1 Zama se Zihova koe Mosese, 2 “Mu tozini sari Eroni meke sari na tuna koreo, ‘Kaqu va lavatia gamu sa Pozaqu Hopena. Kaqu pamaṉani gamu sari na vinariponi hopedi pu va madini rina tinoni Izireli koa Rau. Ura Arau se Zihova. 3 Be keke tie koasa tutimu goi vugo na repere sapu bonina pa dinoṉo te Zihova si ene tata maei sari na vinariponi na vina vukivukihi pu va madini ri na tinoni Izireli koa Rau, sa tie sana si mani lopu somana pule pa tinavete hiama pa kenuqu Rau, sina Arau se Zihova.

4 Be keke tie koasa tutina Eroni pu koa ia na minoho kaleana pa kapuna, babe muzi laguna si lopu boka henai sari na vinariponi hopedi, osolae via si asa meke ta salaṉa koasa nana minoho. Sa hiama si boka tava boni be tiqua sa si keke tiṉitoṉa sapu tiqua na tiṉitoṉa bonina, be na tini matena, babe sa tie lulua haruna, 5 babe tiqua sa si keke votiki tiṉitoṉa bonina babe keke kurukuru bonina, babe keke tie sapu bonina. 6-7 Sa hiama sapu va bonibonie si kaqu boni hola nana tugo, osolae kamo totoso lodu sa rimata. Lopu boka henai sa sari na ginani hopedi osolae lodu sa rimata meke huhuve si asa, beto asa si kaqu tiqe henai sa sari na vinariponi ginani madidi. 8 Lopu kaqu hena ia sa sa masana sa kurukuru sapu mate hoboro, babe sapu tava mate koa ri na kurukuru pinomodi. Ura kote tava boni si asa koarini. Arau se Zihova.

9 Gua asa ke kaqu kopuni ri na hiama sari na tinarae saripu ponini Rau koa rini, pude lopu kaqu tava kilasa si arini koa rina dia sinea meke mate, sipu va kari rini sari na tinarae madidi. Ura Arau se Zihova pu va madidi rini.

10 Sa tie sapu podo vura maena mo pa korapana sa tatamana hiama si boka henai sari na vinariponi ginani hopedi; loke tie pule si kaqu henai si arini. Namu loke tie enene pu somana koa koasa hiama babe na tie ta tabaradi koasa hiama si kaqu somana henai si arini. 11 Ba sari na pinausu mo tanisa hiama pu holuni sa koasa nana poata soti babe podona pa nana vetu si boka hena ia sa ginani sapu vagia sa hiama. 12 Sa tuna vineki sa hiama sapu haba ia si keke tie, sapu lopu na hiama si lopu kaqu henai sa sari na vinariponi ginani hopedi. 13 Ba be naboko sa barikaleqe sana, babe sa barikaleqe ta luluarana sapu loke tuna, meke pule la koa pule pa vetu tanisa tamana telena eke, si boka hena ia sa sa ginani tanisa tamana sapu sa hiama sapu ta vagi koari na vinariponi ginani hopedi tadi na tie.

14 Be keke votiki tie pu lopu koa koasa tatamana si lopu va nonoga ia meke hena hola ia sa si keke koa ri na ginani hopedi sapu ta poni koari na hiama, si kaqu hobe pulea sa sa doduruna sa laena meke tomo la nia koa sa si ka hiokona puta paseniti padana meke vala nia koasa hiama. 15 Ke sari na ginani hopedi saripu valani ri na tinoni Izireli koe Zihova si lopu kaqu sasuru nia ri na hiama, 16 meke va malumu lani koari na tie pu lopu na hiama pude hena hobori, na kote va sea meke tava kilasa sa tie gua asa. Ura Arau se Zihova sapu va madidi si arini.’ ”

17 Zama se Zihova koe Mosese, 18 “Mu la, mamu tozi sari na tinarae hire koe Eroni, koari na tuna koreo meke koari doduru tinoni Izireli: ‘Be keke tie pa butubutu Izireli, babe keke tie karovona sapu koa pa Izireli, si hiva ponia si keke vinariponi vina vukivukihi va uququ pude va gorevura ia gua sapu va tatara nia sa babe na dia vinariponi pa nana hiniva soti koe Zihova, 19 si kaqu na kokoreo sa kurukuru asa, meke loke ari kisakisana pa tinina. Be lopu gua asa Arau Zihova si lopu kaqu qetu nia. 20 Be keke tie si ponia si keke kurukuru kaleana si lopu kaqu ta qetue koe Zihova si asa.*Diut 17:1 21 Be keke tie si ponia sa nana vina vukivukihi binaere koe Zihova, pudena vina gorevurana sa nana vina tatara, babe sa nana vina vukivukihi pa nana hiniva soti, ba sa kurukuru si kaqu toa va leanana, loke ari kisakisana pude boka ta qetue koe Zihova si asa. 22 Mi lopu ponia koe Zihova si keke kurukuru sapu behuna, babe moku nenena, na bakorana, tubutubuna, babe votiki minoho pa kapuna. Namu lopu kaqu poni nia gamu si keke vinariponi ginani gua arini koasa hope pude te Zihova. 23 Boka ponia pa mua hiniva soti si keke bulumakao, babe keke sipi sapu lopu noma vari ṉoṉoi tinina, ba lopu kaqu ta qetue tugo, pude na vina gorevurana mo sa vina tatara si asa. 24 Mu lopu ponia koe Zihova si keke kurukuru sapu ele ta puzalana, bakorana, munalana, babe poṉo sa kikikolona. Na lopu tava malumuna pa mua popoa soti si asa.

25 Mu lopu vari poni nia si keke kurukuru koe Zihova pude na vinariponi ginani, sapu ta poni mae guana koasa tie karovona pa votiki popoa. Sari na kurukuru gua arini si ele boni, loke laedi meke lopu kaqu ta qetue si arini koe Zihova.

26-27 Pana podo si keke tuna bulumakao babe keke lami babe keke tuna qoti si kaqu koa hola koasa tinana si asa koari ka zuapa rane. Ba pa mudina asa, podalae koasa rane vina vesu meke hola la si kote boka tava ego si asa pude poni la nia koe Zihova sa vinariponi ginani asa. 28 Mu lopu va matea si keke bulumakao meke sa tuna, babe keke sipi meke na tuna pa keke rane mo. 29 Pana va vukivukihi nia goi sa vina vukivukihi pude zama valeana koe Zihova, si mamu luli sari na tinarae pude boka ta qetue si asa koe Zihova; 30 mamu hena betoa koasa rane tugo asa, osolae lopu ele kamoa munumunu.’ ”

31 Zama se Zihova, “Mu va tabei sari na Qua tinarae; ura Arau se Zihova. 32 Mu pamaṉa nia sa Pozaqu hopena; kaqu gilania ri doduru tinoni Izireli sapu Arau si kaqu tava hope. Ura Arau se Zihova, meke Arau tugo si va via i na va madi gamu si gamu; 33 meke turaṉa vurani gamu si gamu pa popoa Izipi pude ta evaṉae na mia Tamasa. Ura Arau tugo se Zihova.”