105
Sa Tamasa meke Nana Tie
(1 Koronikolo 16:8-22)
1 Mi vahesia se Zihova, mi tozi vura nia sa Nana vina lavata,
tozi koari doduru butubutu sari Nana tinavete.
2 Kera la koe Zihova, mi kera vahesia si Asa;
tozi vura ni sari doduru Nana tinavete variva magasadi!
3 Mada qetu nia sapu Tanisa si gita,
madi koa qetu sarini pu vahesia si Asa.
4 La hata ia sa tinokae koe Zihova,
hata lamo ia sa minana Tanisa.
5 Mi balabala i sari na tinavete marilaedi pu taveti Sa,
meke sari Nana tinavete variva magasadi, na vinaripitui pu evaṉi Sa.
6 Gamu na tutina e Ebarahami, sa Nana nabulu;
meke gamu na tuna e Zekopi, sapu ta vizata mia,
7 e Zihova sa nada Tamasa si Asa,
sari na Nana tinarae si tana doduru kasia popoa.
8 Kaqu kopu nia Sa sa Nana vinariva egoi nabuna ninae rane.
Sari na Nana vina tatara si tadi na tina sinage.
9 Kaqu kopu nia Sa sa Nana vinariva egoi koe Ebarahami,*Zen 12:7, 17:8, 26:3
meke sa Nana vina tatara koe Aisake.
10 Ele va tatara nia Zihova si keke vinariva egoi koe Zekopi,*Zen 28:13
sapu kaqu koa hola ninae rane.
11 Zama si Asa, “Kaqu ponigo Rau sa popoa Kenani,
kaqu na mua tinago soti si asa,” gua sa Tamasa.
12 Lopu soku sari na tinoni te Tamasa,
meke na tie karovodi si arini pa popoa Kenani.
13 Ene varikarovae popoa mo si arini,
taluarae pa keke popoa, meke la pa keke popoa pule, gua mo.
14 Ba lopu va malumi Tamasa sari na votiki butubutu pude ṉoṉovali si arini.*Zen 20:3-7
Kopu ni Sa si arini, meke va balau i Sa sari na baṉara.
15 “Mu lopu tiqu la i sari na Qua nabulu ta vizatadi,
lopu taṉini sari na Qua poropita!” gua si Asa.
16 Va mae ia e Zihova sa soṉe pa popoa,*Zen 41:53-57
meke va papakia Sa sa ginani.
17 Ba ele garunu va kenue la nia Sa si keke tie,*Zen 37:28, 45:5
se Zosepa, sapu ta holuholue pude na pinausu.
18 Ta pusie seni sari na nenena,*Zen 39:20 kamo hinia 40:23
meke ta paku aeana sa ruana,
19 osolae tava gorevura sapu gua koroto nia sa,
tava sosode pa Nana zinama e Zihova sapu toṉoto se Zosepa.
20 Ke va vuraia sa baṉara pa Izipi si asa pa vetu varipusi,*Zen 41:14
meke vata rupahia sa.
21 Vata evaṉae nia koimata sa si asa pa nana qinavuna,*Zen 41:39-41
meke ponia sa sa ṉiniraṉira pude koa totoli nia sa doduruna sa popoa Izipi,
22 meke sari nana ṉati tie tavetavete,
meke pude va tumatumaei sari nana tie totoli.
23 Meke rizu la pa Izipi se Zekopi,*Zen 46:6, 47:11
meke koa vasina.
24 Meke va sokui lala nana e Zihova sari Nana tie,*Ekd 1:7-14
meke va ṉiṉirai Sa, hola ni sari na dia kana.
25 Hobei e Zihova bulodi sari na tie Izipi,
pude kukiti ni sari Nana tie pu nabulu nia si Asa,
ke ṉoṉovali rini sari na tie Izireli.
26 Beto asa si garunu la nia Sa se Mosese sa Nana nabulu,*Ekd 3:1 kamo hinia 4:17
meke se Eroni sapu ele vizatia Sa.
27 Tavete vura ni rini sari na vina gilagila pa varikorapadi rina tinoni,
meke sari na tinavete variva magasadi pa popoa Izipi.
28 Va huporo dudukukuru mia Tamasa sa popoa,*Ekd 10:21-23
ba korodia va tabea tugo rina tie Izipi sa Nana zinama.
29 Iliri ni ehara Sa sari na dia ovuku,*Ekd 7:17-21
meke va mate betoi Sa sari na dia igana.
30 Va siṉi nia bakarao Sa sa doduruna sa dia popoa,*Ekd 8:1-6
kamo tu pa korapana sa vetu baṉara ba koa ia tugo bakarao.
31 Zama mo sa Tamasa meke omunu la mo sari doduru dodoa*Ekd 8:16-17,20-24
na nikuniku pa doduruna sa popoa Izipi.
32 Va raza la i tugo Sa sari na ruku aesi,*Ekd 9:22-25
meke na kapi si malara la pa doduruna sa popoa.
33 Va mate pani Sa sari na dia ṉati vaeni meke sari na vuadi,
meke sari na dia huda piqi, meke va kaleana betoi Sa sari doduru dia hudahuda.
34 Zamai Sa sari na kupokupo, ke omunu la si arini,*Ekd 10:12-15
soku vuro tina meke lopu boka ta nae.
35 Gani rini sari doduru linetelete pa pepeso;
gani rini vuadi sari doduru vuvua pa inuma.
36 Va mate pani Sa sari na tudia koreo kenudi*Ekd 12:29
rina tatamana pa popoa Izipi,
saripu podo kekenudi koarini.
37 Beto asa si turaṉa vura ni Sa pa Izipi sari na tie Izireli;*Ekd 12:33-36
paleki rini sari na dia siliva na qolo,
toa valeana na ṉiṉira si arini.
38 Matagutu ni rina tinoni pa Izipi sari na tie Izireli,
ke totoso taluarae taloa rini, si qetu sari na tie Izipi.
39 Va aqori Sa si arini pa opo adumuna keke lei,*Ekd 13:21-22
meke turaṉi Sa si arini panaboṉi pa kalalasana keke nika.
40 Tepa ginani si arini, ke ponini Sa sari na kurukuru tapuru, pozana kueli,*Ekd 16:2-15
meke na ginani pu hoqa gore mae pa maṉauru ke deṉa si arini.
41 Va puzaka vura ia Sa pa patu sa kolo,*Ekd 17:1-7; Nab 20:2-13
meke totolo guana leana pa qega.
42 Balabala pulea Sa sa Nana vina tatara madina
koe Ebarahami, sa Nana nabulu.
43 Gua asa ke turaṉa vura ni Sa pa Izipi sari Nana tie ta vizatadi,
meke kera na kukili si arini pa dia qinetuqetu.
44 Poni Sa koarini sari na pepeso tadi na votiki butubutu,*Zos 11:16-23
meke vala i Sa koa rini sari na inuma na vuvua tadi na votiki tie,
45 pude madi va tabei ri Nana tie sari Nana tinarae,
meke sari doduru Nana ginarunu.
Mi vahesia se Zihova!