5
Vina Balau koasa Binarabarata
1 Tuqu, va avoso mae koasa qua ginilagilana lohina,
avoso va leana mae koari qua zinama sapu lohidi meke arilaedi,
2 pude mu boka kopu pule nigo pa binalabala leadi,
meke boka naqitia sa tinumatumae.
3 Sina sa mamalaiṉina sa barikaleqe barabaratana si lomoso guana zipale,
meke sa zinama tanisa si memehe guana oela.
4 Ba pa vina betona si pasa guana sile,
meke ṉaru guana magu sapu ṉaru vari kali.
5 Sa nenena si neti gore la pa minate,
meke sari inene tanisa si tuturaṉa toṉoto la pa lovu.
6 Asa lopu balabala hokaria sa hahanana tinoa,
sari siraṉa tanisa si koqi, ba lopu gilania sa.
7 Ego tuqu, mu avoso mae koa rau;
mu lopu muliṉi ni gua sapu zama ni rau.
8 Mu enea sa siraṉa sapu seu koa sa barikaleqe asa,
lopu ene tata la ia sa sasada vetu tanisa,
9 kote gua meke vari poni nia goi sa mua ṉiniraṉira arilaena koari kaiqa,
meke mate mokue pa limana sa palabatu tanisa barikaleqe barabaratana.
10 Uve, sari votiki tie kote deṉa ni sari mua tinagotago,
meke sa mua minabo si kote votiki tie tu na tagoi.
11 Pa vina betona sa mua tinoa si kote soliṉi si agoi,
totoso hokoto ni na tinoa sari tini, masa, na ehara.
12 Kote zama si agoi, “Vegua ke hako ta totoli si arau pa votiki tie?
Vegua ke kilua tu rau sa siraṉa toṉotona?
13 Na vea ke lopu va tabei rau sari tie va tumatumae
babe va avosi sari qua tie tarae?
14 Ele kamoa rau sa vina betona sa kinaleana;
meke doṉo hikare si rau pa kenudia ri na butubutu.”
15 Mu napo mo pa mua vovoina kolo soti,
mu lopu zoropo hoboro nia mo pa sisiraṉa sa kolo pa mua berukehe.*Sa Hiburu pa vesi hie si zama, “Vea ke zoropo hoboro nia mo pa sisiraṉa sa kolo pa mua berukehe,” ba sa ginuana si mu puta turaṉia sa mua barikaleqe eke mo, mu lopu puta turaṉa hoboro votiki barikaleqe.
16 Sari mua bukaha si kaqu zoropo la tu pa sisiraṉa?
Meke sari mua tototolo si kamo latu koari na varivarigarana?
17 Na kaqu na mia eke mo sapu asa,
lopu pude somana nia ari votiki barikaleqe.
18 Mani na bukaha minana sa mua barikaleqe koa goi;
mamu qetu nia sa barikaleqe haba ia goi totoso vaquramu,
19 sapu leleana meke tolavaena guana kurukuru dia.
Mamu qetu nia doduru totoso sa nana tinolava;
mamu qetuqetu nia doduru totoso sa nana tataru.
20 Tuqu, vea ke kote ta turaṉa va sea tu koasa barikaleqe barabaratana?
Vea ke kote hiva ṉaza ia tu goi sa barikaleqe tana votiki tie?
21 Ura sari na tinavete tana tie si dogoro betoi mo e Zihova,
meke tumae ni Sa sari doduru nana inene.
22 Sa tie kaleana si sipata pule nia mo koari nana sinea;
ta pusi ni sa sari iku tadi na tinavete kaleadi pu taveti sa.
23 Kote mate nia sa sapu loke tinarae boka lulia;
ta turaṉa va seu koari nana dinuviduvili.
*5:15 Sa Hiburu pa vesi hie si zama, “Vea ke zoropo hoboro nia mo pa sisiraṉa sa kolo pa mua berukehe,” ba sa ginuana si mu puta turaṉia sa mua barikaleqe eke mo, mu lopu puta turaṉa hoboro votiki barikaleqe.