Pablo Nu Chada Degaba Bitabokedale Kwian Chubenu Una Corintomu Alin
Segunda Carta de Pablo a los Corintios
Pablo kledu toi nga kweri kada Macedoniage gire ama chada ai degangu bitabokedale kagale kwian Jesucristo gerua ganga alin una Corintoge. Pablo skatemanalla kada Tito chku Pablo kle ngwadi, Tito geru ketu Pabloge kwian Chubenu una Corintomu Pablo chadalla ngeru gau ngwange giti. Chada ngeru giti ulia Pablo ka bo mno kwian ole ta no giti kwian kledu age me no gdale. Tito giti Pabloge chku uñale kwian gweale Jesucristo gerua ganga una Corintomu Pablo chadalla ngeru gau ngwange no ama mo ta blitu ama kledu age me no ngeru ama chugu ngwadi. Agwa kwian Chubenu na gweale skochiu tanre Pablodi ama chada degangu gdale, kwian e kledu gerule Pablodi Chube me Pablo gau Jesucristo gerua ketangale dale Pablo kle gerule kare, gire kwian e chegu chage age me no ama kledu age ngeru kare.
Geru e ulita chku uñale Pabloge gire Pablo chada ai degangu kwian Chubenu alin una Corintoge. Chada ai giti Pablo kwian ta gbu suge ulia Chube nu Pablo gaba kwian Jesucristo gerua ketangale kaire Pablo kwian ta gbu suge kwian igi litadale kwian Jesucristo gerua ganga nga nage me lle molen chudaboagda.
1
Pablo gbi kage chada giti kwian Chubenu
una Corintomu alin
Cha Pablo chada ai degange ba ulita Chubenu alin kle mo lite Chube geruadi una Corintoge kaire daba Chubenu na ulita alin kle toi una na kaire kairege nga kweri Acayage:
Chube tale Chube cha gau cha gbu Jesucristo gerua ketangale, cha ule daba Timoteo ole gbi kage chada ai giti ba ulita Jesucristo gerua gaba alin. Cha takalin Chube che Ñenua kaire Jesucristo che Chugagwalla age no no ba ulita alin ama ba ulita ta gbe suga no.
Kwian Chubenu boi daga ngwale, Chube kwian ene
ta gbe suga no boi daga ngwaleske
Che ulita gerudale no no Chube giti, ama che Chugagwalla Jesucristo Ñenua, ama tai dage chege diali ama che chudaboi ama che ta gbe suga no. Che kle boi daga ngwale gire Chube che chudaboi, ama che kira gbe ama che ta gbe suga no, ene kaire daba na kle boi daga ngwale che ñage daba ene chudaboi ta gbe suga no Chube che chudabo kare ta gbe suga no che kle boi daga ngwaleske. Cristo chagedu nga dba ai giti, ama boidu tanre daga ngwale kwian ama dollale kote, che boi ene kaire daga ngwale Cristo gerua dbe giti Cristo che chudaboi ta gbe nga suga ma no ole boi daga ngwaleske.
Cha ule Timoteo ole kle boi tanre daga ngwale Cristo gerua dbe giti, kaire cha boidu daga ngwale Cristo gerua dbe giti ba ulita alin ba ulitaske, ene ba geru Cristo giti keruchugu ba geru Cristo giti gau ulia ene ba ulita ta chegu suga no geru e ole, ba tiendu gitiru ji chugege ba agedu me no gdale, geru Cristo giti no no ba ulita alin. Kaire Cristo cha chudaboi ta gbe suga no boi daga ngwaleske, ene suge chage cha ba chudaboi mine ta gbe suga no ba kle boi daga ngwale Cristo gerua dbe giti cha kle boi daga ngwale kare, cha ba chudaboi ta gbe suga no boi daga ngwaleske Chube kle cha chudaboi ta gbe suga no kare, ene ba boi daga ngwale ba ñage jage ba mi joge siere Cristo geruage. Geru chku uñale chage ba ulita giti ba kle boi daga ngwale Cristo gerua dbe giti, e giti chke uñale chage ba kle mo ta gbe no Cristo ole, kaire boi daga ngwaleske Chube kle ba chudaboi ba ta gbe nga suga no ole ene ba kle ñage ta chege kiraske Cristo geruage diali, e giti nga suga no chadi ba ulita giti.
8-9 Cha bitalla Jesucristo giti, cha ta ba ta gbakalin chke boidu cha ole nga kweri Asiage giti, nga Asiage Jesucristo gerua dbe giti cha boidu tanre daga ngwale kwian geru dollale kote, kwian Jesucristo gerua dollale nga ege agedu tanre me no cha ole, e kote cha kira ulita jonga, cha tañachugu kwian e be cha gweda geru gdale, ulia cha tañachugu cha mi tien gitiru gwade, agwa uñadu chage Chube kwian jaba gbanga gwadeni kledu cha ole, sugedu trate chage boi tirare eneske cha agali me ñage age no mo alin agali agwa Chube alin ñage age no cha alin cha chudaboi, cha gballa me ñage mo gbe siere kwian kle age tirare me no cha olege, cha mo jigu Chube kote, Chube agedu no cha alin. 10 Chube cha chudabo tanre nga Asiage, ama cha jun siere kwian tadu agekalin tirare cha olege nga ege, ene kwian me ñadu cha gweda. Chube cha chudabo nga Asiage kare, ene kaire uñale trate chage Chube be cha chudaboi diali cha be boi tirareske ulita, Chube be cha jwen siere diali kwian ta agekalin tirare cha olege. 11 Noare ba ulita mo ta gbe gerule Chube ole cha giti, ba ulita chudaboi kade Chubege cha alin cha kle boi tirareske. Ba ulita gerule ene Chube ole cha giti, Chube be cha chudaboi gire be suge ba ulitage Chube kle age no cha alin, e giti ba ulitadi nga be suga no gire ba ulita be gerule no no Chube ole ama kle age giti.
