1 Sipu hola sa oza, si zama la se Zihova koari Mosese e Eleaza tuna koreo Eroni,*Nab 1:1-46 2 “Mi naei koari na dia puku tatamana sari doduru butubutu Izireli, saripu ka hiokona puta vuahenidi meke hola, saripu padadi pude varipera” 3-4 Va tabea ri Mosese e Eleaza si Asa, meke tioko varigara ni ri karua sari doduru tie varipera saripu hola hiokona vuahenidi. Varigara si arini koasa pezara pa Moabi, pa kali gasa rimatana sa Ovuku Zodani. Zeriko si koa pa kali lodu rimata vasina.

Hire sari na tinoni Izireli pu taluarae mae guadi pa popoa Izipi:

5 Sa butubutu te Rubeni (Rubeni si na tuna koreo kenuna e Zekopi): sari na tuna Hanoki, Palu, 6 Hezironi, meke Kami. 7 Sari na vinarigaraedi si ari ka made ṉavulu ṉeta tina zuapa gogoto toloṉavulu tie varipera. 8 Sa tuna Palu si e Eliabi, 9 meke sari na tuna Eliabi si ari Nemuela, Datani, meke Abirami. (Datani meke Abirami hire sari karua pu lopu hiva nia sa tinuraṉa te Mosese meke Eroni, meke somana koasa puku tie te Kora. 10 Ta viqala sa pepeso meke ta onolo toa beto si arini, meke mate turaṉae beto koe Kora meke saripu luli koa sa, sipu sulu va mate betoi na nika sari ka karua gogoto lima ṉavulu tie. Ta evaṉae na vina balau koari na tinoni si arini. 11 Ba sari na tuna e Kora si lopu mate.)

12 Sa butubutu te Simione: sari na tuna si ari Nemuela, Zamini, Zakini, 13 Zera, meke Saulu. 14 Sari na vinarigaraedi rini si ari ka hiokona rua tina karua gogoto tie varipera.

15 Sa butubutu te Qadi: sari na tuna si ari Zepone, Hagi, Suni, 16 Ozini, Eri, 17 Arodi meke Areli. 18 Sari na vinarigaraedi si ari ka made ṉavulu tina lima gogoto tie varipera.

19-21 Sa butubutu te Ziuda: sari na tuna si ari Sela, Perezi, Zera, Hezironi meke Hamulu. (Karua tuna Ziuda, ari Eri meke Onani si mate pa popoa Kenani.) 22 Sari na vinarigaraedi rini si ari ka zuapa ṉavulu onomo tina lima gogoto tie varipera.

23 Sa butubutu te Isaka: sari na tuna si ari Tola, Pua, 24 Zasubi meke Simironi. 25 Sa vinarigaraedi rini si ari ka onomo ṉavulu made tina ṉeta gogoto tie varipera.

26 Sa butubutu te Zeboloni: sari na tuna si ari Seredi, Eloni, meke Zalili. 27 Sa vinarigaraedi rina butubutu Zeboloni si ari ka onomo ṉavulu tina lima gogoto tie varipera.

28 Sa butubutu te Zosepa: karua sari na tuna koreo, ari Manase meke Iparemi.

29 Butubutu te Manase: sari na tuna si ari Makiri si na tamana Qileadi. 30 Sari na tuna e Qileadi si Iezera, Heleki 31 Asirieli, Sekemi, 32 Semida, meke Hepera. 33 Se Zelopehadi sa tuna koreo e Hepera, si loke tuna koreo, ba koba vineki mo; sari pozadi si ari Mala, Noa, Hoqola, Milika, meke e Tiriza. 34 Sa vinarigaraedi si ari ka lima ṉavulu rua tina zuapa gogoto tie varipera.

35 Butubutu te Iparemi sari na tuna si ari Sutela, Beka meke Tahani 36 Sa pinodo te Erani si gore mae gua koe Sutela. 37 Sa vinarigaraedi si ari ka toloṉavulu rua tina lima gogoto tie varipera.

Arini sari na pinodo saripu gore mae gua koe Zosepa.

38 Sa butubutu te Benisimane: sari na tuna si ari Bela, Asibeli, Ahiramu, 39 Sepupama, meke Hupami. 40 Sari na tuna e Aradi meke Neamani si gore mae gua koe Bela. 41 Sa vinarigaraedi si ari ka made ṉavulu lima tina onomo gogoto tie varipera. 42 Sa butubutu te Dani: sari na tuna si e Suhami. 43 Sa vinarigaraedi si ari ka onomo ṉavulu made tina made gogoto tie varipera.

44 Butubutu te Asa: Sari na tuna Imina, Isivi, meke Beria. 45 Sari na tudia ri Hebere meke Malakiele si gore mae guadi koe Beria. 46 Asa si keke tuna vineki pozana e Sera. 47 Vinarigaraedi rini si ari ka lima ṉavulu tina made gogoto tie varipera.

48 Sa butubutu te Napitalai: sari na tuna si ari Zazili, Guni, 49 Zezera, meke Silemi. 50 Sa vinarigaraedi si ari ka made ṉavulu lima tina made gogoto tie varipera.

51 Sa vinarigaraedi ri doduru tie Izireli si ari ka onomo gogoto eke tina zuapa gogoto toloṉavulu:

52 Zama se Zihova koe Mosese, *Nab 34:13; Zos 14:1-2 53 “Mu paqaha poni pepeso sari na butubutu, koari hopeke dia pada. 54-56 Pana va hia i gamu sari na pepeso si mamu mudumudukeda ni. Sari na pepeso nomadi si kaqu poni lani gamu koari na butubutu nomadi, saripu hitekedi si koari na butubutu hitekedi.”

57 Sari na puku tatamana te Qerisoni, Kohati meke Merari si koa pa korapana sa butubutu te Livae. 58 Sari na pinodopodo tadi rina puku tatatamana hire, si ari Libini, Heboroni, Mahili, Musi, meke Kora si somanae tugo koasa butubutu asa. Meke se Kohati hie si na tamana Amaramu, 59 pu habana sa tuna vineki e Zokebedi. E Zokebedi si podo pa popoa Izipi. Zokebedi meke Amaramu si podoi sari ka ṉeta tuna: karua koreo ari Mosese, e Eroni, meke se Miriami, sa tasidia vineki. 60 Se Eroni si ka made tuna koreo, ari Nadabi, Abihu, Eleaza, meke Itamara.*Nab 3:2 61 Ari Nadabi meke Abihu si mate sina va vukivukihi la nia ri karua koe Zihova, sa nika sapu lopu madina. *Liv 10:1-2; Nab 3:4 62 Sari na tie na koreo saripu podo koasa butubutu Livae, pu keke sidaradi babe hola si ari ka hiokona ṉeta tina. Sa ninaedi sari na tie hire si lopu ta nae varihenie koari na tinoni Izireli, sina lopu ta paqaha poni pepeso si arini pa popoa Izireli.

63 Sari na puku tie hire si ta nae gore koari Mosese e Eleaza, totoso naei rini sari na tinoni Izireli koasa pezara pa Moabi, sipu mae si arini koasa pezara pa Moabi pa kali karovona sa Ovuku Zodani tata pa Zeriko. 64 Namu lopu keke koari na tie hire si ta nae totoso ta nae sari na tie Izireli pa popoa qega pa Saenai. 65 Ele zama kenu nia tu e Zihova, sapu kaqu mate beto sari doduru pu ta nae pa soloso qega, ba ari Kelebi sa tuna koreo e Zepune, meke se Zosua sa tuna koreo e Nani mo si kaqu koa hola.