1 Totosona koa si arini pa pezara pa Moabi, pa kali gasa rimatana sa Ovuku Zodani tata pa Zeriko si zama la koe Mosese se Zihova: *Zos 21:1-42 2 “Tozini sari na tinoni Izireli, sapu la gua koari na tinago pepeso na vasileana sapu kote vagi rini, si kaqu poni popoa rini sari na tuna Livae pude boka koai, meke sa pepeso vari likohaedi rina vasileana pude kopuni sari na dia sipi. 3 Sari na vasileana arini si kaqu tadi na tuna Livae, meke kaqu koa si arini vasina. Sa pezara duduli si pude tadi na dia sipi na bulumakao, meke doduru dia kurukuru pule.

4 Sa ninomana sa pezara koa ia na duduli si kote podalae tata pa gobana sa vasileana meke hola nia ka made gogoto lima ṉavulu puta mita pa hopeke kalina, 5 pude gua asa si kote sia gogoto mita pa hopeke ka made kalina sa vasileana, meke sa vasileana si kote pa kokorapana puta sa popoa.

6 Kaqu poni ni gamu koari na tuna Livae sari ka onomo popoa nomadi pude tadi na tie govetedi, be va mate tie si keke tie Izireli ba lopu pa nana hiniva soti. Poni lani si ka made ṉavulu rua vasileana pule, 7 meke sa pezara duduli pa vari likohaedi pude tadi na kurukuru sipi na bulumakao. Sa vinarigaraedi sari na popoa arini si ka made ṉavulu vesu vasileana. 8 Sa ninaedi sari na popoa tadi na tuna Livae pa kokorapana sa popoa tadi hopeke butubutu si kote luli gua koari na ninomadi rina butubutu meke na dia pepeso.”

9 Tozi nia e Zihova se Mosese, 10 pude zama koari na tie Izireli: “Totosona karovia gamu sa Ovuku Zodani, meke nuquria gamu sa popoa Kenani, 11 kaqu vizati gamu sari na vasileana vasina boka govete la koa tome sa tie be va matea sa si keke tie, ba lopu evaṉia sa pa nana hiniva. 12 Vasina kote ta harupu si asa koari na turaṉana sa tie sapu tava mate. Loke tie ta zutuna sapu va matea sa tie si kaqu boka tava mate osolae ta pitu si asa koari na tinoni pa vasileana. 13 Vizati ka onomo vasileana, 14 Ka ṉeta pa kali gasa rimatana sa Ovuku Zodani, meke ka ṉeta pa popoa Kenani pa kali lodu rimatana sa Ovuku Zodani. 15 Sari na vasileana tadi na tie govetedi hire si tamugamu na tie Izireli meke tadi na tie karovodi be koa turaṉa paki gamu babe koa hokaradi koa gamu. Be keke tie va matea si keke tie ba lopu pa nana hiniva soti, sa tie asa si kote govete la koasa vasileana tadi na tie govetedi sapu tata koasa.

16-18 Be keke tie si tavetavete nia si keke tiṉitoṉa aeana, patu, babe na huda pude seke va matea sa tie, asa tugo si keke tie sapu va mate tie. 19 Sari na turaṉana soti sapu tata koasa tie sapu tava mate hie, si ari nana ṉiniraṉira pude va matea sa tie sapu va mate tie. Pana dogoria sa sa tie asa, si kaqu va matea sa si asa.

20 Be keke tie si kana ia si keke tie, meke va hoqa gorea pa pepeso babe gona nia tiṉitoṉa mamatana babe ṉaruna meke va matea sa si asa, 21 babe tupa nia limana sa si asa meke va matea, si na tie va mate tie tugo si asa meke kaqu tava mate tugo. Sa turaṉana soti sapu tata koasa tie matena si ari nana ṉiniraṉira pude va matea sa tie. Totoso dogoria sa si kaqu va matea sa si asa.

22 Be keke tie si lopu balabala ia pude ṉoṉovalia si keke tie, ba va hoqa gorea, babe gonaia sa, 23 ba be oki la nia sa si keke toṉa, ba lopu doṉo va nonoga ia sa sapu gonaia sa si keke tie, meke va matea sa si asa, ba lopu pa hiniva soti, meke lopu kanaia sa, si lopu kaqu tava mate si asa. 24 Koasa vinilitina sa ginugua hie, sa butubutu pa vasileana si kaqu dogoria meke vilitia sa guguana sapu tavetia sa tie va mate tie, meke lopu va malumia sa turaṉana soti pude hobe nia minate. 25 Sa butubutu pa vasileana si kote harupia sa tie sapu va matea sa tie, sina lopu pa hiniva soti si ta evaṉa si asa. Kote ta harupu si asa koari na turaṉana sa tie sapu mate, meke kote ta turaṉa pule la sa tie hie meke la koa koasa vasileana tadi na tie govetedi vasina koa tome si asa tatasana. Kaqu koa si asa vasina osolae kamoa sa minate tanisa ṉati hiama kenukenue.

26 Be sa tie sapu va mate tie si vura taloa koasa vasileana tadi na tie govetedi, 27 meke be dogoria sa turaṉana soti sa tie va mate tie, meke va matea sa, sa turaṉana soti si tava malumu pude va matea meke lopu kaqu ta zutu guana tie va mate tie si asa. 28 Sa tie sapu ta zutu sapu va matea sa tie ba lopu nana hiniva, si kaqu koa hola koasa vasileana vasina govete koa tome si asa, meke lopu vura taloa koasa popoa, osolae mate sa ṉati hiama kenukenue. Pa mudina sapu gua asa si kote tiqe pule la pa nana popoa soti si asa. 29 Sari na tinarae arini si tamugamu meke sari na turaṉamia vugo repere pa doduru vasina kote koa si gamu.

30 Be keke tie ta zutuna sapu na tie va mate tie, si lopu kaqu tava mate si asa be guana lopu tava sosode koari karua babe soku tie va sosode pa vinaripitui; sa vivinei tanisa keke tie va sosode eke mo si lopu pada pude va matea sa tie va mate tie.*Diut 17:6, 19:15 31 Lopu kaqu boka ta rupaha sa tie va mate tie be koadia sari na tie va sosode pude tozia sa hinokarana sapu va mate tie si asa; lopu kaqu ta vagi tugo sa poata hinerena sa nana sinea pude rupahia. 32 Be keke tie si govete la pa keke vasileana tadi na tie govetedi, si lopu kaqu va malumia pude taveti kaiqa vineko poata pude pule la pa nana popoa soti, totoso lopu ele mate sa ṉati hiama kenukenue. 33 Mi lopu va bonia sa popoa tamugamu. Be guana ta evaṉa sapu gua asa, si tava boni sa popoa vasina korapa koa ia gamu. Sa minate tanisa tie tava matena si va bonia sa popoa. Koasa minate tanisa tie va mate tie, si boka tava via sa popoa vasina sapu tava mate si keke tie. 34 Lopu va bonia sa popoa vasina koa si gamu, sina Arau se Zihova, si koa turaṉa gamu si gamu na tinoni Izireli.”