1 Koanana si keke turaṉana e Naomi, pozana e Boazi. Keke tie tagotagona si asa meke bokabokana pa zinama na binalabala. Keke tie pa butubutu tanisa palabatu te Naomi si asa, sapu se Elimeleki. 2 Meke zama la koe Naomi se Ruti, “Va malumau, maqu la pa inuma pude la pudiki kiko bale pu va hoqa hola i rina tie pakepakete. Kote la hata ia rau si keke tie sapu boka va malumau pude tavetavete luli pa mudidi rina tie pakepakete,” gua si asa.*Liv 19:9-10; Diut 24:19

Meke olaṉa se Naomi, “Ego tuqu, mu la tavetia gua sapu zama nia goi,” gua.

3 Ke topue la se Ruti pa inuma meke lululi mudi koari na tie tavetavete. Pudiki sa sari na kiko bale pu va hoqa pani rina tie tavetavete. Meke tamanae si asa pa nana vinizata sina sa inuma vasina la tavetavete sa si te Boazi, sapu na turaṉana e Elimeleki.

4 Hola kaiqa totoso, si la kamo se Boazi pa inuma, taluaraena mae pa Betilihema. Meke zama si asa koari nana tie tavetavete, “Mani koa koa gamu e Zihova,” gua.

Meke olaṉa hobe la sarini, “Mani mana nigo e Zihova,” gua.

5 Meke nanasia Boazi sa palabatu tadi na tie tavetavete, “Esei sa barikaleqe vaqura sana?” gua.

6 Meke olaṉa sa tie, “Asa sa barikaleqe karovona sapu lulina mae koe Naomi pa Moabi. 7 Tepa si asa koa rau pude pudipudiki luli kiko bale pa mudidi rina tie kotokoto. Podalae munumunu hokara si tavetavete sa meke kamoa kamahire, si tiqe la magogoso paki si asa pa ipi,” gua sa tie.

8 Meke tiqe zama la koe Ruti se Boazi, “Tuqu, mu avoso mae koa rau. Mu lopu rizu la pa votiki inuma si goi, ba pa qua inuma mo. Tavetavete somana mo koari na qua vineki tavetavete. 9 Mamu kopu totoko nia sa vasina pudiki iqoso bale ri na tie, mamu luli mo mudidi sari na vineki. Ele tozini rau sari na qua tie tavetavete pude lopu hukatigo babe ṉoṉovaligo. Meke be memeha goi, si mu la napo koari na vovoina kolo pu utuvu va siṉi vekoi rini,” gua se Boazi.

10 Meke hoqa todoṉo pa pepeso se Ruti meke zama la koe Boazi, “Na vegua ke hiva toka sisigiti nau tu goi si rau? Meke na vegua ke tataru hola nia goi sa tie karovona kekeṉoṉo gua arau?”

11 Meke olaṉa se Boazi, “Na ele avosoni rau sari na mua tinavete leadi gua pu evaṉi goi koe Naomi sa roamu barikaleqe seunae gua mate sa mua palabatu. Gilania rau sapu gua veko pani guni goi sari na tiatamamu, na mua popoa soti, meke mae koa somanae koari na tie pu lopu hite ele gilani goi visoroihe. 12 Mani pia igo e Zihova koari doduru mua tinavete leadi pu taveti goi. Mu vagia sa mua pinia hokotona koe Zihova sa Tamasa tadi na tie Izireli. Ele mae aqoro si goi koa Sa pude ta tokae,” gua se Boazi.

13 Meke olaṉa se Ruti, “Baṉara, noma hola sa mua tataru vatukana koa rau. Lopu arilaequ kekeṉoṉo gua rina mua nabulu soti si rau, ba sari mua zinama bulebuledi si va ṉiṉira au,” gua se Ruti.

14 Meke sipu totoso henahena rini, si zama la koe Ruti se Boazi, “Mae mamu hena vasi bereti, mamu poṉa ia pa kolo vaeni.” Ke la habotu somanae koari na tie tavetavete se Ruti, meke vagi Boazi si kaiqa bale ta kinadi pa oela meke vala ni sa koe Ruti. Henahena se Ruti osolae deṉa zotaṉa meke koa hola si kaiqa ginani. 15 Meke sipu ele taluarae la pa inuma se Ruti pude la pudiki pule bale gua, si tozini Boazi sari kasa tie tavetavete pa inuma, meke zama guahe si asa, “Va malumia se Ruti pude la vagi bale kamoa vasina tata koa rina iqoso bale; ba mi lopu norea. 16 Mi lobusu vurani kaiqa qaqaloto koari na iqoso bale mamu va hoqa vekoi pa mudi mia, pude mani atu pudiki vagi sa, ba mi lopu nore hukatia,” gua si asa.

17 Gua asa ke pudiki e Ruti sari na bale hoqadi, osolae kamoa veluvelu. Ke totoso seke va vuvusu vagi sa sari na kikodi, si padana tu hiokona puta kilo mamata si kamoa sa. 18 Paleki sa sari na kiko bale, meke pule la pa vasileana, meke va dogoroni sa koe Naomi sa sokudi gua sapu pudiki vagi sa. Vala i tugo sa koe Naomi sari na ginani koa holadi pa dia hinenahena sapu paleki sa. 19 Meke nanasia Naomi si asa, “Pavei si pudiki bale goi ṉinoroi he? Pa inuma tesei si tavetavete goi? Mani mana nia Tamasa sa tie sapu balabala igo!”

Ke tozi nia Ruti se Naomi sapu pa inuma te Boazi si tavetavete sa.

20 Meke zama la koe Ruti se Naomi, “Mani ta manae sa tie sana koe Zihova sapu lopu makudo va tukana gita si gita pu korapa toa meke sari na loada pu matedi.” Meke zama tugo si asa, “Sa tie sana si keke turaṉada soti mo gita, keke koari na turaṉada sapu ta hivae pude kopuni gita,” gua si asa.*Liv 25:25

21 Meke zama se Ruti, “Pa kaiqa nana zinama pule sa, si tozi nau sa pude tavetavete somanae mo koari nana tie tavetavete osolae beto sa tinavete kotokoto bale tanisa,” gua.

22 Meke zama la koe sa se Naomi, “Uve tuqu, be guana la tavetavete goi pa inuma tadi kaiqa, si gina kote ta ṉoṉovala si goi. Ke leana hola si pude mamu tavetavete somanae mo koari na vineki pa inuma te Boazi,” gua si asa. 23 Gua asa ke somana tavetavete mo koarini se Ruti, meke pudipudiki osolae hokoto sa totoso kotokoto bale meke huiti. Koa hola la mo koe Naomi se Ruti.