79
Vinaravara pude Va Sarea sa Butubutu Izireli
(Keke vinaravara te Asapa)
1 Kei Tamasa, sari na butubutu huporo si mae pude vagi pania sa Mua pepeso pu ponia Goi koari na Mua tie.*2 Baṉ 25:8-10; 2 Koron 36:17-19; Zer 52:12-14
Ele va bonia rini sa Mua Zelepade hope,
meke ele huara ilasia rini sa popoa Zerusalema.
2 Ele veko pani rini sari na tinidi rina Mua tinoni pu mate, pude gani rina kurukuru tapuru;
meke veko pani tugo rini sari na tinidi rina Mua nabulu pu tava mate, pude gani rina kurukuru ṉame pinomodi.
3 Ele va matei rini sari na Mua tie,
meke zoloro guana kolo sari na eharadi rini pa korapana sa popoa Zerusalema;
meke loke tie si koa hola vasina pude pomunu ni sari na tinidi.
4 Ele ta evaṉae na vina sisireana si gami koari butubutu huporo,
zama ṉoṉovala gami na hegehegere ni gami rini.
5 Kei Zihova; vea seunae gua si kaqu koa hola sa Mua tinaṉaziri?
Kaqu bugoro seunae ni gami Goi guana nika huruṉuna ninae rane?
6 Mu bugoro ni, Mamu ta ṉaziri ni sari na butubutu huporo pu lopu vahesi Igo,
meke sari na butubutu pu lopu varavara na raṉego rini si Goi.
7 Ura ele va matei rini sari na tutina e Zekopi,
meke huaria rini sa popoa pu poni ni Goi.
8 Mu lopu vata goregore ni koa gami sari na sinea tadi na tiatamamami pukerane.
Mu tuturei tataru ni gami;
ura ele malohoro si gami pa rinaṉeraṉe.
9 Kei Tamasa, Mu tokani gami, Mamu harupu gami,
Mu va sare gami, Mamu taleosoni gami,
pude boka tava lavata si Goi koari na tinoni.
10 Na vegua ke zama sari na butubutu tie huporo,
“Avei tu sa Mua Tamasa,” gua.
Mani ta dogoro koa gami pa matamami sa vina kilasadi rina butubutu huporo
pu va matedi sari na Mua nabulu.
11 Mani ta avoso koa Goi sa sinilava tadi na Mua tie pu ta pusidi pa vinaripera,
Pa Mua ṉiniraṉira nomana si Mu vata rupahi saripu ta pitu pude tava mate.
12 Kei Baṉara, Mu hobe la nia padana zuapa totoso koari na butubutu huporo
sa ṉinovaṉovala gua sapu tavete atu nia rini koa Goi.
13 Meke gami na Mua tinoni, gami na Mua rovana sipi,
si kaqu zama leana atu koa Goi,
meke lopu kaqu hite makudo vahesi igo ninae rane ka rane.