140
Tinepatepa pude Ta Toketoke Hukata
(Keke kinera te Devita)
1 Kei Zihova, Mu harupau koari na tie kaleadi,
Mamu va sare au koari na tie variva mate.
2 Doduru totoso si pada vekoi rini sari na kinaleana pu hiva taveti rini,
meke lopu makudo sovuti rini sari na vinari kakatorae.
3 Sari na meadi si ṉaru, guana noki variva mate,*Rom 3:13
sari na dia zinama si variva mate guana noki varigarati.
4 Kei Zihova, Mu kopu nau pa limadia rina tie kaleadi,
va sare au koari na tie variva mate pu hata luli au.
5 Sari na tie vahesi pule ni si sekesekei nau,
taveti rini sari na siraṉa sinekesekei
na dia sipata pude boka va hoqau gua.
6 Zama si rau koe Zihova, “Agoi si na qua Tamasa,”
Kei Zihova, Mu avosia sa qua tinepatepa tinokae!
7 Kei Zihova qua Baṉara, meke na qua hinarupu,
ele va sare au Goi si rau pa korapa vinaripera.
8 Kei Zihova, Mu lopu poni ni koari na tie kaleadi gua saripu hiva ni rini,
Mu lopu va malumi pude va gorevura i gua saripu mizi veko i rini!
9 Mu lopu va mataqari sari na qua kana,
va hoqa pule lani koarini gua saripu hiva taveti rini koa rau.
10 Madi hoqa gore koa rini sari na motete leradi!
madi ta gonagona la si arini koasa pou meke lopu vura pule mae.
11 Madi lopu koa mataqara saripu zutu kokoha i sari kaiqa,
Sa kinaleana si mani hoqa pule la meke va mate pani gedi sari na tie kaleadi sara.
12 Zihova, gilania rau sapu toka ni Goi sari na habahuala pa dia tinasuna,
meke sa vina sare tadi pu malaṉa.
13 Kaqu vahesi zoṉazoṉa Igo rina tie toṉoto si Goi,
meke kaqu koa pa kenumu Goi sarini.