144
Keke Baṉara si Zama Leana koe Tamasa koasa Minataqara
(Keke vinaravara te Devita)
1 Mani tava lavata se Zihova sa qua Patu aqoroana,
Ura va tumatumae nau Sa sa binokaboka
pude rapata na varipera.
2 Asa sapu ta ronuena pa Nana tataru koarau, na qua bara patu ṉiṉirana.
Qua tinaharupu ṉiṉirana meke na qua tuturuana nabuna.
Koa Sa si kalavarae si rau pude tava sare.
Va kilasi Sa sari na votiki butubutu pude koa kaurae pa qua ṉiniraṉira.
3 Kei Zihova, na sa sa tie ke balabala va arileana ia Goi,*Zob 7:17-18; Sam 8:4
meke sa tuna na tie pu emu va taliṉa la ia Goi?
4 Sa tie si guana keke siniṉo mo.
Sari na rane pu toa sa, si guana keke opoadumu tapuru holana mo.
5 Kei Zihova, Mu tukelia sa maṉauru, Mamu gore mae!
Mu tuqei sari na toqere pude di puzaka vura tuṉaha.
6 Mu va malara la ia sa kapi, pude di ta hurakatae.
Mu gona ni tupi, pude di govete!
7 Mu qaqama gore mae pa Maṉauru,
Mamu harupau pa korapa qua tinasuna pu guana lamana peava.
Mu harupau pa limadi ri na tie karovodi,
8 saripu mari kokohadi,
meke gua saripu ele tokotokoro ni rini,
9 Kei Tamasa, kaqu kera atu nia rau si keke kinera vaqura,
kaqu mike na kera atu nia rau koa Goi si keke mike hapu sapu ka manege puta madorona,
10 Agoi pu va mataqari sari na baṉara,
meke sapu va sarea se Devita sa Mua nabulu pa vinaripera.
11 Mu harupau koari na qua kana ṉoṉovaladi,
Mamu va sare au pa ṉiniraṉira tadi na votiki tie
pu hola mari kokohadi,
meke gua saripu ele tokotokoro ni rini, ba kokoha ni tugo rini.
12 Sari na tuda koreo vaqura,
si madi koa guana linetelete pu toqolo va noma,
meke sari na tuda vineki si madi koa guana sinokirae tolavaedi,
sapu ta tavete pude na vinasari na sa vetu baṉara.
13 Sari nada lose vekovekoana ginani,
si madi siṉi na vuadi ri votivotiki linetelete.
Sari na nada sipi si madi podopodo va soku,
kamoa tina na tina, meke kamoa manege puta tina koari na dia bara.
14 Sari na nada bulumakao si madi podopodo va soku,
sari gobagoba si madi lopu ta huara koari na kana.
Mani lopu ta avoso si keke kinabo tinalotaṉa koari na kinaleadi pu taveti rina kana pa korapana sa nada vasileana nomana.
15 Madi koa qetu sarini vasina ta evaṉa saripu gua sara!
Madi koa qetu sari na tie pu na dia Tamasa se Zihova.