25
Tinepa Tinokae na Vinasare
(Keke kinera te Devita)
1 (Aleph)*Hopeke pukuna sa Sam 25 si podalae koa keke leta pa “A Ba Da” pa Vinekala Hiburu. Ke Zihova, koa Agoi mo si varavara atu si rau;
2 (Bet) kei qua Tamasa, koa Agoi mo si kalavarae si rau.
Maqu lopu koa tava kurekure pa vina kilasa,
Mu lopu va malumi sari na qua kana pude koa mataqara hola nau.
3 (Gimel) Sarini pu kalavarae koa Goi si lopu kaqu tava kurekure,
ba sari na tie va guguedi pa dia rinaṉeraṉe koa Goi si madi tava kurekure tugo.
4 (Dalet) Ke Zihova, Mu va gilana nau sari na Mua hiniva,
Mamu va tumatumae nau sari na Mua siraṉa.
5 (He) Mu va tumatumae nau sa Mua hinokara,
ura Agoi mo sa Tamasa, sa qua Hinarupu.
(Vav) Koa Agoi mo si kalavarae si rau doduru totoso.
6 (Zain) Kei Zihova, Mu balabala ia sa Mua tataru variva tukana,
meke sa Mua tataru nabuna sapu ele vata dogoro nia Goi podalae mae gua pukerane.
7 (Het) Mu taleoso nau koari na qua sinea na kinaleadi,
pu evaṉi rau totoso tie vaqura si rau.
Kei Zihova, Mu balabala au pa Mua tataru nabuna,
sina leana si Goi koari na tie.
8 (Tet) Toṉoto na ṉoṉo se Zihova,
gua asa ke va tumatumae ni Sa koari na tie sea sari Nana siraṉa vasina kaqu ene si arini.
9 (Yod) Turaṉi Sa si arini pu va pepekae koasa siraṉa toṉotona;
va tumatumae nia Sa koa rini sa Nana hiniva pude lulia rini.
10 (Kaph) Doduru totoso si turaṉi Zihova sari na tie koari Nana tataru nabuna meke na hinokara;
ta ronuena si Asa koarini pu kopuni sari Nana vinariva egoi na tinarae.
11 (Lamed) Kei Zihova, Mu taleoso nau koari na qua sinea,
sina soku hola tugo sari na qua sinea.
12 (Mem) Sarini pu pamaṉa nia se Zihova,
si kaqu va tumatumaeni Sa sa Nana hiniva pude lulia rini.
13 (Nun) Kaqu marevutu si arini doduru totoso,
meke sari na tudia rina tudia si kaqu tagoa sa popoa pepeso.
14 (Samek) E Zihova sina baere tadirini pu va tabea si Asa,
meke vata dogoro nia Sa sa nana vinariva egoi nabuna koa rini.
15 (Ain) Kalavarae si rau koe Zihova doduru totoso,
meke va sare au Sa pa tinasuna.
16 (Pe) Mu doṉo mae au, ba Zihova, Mamu tataru nau,
sina loke tie si toka nau, meke koa pa tinasuna si rau.
17 (Zade) Mu va maluarau koari doduru qua tinalotaṉa,
Mamu harupau koari doduru qua tinasuna.
18 (Qoph) Mu balabala ia sa qua tinasigiti,
Mu taleosoni sari na qua sinea.
19 (Resh) Mu doṉo la ia sa sinokudi rina qua kana;
Mamu dogoria sa ṉiṉirana gua sa dia kinukiti koa rau.
20 (Shin) Toketoke hukata nau, Mamu harupau;
kopu nau pude qu lopu tava kurekure si rau,
sina koa Agoi mo si aqorae si rau.
21 (Tav) Sa qua tinoṉoto meke sa hinokara si madi kopu hukata nau pa kinaleana,
sina kalavarae zoṉazoṉa koa Goi si rau.
22 Ke Tamasa, Mu harupi sari na Mua butubutu Izireli,
koari doduru tinasuna.
*25:1 Hopeke pukuna sa Sam 25 si podalae koa keke leta pa “A Ba Da” pa Vinekala Hiburu.
*25:11 Ene kenuna e Zihova se Mosese meke zama nia Sa sa guguana sa Pozana sapu guahe: “Arau se Zihova, sa Tamasa sapu ta siṉie na tataru meke tokani na taleosoni Rau sari na tie. Meke lopu hoke tuturei bugoro. Meke sa Qua tataru lavata si koa hola doduru totoso, meke kopu ni Rau sari na Qua zinama.” Mi tiroa Ekd 34:6-7: