12
1 Asa pu tataru nia sa tinarae pa tinoa si tataru nia sa tinumatumae,
ba asa pu hako ta gegese si pekipeki.
2 Sa tie leana si ta tokae koe Zihova,
ba va kilasi Sa sari tie sekesekei.
3 Sa tie si tasuna pude turu va nabu koari na hahanana kaleadi,
ba sa tie toṉoto si lopu kaqu ta rabutu palae.
4 Sa barikaleqe sapu taguena nana hahanana si na toropae binaṉara tanisa nana palabatu*Sa barikaleqe taguena si na vinahesi tanisa nana palabatu.,
ba sa barikaleqe sapu va kamo kinurekure si guana popozu pa susurina sa palabatu.
5 Sari hiniva tadi tie toṉoto si gotogoto,
ba sari binalabala vari tokae tadi tie kaleadi si na sinekesekei.
6 Sari zinama tadi na tie kaleadi si variva mate,
ba sari na zinama tadi tie toṉoto si variharupi.
7 Sari tie kaleadi si kamoi tinasuna meke lopu ta dogoro pule,
ba sa vetu tadi tie toṉoto si turu va nabu.
8 Na tie si ta vahesi, luli gua koari nana ginilagilana lohidi,
ba sarini pu kaleana dia binalabala si ta hakohakoe.
9 Leana hola si pude lopu ta gilana ba tago mua nabulu,
hola nia pude va sagesage pule nia ba loke gana ginani.
10 Sa tie toṉoto si kopu va leana ni sari nana kurukuru,
ba sari tataru tadi tie kaleadi si na ṉinovaṉovala.
11 Asa pu tavetavete nia sa nana pepeso si kote soku gana ginani,
ba asa pu koa va gulegulea si lopu tumae balabala.
12 Sari tie kaleadi si okoro ni sari tiṉitoṉa tadi na tie hikohiko,
ba sa karoso tadi tie toṉoto si toa va leana.
13 Sa tie kaleana si sipata pule nia koari nana zinama,
ba sa tie toṉoto si ilolae taloa nana koa sa tinasuna.
14 Na vua tadi nana zinama leadi si kamo koa sa,
gua tugo sari tinavete leadi pa limana si ta pia ni sa.
15 Sa hahanana tanisa tie duvili si toṉoto pa nana binalabala,
ba sa tie gilae si va avoso la pa vina balau.
16 Sa tie duvili si tuturei bugoro,
ba sa tie gilae si avoso pani sari zinama ṉoṉovala.
17 Sa tie va sosode hinokarana si tozi sa gua sapu hinokara,
ba sa tie va sosode sekesekeina si koha tugo si tozi sa.
18 Na zinama haluhalue si suvulu guana hopere,
ba sa mea tanisa tie gilae si ibu nia sa bakora.
19 Zinama hinokaradi si koa hola,
ba sa mea kokohana si pa totoso papakana mo.
20 Na koai sinekesekei bulodi saripu balabala pude tavete va kaleana,
ba na qinetuqetu si tadirini pu zama nia sa binule.
21 Loke ginugua kaleadi si kote ta evaṉa koa rini pu toṉoto,
ba sari tie kaleadi si kote siṉi i na tinasuna.
22 Zihova si kilu hola i sari beru sapu kokoha,
ba qetuqetu ni Sa sari na tie pu zama pa hinokara.
23 Sa tie gilae si lopu tozi lamae ni sari nana tinumatumae,
ba sa tie duvili si va titie ni sari nana pinupuhu.
24 Sa lima sapu tavetavete va ṉiṉira si kote na tie tuturaṉa,
ba sa vina betona sa hinakohako si kote ta garunu zuzuku tinavete mo.
25 Na tinalotaṉa si hoke ta mamata nia na tie,
ba na zinama koa ia tataru si hoke va mataqara tie.
26 Sa tie toṉoto si hoke va balau koari nana baere,
ba sa siraṉa tadi na tie kaleadi si turaṉa va sea tie.
27 Sa tie hakohako si lopu va kinai tugo sari gana hinabu,
ba sa tie ṉaliṉali si va ari laena i sari nana vinagi.
28 Pa hahanana tinoṉoto koa sa tinoa,
pa siraṉa asa sa tinoa hola.