Pablo mo ta blite me joge tienda kwian una Corintomudi Pablo tañachugu ngeru kare
12 Nga suga no chadi cha tale cha suge moge ulia nga ulita baini kaire cha jogeba ngwadi cha chagedu kwian ulitaske age no trate Chube takalin kare, cha kledu ba kwian una Corintomu ulitaske cha chagedu age no ene kaire. Cha agali mo talla giti me mo ta gbu chage ene, me ene, agwa Chube agedu no cha alin, ama cha ta gbu, ama cha kira gbu diali, ene cha ñadu chage age no trate ama takalin kare. 13-14 Diali geru cha kle degange kare ba ulita alin, geru e me mno ba alin ñage suge trate ba ulitage, agwa ba ulita gwealege me suge trate, ba gweale kle tañachuge me no cha giti kle tañachuge cha me kle age ulia cha kle chada degange kare, cha takalin ba ulita baige kle tañachuge ene cha giti chke uñale trate trate geru cha kle degange kare ba ulita alin geru e ulia ulita, cha me kle sole chada giti ni cha kle ba anblite. Cha takalin suge trate ba ulitage cha kle mo ta gbe chage no Jesucristo gerua dbe no kwian ulitaske Chube takalin kare, ene bdagli che Chugagwalla Jesu chieni chuiage nga be suga no ba ulitadi cha giti kaire nga be suga no chadi ba ulita giti. 15 Ngeru cha tañachugu ba ulita kle mo ta dbe no cha ole ba ulita be cha gaini ngwange no diali, malen cha tañachugu joge chke bitaboke baske tienda ba ulitadi, ene bitaboke ba ña kira gai cháge Jesucristo gerua giti. 16 Cha tañachugu joge nga kweri Macedoniage agwa ngeru cha be joge chke ba ngwadi, gire cha be joge dare nga Macedoniage, gire nga Macedoniage cha chieni ba ngwadi nakwaite, cha chege sugeti ba ole ene ba gweale be ñage cha chudaboi cha gatedi joge dare nga kweri Judea ngnagu. 17 Cha tañachugu joge chke ba ngwadi ene, agwa cha me ñadu, ¿e giti ba gweale kle tañachuge chadi cha mo ta gbu joge agwa ulia cha me tadu jogekalin cha mo ta gbu kare? Cha geru ketu bage cha be joge tienda ba ulitadi, gire cha me jo, ¿e giti ba gweale kle tañachuge chadi cha gerudu ta boke ole sole ba ole? 18 Uñale trate Chubege cha ta mine giti cha gerule ba ole, uñale Chubege cha kle mo ta gbe gerule ulia ba ole diali, cha me kle gerule ta boke ole sole ba ole. 19 Cha ta chagekalin age no ulita Chube Kirolla Jesucristo agedu kare nga dba ai giti, malen cha me sole ba ole. Cha kaire Silvano kaire Timoteo cha gdamai chagedu ba ulitaske Jesucristo gerua trage ba ulita ole cha me sodu ba ole, cha gerudu ulia ba ole Jesucristo giti. Jesucristo diali gerudu ulia ni sodu sidri, Jesucristo agedu ulia diali ama gerudu kare. 20 Kaire Jesucristo agedu ulita kwian alin Chube gerudu unsuialin Chube be Jesucristo gbe age kare, Jesucristo agedu no ene ulita giti che ulita gerule no no Chube ole. 21 Chube ba ulita kaire cha ulita ta gbu Cristo gai ulia, ama che ulita ta gbu chage kiraske Cristo geruage, Chube che ulita gau mo alin geru dbe ama alin kwianske. 22 Che ulita Chubenu ulia, ama mo Oña gbu che tale, Chube Oña diali kle che ole kle che ta gbe suge trate che Chubenu bdagli che be toi diali chui tangle Chube ole. 23 Ulia ngeru cha tañachugu joge una Corintoge tienda ba ulitadi gerule ba ulita ole agali, agwa bdagli cha tañachugu ma no ba ulita alin cha me joge ba ngwadi cha tañachugu ngeru kare, malen cha mo ta blitu cha me jo. Ba ñage tañachuge cha me kle gerule ulia, agwa uñale Chubege cha kledu tañachuge mine ba ulita giti, cha me kle gerule ene ulia ba ole Chube be cha gbe jiske cha kle gerule giti ba ole. 24 Cha me ta jogekalin llani gerule mno ba ole mo ta gbe Jesucristo gai ma no giti, me ene, uñale chage ba ulita mo ta gbu no Jesucristo ole Jesucristo gai ulia, cha ta jogekalin llani cha ta ba ulita chudaboakalin kira gai ma dare Jesucristo giti, ene ba ulita chege kiraske nga suga no ole Jesucristo geruadi.