16
1 Sari hiniva pa bulona si tanisa tie,
ba koe Zihova si mae sa inolaṉa hinokarana.
2 Doduru tinavete tanisa tie si toṉoto pa matana,
ba e Zihova si viliti sari nana hiniva.
3 Veko lani koe Zihova sari doduru tinavete tamugoi,
meke kote gorevura sari mua hiniva.
4 Doduru pu va podaki Sa si pude Tanisa sari laedi rini,
sari tie kaleadi ba koa nana dia rane tinahuara.
5 Zihova si hakohako ni sari bulo pu vahesi puleni,
mi tumae nia si hie: ura kaqu tava kilasa si arini.
6 Pa tataru nabuna meke rinaṉeraṉe si ta leosae sa sinea;
pa pinamaṉana e Zihova si lopu ene sea sa tie.
7 Pana leana sa hahanana tanisa tie koe Zihova,
si sari nana kana ba va bulei Sa.
8 Leana sa tie toṉoto sapu tagotago vasinahite,
hola nia sa tago va soku pa sinekesekei.
9 Pa bulona si tavetia sa tie sa nana inene,
ba e Zihova si vizatia sa siraṉa pude enea sa.
10 Sa beruna sa baṉara si zama ni sari inavoso hopedi,
nana vinilasa si toṉoto pana vari pitui sa.
11 Na sikele toṉotona si mae guana koe Zihova,
va pada vekoi Sa sari mamamata pude gotogoto.
12 Sari baṉara si etuli sari tinavete kaleadi,
sina sari binaṉara si tava turu pa tinoṉoto.
13 Sari baṉara qetuni sari na beru sapu lopu kokoha,
va arilaena i rini saripu zama pa hinokara.
14 Na binugoro tanisa baṉara si na inavoso mate,
ba na tie gilaena boka va ibu ia mo.
15 Koasa kinomolo pa isumatana sa baṉara si toa sari na tie,
pana qetuqetu si asa si guana lei paleke ruku totoso dada.
16 Pude vagi ginilagilana lohina si leana hola nia sa qolo,
pude vizatia sa ginilagilana si hola nia sa siliva.
17 Sa hinebala tanisa tie ṉoṉo si seu pa kinaleana;
asa pu kopu nia sa nana inene si lavelave nia sa nana tinoa.
18 Na vinahesi pule si va kamoa sa tinahuara,
na maqomaqo va titie si lopu sana hoqa.
19 Leana si pude va pepekae pa maqomaqo meke koa turaṉi saripu ta ṉovala,
hola nia pude somana vagi tiṉitoṉa ta hikodi koa rini pu vahesi puleni.
20 Asa pu va tabei sari ginarunu si kote toa va leana,
meke ta manae tugo sarini pu raṉea se Zihova.
21 Saripu gilae pa bulodia si ta pozae na tie gilaedi,
zinama avoso lea si va lomosia sa tinarae.
22 Ginilagilana si na bukaha tana tinoa koa rini pu tagoa,
ba na dinuviduvili si na linipulipu tadi na tie pekipeki.
23 Sa bulona sa tie gilae si turaṉi sari nana zinama,
meke sa beruna sa si va arilaena ia sa tinarae.
24 Zinama qetuqetu si guana namu zipale,
lomoso pa maqomaqo meke salaṉia sa sa tini.
25 Koa nana sa siraṉa sapu doṉo guana toṉoto pa tie,
ba pa vina betona si kamo la pa minate.*ZT 14:12
26 Na tie si tavetavete pude boka henahena;
sa inovia garunu la nia pude tavetavete.
27 Sa tie loke laena si tavete binalabala pude ṉoṉovala,
meke sari nana zinama si huhuara guana huruṉu nika.
28 Sa tie kaleana si va gevugevuru vinari tokei,
meke na ninanae si vari luara ni sari baere soti.
29 Sa tie varipera si toketoke ia sa turaṉana,
meke turaṉa gore nia sa pa siraṉa sapu lopu leana.
30 Asa pu matamata puri nia matana si korapa balabala hatai kaiqa kinaleana,
meke asa pu garata beruna si korapa la tavete kinaleana.
31 Na kalu keo si na toropae tolavaena,
ta vagi si asa koa rini pu koa va toṉoto.
32 Na tie lopu tuturei bugoro si leana hola nia sa tie varane,
asa sapu boka tuqe pule nia si leana hola nia si asa pu rapata vagia sa popoa.
33 Boka mudumudukeda si gita,
ba e Zihova tozia sa inolaṉa.