avoso sigiti zinama tugo.
12-13 Sari tie koadi tagoa sa gilinagilana lohina,
ba Tamasa tagoi sari gilinagilana meke ṉiniraṉira.
Sari tie koadi boka dogoro va bakalia sa tinoa,
ba sa Tamasa si boka dogoro va bakalia sa tinoa meke tago ṉiniraṉira tugo.
14 Pude huhuara sa Tamasa si esei kote boka kurikuri pule,
meke pude va nuquru tie si Asa pa vetu varipusi si esei kote boka va rupaha pulei?.
15 Pude va nosoa Tamasa sa ruku si kamo mo sa soṉe.
Pude va mae ia Sa sa ruku si naqe mo sa popoa.
16 Uve, sa Tamasa si ṉiṉira hola meke tagoa Sa minataqara,
sari tie sekesekei meke arini pu ta turaṉa va sea si koa beto pa limana Sa.
17 Vagi pani Sa sari ginilagilana tadi tie tuturaṉa,
meke guni ni Sa na tie pekipekidi sari tie varipitui.
18 Sari baṉara si va gore pani Sa,
ta pusi meke ta turaṉa taloa si arini.*Sa vesi hie pa Zinama Hiburu si lopu bakala. Va gore pani Sa sari baṉara, babe rupahi Sa sari na tie pu vata pusi i rina baṉara, meke va guni ni Sa sari na baṉara gua ri na pinausu.
19 Sari na hiama si ta vagi palae pa dia tuturuana meke ta turaṉa taloa pa kinurekure,
meke va gore pani Sa saripu koa seunae pa tuturuana pa Zelepade.
20 Va nosoi Sa pude lopu zama sari tie ta raṉedi,
meke vagi pani Sa sari gilinagilana tadi tie koadi.
21 Va kurekure i Sa saripu tago ṉiniraṉira pa popoa,
meke vagi pani Sa sari ṉiniraṉira tadi na koimata.
22 Va vura i Sa sari hiniva kaleadi sapu ta tome pa huporo;
meke sa huporo dudukurumu si turaṉa la nia Sa pa kalalasa.
23 Kuri Sa sari na butubutu, meke huara pani tugo Sa,
va noma i Sa sari na butubutu, meke veko pani Sa.
24 Va pupuhi Sa sari na dia koimata,
meke va ene i Sa lamae, nunala meke muliuṉu.
25 Ene tapotapoe si arini pa huporo, na loke zuke,
meke va hoqa i Sa lamae guana tie naponapodi.
*12:18 Sa vesi hie pa Zinama Hiburu si lopu bakala. Va gore pani Sa sari baṉara, babe rupahi Sa sari na tie pu vata pusi i rina baṉara, meke va guni ni Sa sari na baṉara gua ri na pinausu.